فوتو: istockphoto.com
«فريدوم فينانس» ادۆوكاتى نازەركە ريزابەكوۆا
- «كازتاگ» پەن «فريدوم فينانس» اراسىنداعى داۋ ءبىراز ۋاقىتتان بەرى جالعاسىپ كەلەدى. كومپانيا تاراپىنان بۇل جاعدايعا قانداي تۇسىنىكتەمە بەرە الاسىز؟
- كومپانيا ءوزىن قانداي دا ءبىر قاقتىعىستىڭ قاتىسۋشىسى رەتىندە قاراستىرمايدى. باستاپقىدا ول وركەنيەتتى تۇردە جانە زاڭ تالاپتارىنا سايكەس «كازتاگ»-قا شىندىققا جاناسپايتىن مالىمەتتەردى تاراتۋدى توقتاتۋ تۋرالى ورىندى ءارى ءادىل تالاپتار جولدادى. ءيا, اقپارات اگەنتتىگىنىڭ ارەكەتتەرىنەن ماقساتتى ءارى اۋقىمدى اقپاراتتىق شابۋىلدىڭ بارلىق بەلگىلەرىن بايقاۋعا بولادى. ۇزاق ۋاقىت بويى «فريدوم فينانسقا» قاتىستى سوت شىندىققا سايكەس كەلمەيدى جانە كومپانيانىڭ ىسكەرلىك بەدەلىنە نۇقسان كەلتىرەدى دەپ تانىعان مالىمەتتەر تاراتىلدى. فاكتىلەر بۇرمالانىپ, تاۋەلسىز جۋرناليستيكا رەتىندە قۇقىقتىق نەگىزى جوق ايىپتاۋلار جاريالاندى. كاسىبي ەتيكا مەن قۇقىقتىق مادەنيەت تۇرعىسىنان العاندا, جالعان اقپاراتتى جۇيەلى تۇردە تاراتۋعا جول بەرۋگە بولمايدى.
«كازتاگ» سوتقا دەيىنگى تالاپ-ارىزعا جاۋاپ بەرمەگەننەن كەيىن كومپانيا ءدال سول تالاپتارمەن ازاماتتىق سوتقا جۇگىندى. سوت جاريالانعان مالىمەتتەردىڭ شىندىققا سايكەس كەلمەيتىنىن انىقتادى. بۇل شەشىم قىلمىستىق سوت ءۇشىن وقيعانىڭ نەمەسە ارەكەتتىڭ ورىن العان-الماعانىن انىقتاۋ بولىگىندە پرەيۋديتسيالىق مانگە يە. بىراق سوت پروتسەسى كەزىندە دە (كەيىن بەلگىلى بولعانداي, سوت شەشىمىنەن كەيىن دە) ءبىزدىڭ پىكىرىمىزشە, «كازتاگ» شىندىققا جاناسپايتىن اقپاراتتاردى جاريالاۋدى جالعاستىرىپ, كومپانيا تالاپتارىن ەلەمەيتىنىن كورسەتتى. پوليتسياعا جۇگىنۋ ءبىزدىڭ قۇقىقتارىمىزدىڭ جالعاسىپ جاتقان جانە ۇيلەستىرىلگەن تۇردە بۇزىلۋىن توقتاتۋ ماقساتىنداعى ءماجبۇرلى شارا بولدى.
- «كازتاگ»-پەن بولعان جاعدايعا دەيىن «فريدوم فينانس» وسىنداي اقپاراتتىق شابۋىلدارعا تاپ بولدى ما؟
- جوق, كومپانيا ءۇشىن بۇل بۇرىن-سوڭدى بولماعان جاعداي. ءبىز العاش رەت جۋرناليستيكانىڭ نەگىزگى قاعيداتتارىن وسىنداي دەڭگەيدە ەلەمەۋ ارەكەتىمەن بەتپە-بەت كەلدىك. زاڭ بۇقارالىق اقپارات قۇرالدارىن ماتەريال جاريالار الدىندا فاكتىلەردى وبەكتيۆتى تەكسەرۋگە مىندەتتەيدى. الايدا بۇل جاعدايدا «كازتاگ» اتالعان ستاندارتتاردى ساقتامادى. كومپانياعا دا, مەملەكەتتىك ورگاندارعا دا سۇراۋلار تەك كوزبوياۋشىلىق ءۇشىن جولدانعان, ال جاريالانىمدار رەسمي جاۋاپتاردى كۇتپەستەن جاپپاي جاريالانىپ وتىرعان.
- ءسىزدىڭ ويىڭىزشا, «كازتاگ»-تىڭ مۇنداي ارەكەتكە بارۋىنا قانداي سەبەپ بولدى؟
- ۇيىمداستىرۋشىلاردىڭ ماقساتى قولدان قوعامدىق رەزونانس تۋعىزىپ, برەندتىڭ بەدەلىن ءتۇسىرۋ ارقىلى «فريدوم فينانسقا» قوعامدىق قىسىم جاساۋ بولدى. كومپانيا مۇنىڭ ءىرى قارجى ۇيىمىن بەلگىلى ءبىر جەڭىلدىكتەر جاساۋعا جانە ءۇشىنشى تۇلعالاردىڭ پايداسىنا اقشا تولەۋگە ماجبۇرلەۋ ءۇشىن جاسالعانىن جوققا شىعارمايدى. الايدا كومپانيانىڭ مۇنداي تولەمدەردى جۇزەگە اسىرۋعا زاڭدىق مىندەتتەمەسى جوق جانە ول ولاردىڭ جەكە قارجىلىق شىعىندارى ءۇشىن جاۋاپ بەرمەيدى. «فريدوم فينانس» ۇستانىمى وزگەرمەيدى: كومپانيا تەك قۇقىقتىق الاڭدا ارەكەت ەتەدى جانە اقپاراتتىق بوپسالاۋ ادىستەرىنە كونبەيدى.
- سوعان قاراماستان, «فريدوم فينانس» تاتۋلاسۋعا دايىن ەكەنىن مالىمدەدى. بۇل ۇستانىم وزگەرگەن جوق پا؟
- كومپانيا ءبىر جىل بۇرىن سوتقا دەيىنگى تالاپتا دا, قازىر دە داۋدى رەتتەۋگە اشىق ەكەنىن مالىمدەدى. بىراق تاتۋلاسۋ تەك باستاپقىدان بەرى وزگەرمەگەن ءادىل ءارى ورىندى تالاپتار ورىندالعان جاعدايدا عانا مۇمكىن:
- جاريالانىمداردىڭ شىندىققا سايكەس كەلمەيتىنىن مويىنداۋ;
- ولاردى رەسمي تۇردە تەرىسكە شىعارۋ;
- كورىنەۋ جالعان اقپارات تاراتىلعانىن جانە بۇقارالىق اقپارات قۇرالدارى تۋرالى زاڭ تالاپتارى بۇزىلعانىن مويىنداۋ.
ەگەر قورعاۋ تاراپى شىنىمەن داۋدى رەتتەۋگە دايىن بولسا, الدىمەن وسى تالاپتاردى ورىنداۋدان باستاۋى كەرەك. «فريدوم فينانس» ءۇشىن ادىلدىكتى قالپىنا كەلتىرۋ جانە كومپانيانىڭ ابىرويلى اتىن قورعاۋ اسا ماڭىزدى. ەگەر سوتتالۋشىلار بۇل تالاپتاردى ورىنداماسا جانە ولاردى جۇزەگە اسىرۋ تەتىكتەرىن تالقىلاۋعا ۇسىنىس جاساماسا, وندا ءىستىڭ سوڭعى نۇكتەسىن قازاقستان رەسپۋبليكاسىنىڭ زاڭناماسىنا سايكەس سوت قويادى.
«كازتاگ» اقپارات اگەنتتىگىنىڭ باس رەداكتورى امير كاسەنوۆ «فريدوم فينانس» اق-قا قارسى اۋقىمدى اقپاراتتىق شابۋىلدى ۇيىمداستىردى دەپ ايىپتالۋدا. ال اگەنتتىكتىڭ باس ديرەكتورى اسەت ماتاەۆ كوممەرتسيالىق ۇيىمداعى باسقارۋشىلىق مىندەتتەرىن تيىسىنشە ورىندامادى جانە بۇزاقىلىق جاسادى دەگەن كۇدىككە ىلىنگەن.
«فريدوم فينانس» مالىمەتىنشە, 2025 جىلى «كازتاگ» كومپانياعا قارسى الاياقتىق, قارجى پيراميداسىن قۇرۋ جانە كليەنتتەردىڭ قاراجاتىن شىعارۋ تۋرالى ايىپتاۋلار قامتىلعان كوپتەگەن جاعىمسىز جاريالانىمدار شىعارىپ, اقپاراتتىق شابۋىل باستاعان.
تەرگەۋ نۇسقاسىنا سايكەس, «كازتاگ» باس ديرەكتورى اسەت ماتاەۆ باسقارۋشىلىق مىندەتتەرىن تيىسىنشە ورىنداماي, رەداكتسيا قىزمەتىنە جەتكىلىكتى باقىلاۋ جۇرگىزبەگەن. سونىڭ سالدارىنان «فريدوم فينانس» ءۇشىن اۋىر زارداپتارعا اكەلگەن زاڭبۇزۋشىلىقتارعا جول بەرىلگەن.
سونداي-اق اسەت ماتاەۆ بۇزاقىلىق تۋرالى ءىس بويىنشا دا جاۋاپقا تارتىلىپ جاتىر. ەسكە سالساق, 2026 جىلعى 17 ناۋرىزدان 18 ناۋرىزعا قاراعان ءتۇنى الماتى قالاسىنداعى Dostyk Plaza ساۋدا-ويىن-ساۋىق ورتالىعىنىڭ ماڭىندا ماتاەۆ تانىسىمەن بىرگە ماس كۇيىندە ەكى 20 جاستاعى جىگىتپەن جانجالداسىپ, ونىڭ سوڭى توبەلەسكە ۇلاسقان. تەرگەۋ ونىڭ ارەكەتىن ادامدار توبىنىڭ كۇش قولدانۋ ارقىلى جاساعان بۇزاقىلىعى رەتىندە سارالاعان.
بۇعان دەيىن «فريدوم فينانس» كومپانياسى «كازتاگ» باسشىلىعى كىناسىن مويىنداعان جاعدايدا تاتۋلاسۋعا دايىن ەكەنىن مالىمدەگەن بولاتىن.
