پاۆلودار وبلىسىنىڭ ورتالىق جاعالاۋىندا جاستاردىڭ باسىن قوسقان شارانىڭ نەگىزگى ماقساتى – جاستار اراسىندا قۇقىقتىق مادەنيەتتى ناسيحاتتاۋ جانە زاماناۋي كوممۋنيكاتسيالىق فورماتتار ارقىلى قۇقىق بۇزۋشىلىقتاردىڭ الدىن الۋ.
اشىق ميكروفون بارىسىندا جاستار «زاڭ مەن ءتارتىپ» يدەولوگياسىنىڭ ماڭىزدىلىعى تۋرالى ءوز پىكىرلەرىمەن ءبولىستى. قاتىسۋشىلار «زاڭ مەن ءتارتىپ – قاۋىپسىز ءارى تۇراقتى قوعامنىڭ نەگىزى» ەكەنىن اتاپ ءوتىپ, زاڭ تالاپتارىن ساقتاۋ ازاماتتاردىڭ قاۋىپسىزدىگى مەن ەرتەڭگى كۇنگە دەگەن سەنىمدىلىگىن قامتاماسىز ەتەتىنىن جەتكىزدى. سونداي-اق جاستار قۇقىقتىق مادەنيەتتىڭ, ازاماتتىق جاۋاپكەرشىلىكتىڭ جانە زاڭعا قۇرمەتپەن قاراۋدىڭ ماڭىزدىلىعىنا ەرەكشە توقتالدى.
ءىس-شارا اياسىندا قاتىسۋشىلار ءۇشىن قولونەر جانە سۋرەت سالۋ الاڭدارى, قۇقىقتىق ساۋاتتىلىق پەن ازاماتتىق جاۋاپكەرشىلىكتى ارتتىرۋعا باعىتتالعان ينتەراكتيۆتى ويىندار مەن ءتۇرلى بەلسەندىلىكتەر ۇيىمداستىرىلدى. سونىمەن قاتار قۇقىق قورعاۋ ورگاندارى وكىلدەرىنىڭ اشىق قابىلداۋ الاڭى جۇمىس ىستەپ, تۇرعىندار وزدەرىن تولعاندىرعان سۇراقتارىنا جاۋاپ الىپ, قۇقىقتىق ماسەلەلەر بويىنشا كەڭەس الۋ مۇمكىندىگىنە يە بولدى.
ءىس-شارا اشىق ءارى ينتەراكتيۆتى فورماتتا ءوتىپ, جاستاردى, مەملەكەتتىك ورگاندار وكىلدەرىن جانە قالا تۇرعىندارىن ءبىر الاڭدا توعىستىرىپ, سىندارلى ديالوگ الاڭىنا اينالدى.
وبلىستىق اقپارات جانە قوعامدىق دامۋ باسقارماسىنىڭ جاستار جانە وتباسى ءبولىمىنىڭ باسشىسى جاننۇر احمەتجاعوۆانىڭ ايتۋىنشا, جازعى ماۋسىمدا جاستار مەن تۇرعىنداردىڭ بوس ۋاقىتىن ءتيىمدى ۇيىمداستىرۋعا باعىتتالعان «ەرتىس تولقىنى» جوباسى اياسىنداعى ءاربىر سارسەنبىلىك شارا «زاڭ مەن ءتارتىپ» يدەولوگياسىن ىلگەرىلەتۋگە ارنالاتىن بولادى. بۇل رەتتە وبلىستىڭ ءاربىر قالاسى مەن اۋدانى وزدەرىنىڭ ۇزدىك ءارى قىزىقتى باستامالارىن ۇسىنادى. ماسەلەن, «زاڭدى Talk» ءىس-شاراسىنىڭ بەلسەندى ۇيىمداستىرۋشىلارى پاۆلودار اۋدانىنىڭ جاستارى بولدى.
