سۋرەت: turkystan.kz
تەمىرحان مەدەتبەك پوەزياعا قادام باسقان العاشقى ىزدەنىسىمەن-اق كوزگە ءتۇستى. ءيا, مۇقاعالي ايتقانداي, «ەگەر پوەزيا تۇلەمەسە, جاڭارىپ وتىرماسا, پۋشكيندەر مەن ابايلاردان كەيىن ول ەسىكتى قاعۋدىڭ ءوزى اقىماقتىق بولار ەدى». جاس اقىن ءا دەگەننەن جاڭاشىل اتاندى. ماڭىزدى الەۋمەتتىك تاقىرىپتارعا دەر شاعىندا ءۇن قاتىپ, زاماننىڭ بۇلقىنىسىن تانىتۋعا تىرىستى. ابىز ءابىش كەكىلباي ۇلى اقىن تۋرالى سوزىندە: «ول كوپتىڭ مۇددەسىن ءسوز اراسىندا ەمەس, ءوز مۇڭىن شەتكە ىسىرىپ قويىپ, بارىنەن بۇرىن مۇڭداپ, بۇرىن جىرلاپ كەلە جاتقان الەۋمەتشىل اقىن. امبەنىڭ قينالعان شەرىن تولعاپ, امبەنىڭ تەبىرەنگەن سىرىن ايتىپ كەلە جاتقان ۇلت جوقشىسى, ۇلت جىرشىسى» دەگەن بولاتىن. اقىن جىرىندا عانا ەمەس, قايبىر ۇلت باسىنا تونگەن قيلى جاعدايدا دا حالىقتىڭ اتىنان ءسوز سويلەپ, ەل تاعدىرىنا قاتىستى كەسەك پىكىر ءوربىتتى. قاراعايعا قارسى بىتكەن بۇتاقتاي تىك ءجۇردى, نە نارسەنى دە بۇكپەي ايتتى. «جاۋلارىم – التى قىردىڭ استىنان, كۇشىگىمنىڭ ۇرگەنىن ەستىپ, بەزىپ قاشاتىن. تورىمە شىقپاق تۇگىلى, توبەمە شىقپاق تۇگىلى – قاڭسىعان تۋلاعىمدى, ويۋلى ەتىكتەرىن شەشىپ باساتىن».
تۇرىك اقىنى مەحمەت اكيف ەرسوي ايتقانداي, تەمىرحان مەدەتبەك قالاي ءومىر سۇرسە, سولاي جازدى, قالاي جازسا, سولاي ءومىر ءسۇردى. اقىننىڭ پوەزياعا جاساعان ۇلكەن بەتبۇرىسى رەتىندە «كوك تۇرىكتەر سارىنى» جيناعىن ايتار ەدىك. «كوك تۇرىكتەر سارىنى» – قىلىشى ەرلىككە قانعان, نامىسى تاستى تۋراعان باتىر تۇركىلىك رۋحتىڭ بىرەگەي كورىنىسى, زاماناۋي ۇلگىدە ويانىپ, ۋاقىتقا ءتىل قاتۋى. ەڭبەگى ەلەنىپ, ەل تىلەگى ورىندالىپ, مەرەيلى بيىككە كوتەرىلگەن اقىننىڭ بيىلعى قۋانىشى – ولەڭ مەرەيىنە اينالىپ وتىر.
