ۆيدەودان الىنعان كادر
كۋاگەرلەردىڭ ايتۋىنشا, ولار جول بويىندا قولىندا بالعاسى بار ەر ادامدى كورگەن. ونىڭ جانىندا تۇرعان ايەل يتكە تيىسپەۋىن وتىنگەنىمەن, ەر ادام جانۋار جاتقان جەرگە قاراي بەت العان. ءبىراز ۋاقىتتان كەيىن ول ءيتتى بالعامەن ۇرىپ ءولتىرىپ, كەيىن جانۋاردىڭ دەنەسىن سۇيرەپ اكەتكەن.
– ءبىز جولدا كەتىپ بارا جاتىپ, قولىندا بالعاسى بار ەر ادامدى بايقادىق. جانىنداعى ايەل ونى توقتاتۋعا تىرىستى. الايدا ول يت جاتقان جەرگە بارىپ, كەيىن جانۋاردى ءولتىردى. سودان سوڭ دەنەسىن سۇيرەپ الىپ كەتتى. ءبىز بىردەن پوليتسيا شاقىردىق, – دەيدى وقيعا كۋاگەرلەرى.
وقيعا ورنىنا كەلگەن پوليتسيا قىزمەتكەرلەرى ەر ادامنىڭ جەكە باسىن انىقتاپ, تۇسىنىكتەمە العاننان كەيىن ونى بولىمشەگە جەتكىزدى.
بۇل جاعداي قالا تۇرعىندارىنىڭ اراسىندا ۇلكەن نارازىلىق تۋدىردى. كوپشىلىك جانۋار اۋىر حالدە نەمەسە قارتايعان بولسا دا, ونى مۇنداي قاتىگەز تاسىلمەن ولتىرۋگە بولمايتىنىن ايتىپ, ارەكەتتىڭ زاڭ مەن ادامگەرشىلىك قاعيدالارىنا قايشى ەكەنىن اتاپ ءوتتى.
قازىر وقيعانىڭ بارلىق ءمان-جايى انىقتالىپ جاتىر. ءتيىستى ورگاندار بولعان جاعدايعا قۇقىقتىق باعا بەرەدى.
