فوتو: aa.com.tr
Yonhap اگەنتتىگىنىڭ مالىمدەۋىنشە, سەۋل ورتالىق اۋداندىق سوتى يۋن سوك ءيولدى درونداردىڭ قحدر اۋە كەڭىستىگىن بۇزۋىنا بۇيرىق بەرگەنى ءۇشىن «جاۋعا جاردەمدەسۋ» جانە «قىزمەتتىك وكىلەتتىگىن اسىرا پايدالانۋ» باپتارى بويىنشا كىنالى دەپ تانىدى.
سوتتىڭ شەشىمىنە سايكەس, 2024 جىلدىڭ قازان ايىندا يۋن سوك يول درونداردىڭ پحەنيان ۇستىنەن ۇشۋىن ۇيىمداستىرۋعا نۇسقاۋ بەرگەن, وسىلايشا سولتۇستىك كورەيا تاراپىن ارانداتقان.
بۇرىنعى پرەزيدەنت 30 جىلعا سوتتالدى. ونىڭ ادۆوكاتتارى سوت شەشىمىنە شاعىم تۇسىرەتىندەرىن مالىمدەدى.
اتالعان ءىس شەڭبەرىندە بۇرىنعى قورعانىس ءمينيسترى كيم يون حيون دە 30 جىلعا باس بوستاندىعىنان ايىرىلدى.
ايتا كەتەيىك, 2024 جىلعى 3 جەلتوقساندا سول كەزدەگى پرەزيدەنت يۋن سوك يول وپپوزيتسيانى «مەملەكەتكە قارسى ارەكەتپەن» ايىپتاپ, ەلدە اسكەري جاعداي ەنگىزدى. الايدا ۇلتتىق جينالىس بۇل شەشىمنىڭ كۇشىن جويۋعا داۋىس بەرگەننەن كەيىن, ول ەنگىزىلگەن شارالاردان باس تارتۋعا ءماجبۇر بولدى.
2024 جىلعى 14 جەلتوقساندا پارلامەنت وعان يمپيچمەنت جاريالاۋ تۋرالى داۋىس بەرىپ, سونىڭ ناتيجەسىندە يۋن سوك يول قىزمەتىنەن ۋاقىتشا شەتتەتىلدى.
2025 جىلعى 4 ساۋىردە وڭتۇستىك كورەيانىڭ كونستيتۋتسيالىق سوتى پارلامەنتتىڭ ءوتىنىشىن قاناعاتتاندىرىپ, ونى قىزمەتىنەن تۇپكىلىكتى شەتتەتۋ تۋرالى شەشىمدى بەكىتتى.
ەسكە سالايىق, 2026 جىلدىڭ باستاپقى تۇسىندا وڭتۇستىك كورەيانىڭ ەكس-پرەزيدەنتى يۋن سوك ەلگە قاتىستى ۇكىم شىعارىلىپ, وت شەشىمىنە سايكەس, ول 5 جىلعا باس بوستاندىعىنان ايىرىلعان بولاتىن.
