وندا حۆق ساراپشىلار توبىنىڭ ەل ەكونوميكاسىنىڭ كەيىنگى ۇردىستەرىن, جۇرگىزىلىپ جاتقان رەفورمالاردىڭ باسىمدىقتارىن, ودان ءارى دامۋ پەرسپەكتيۆالارىن زەردەلەۋ جونىندەگى قىزمەتىنىڭ الدىن الا قورىتىندىلارى قارالدى.
پرەمەر-مينيستر ولجاس بەكتەنوۆ سەرىكتەستىكتىڭ ماڭىزدىلىعىنا توقتالا وتىرىپ, ەلىمىزدىڭ ەكونوميكالىق سايا-ساتىن جەتىلدىرۋدەگى ساراپتامالىق سۇيەمەلدەۋدىڭ ءرولىن اتاپ ءوتتى. ەلىمىزدە قابىلدانعان جاڭا كونستيتۋتسيا ارتاراپتاندىرىلعان ورنىقتى ەكونوميكانى دامىتۋعا ينستيتۋتسيونالدىق نەگىز قالايدى. پرەزيدەنت قاسىم-جومارت توقاەۆتىڭ تاپسىرمالارىنا سايكەس ەكونوميكالىق جاڭعىرتۋدىڭ كەشەندى كۇن ءتارتىبى جۇزەگە اسىرىلىپ جاتىر.
ء«بىز قازاقستاننىڭ ەكونوميكالىق دامۋىندا ماڭىزدى ءرول اتقاراتىن حالىقارالىق ۆاليۋتا قورىمەن ارىپتەستىگىمىزدى جوعارى باعالايمىز. بۇل ديالوگ حۆق-نىڭ تۇراقتى ميسسيالارى, ماقساتتى كەڭەستەرى جانە مەملەكەتتىك ورگاندارعا كورسەتىلەتىن تەحنيكالىق كومەگى اياسىندا جالعاسىپ وتىر. اعىمداعى ميسسيانىڭ قورىتىندىلارى بويىنشا ۇسىنىمدار ەلىمىزدىڭ ماكروەكونوميكالىق جانە ماكروپرۋدەنتسيالدىق ساياساتىن ودان ءارى جەتىلدىرۋ ءۇشىن قۇندى باعدار بولادى دەپ سەنەمىن», دەدى ۇكىمەت باسشىسى.
حۆق-نىڭ قازاقستان بويىنشا ميسسياسىنىڭ باسشىسى امينا لارەش ماكروەكونوميكالىق تۇراقتىلىقتى قامتاماسىز ەتۋ مەن ينفلياتسيالىق قىسىمدى تومەندەتۋدە مەملەكەت قابىلداپ جاتقان شارالاردىڭ ماڭىزدىلىعىن اتاپ ءوتتى. سونداي-اق ۇكىمەتتىڭ, ۇلتتىق بانكتىڭ, قارجى نارىعىن رەتتەۋ جانە دامىتۋ اگەنتتىگىنىڭ ۇيلەستىرىلگەن جۇمىسى قارجى سەكتورىنداعى تۇراقتىلىقتى ساقتاۋدىڭ ماڭىزدى تەتىگى ەكەنى ايتىلدى.
«بۇگىندە قازاقستان ەكونوميكاسى دامۋىنىڭ وڭ ديناميكاسىن اتاپ وتۋگە بولادى. مۇناي جەتكىزىلىمىنە بايلانىستى سىرتقى فاكتورلاردىڭ ءتيىمدى وتەماقىسى ناتيجەسىندە تولەم بالانسىنىڭ جاعدايى جاقسارىپ, ەكونوميكا تۇراقتىلىقتى كورسەتىپ كەلەدى. سونداي-اق ەكونوميكالىق ساياسات پەن قابىلدانىپ جاتقان شەشىمدەر جۇيەلى تۇردە جەتىلدىرىلىپ كەلە جاتىر. ماكروەكونوميكالىق تۇراقتاندىرۋعا ىقپال ەتەتىن جۇرگىزىلىپ جاتقان اقشا-نەسيە ساياساتىن وڭ باعالايمىز. ەكونوميكالىق ءوسۋدىڭ جوعارى قارقىنىن ساقتاي وتىرىپ, ينفلياتسيالىق قىسىمنىڭ بىرتىندەپ تومەندەۋى بايقالادى. ءبىز ۇكىمەتتىڭ, ۇلتتىق بانكتىڭ جانە قارجى نارىعىن رەتتەۋ مەن دامىتۋ جونىندەگى اگەنتتىكتىڭ بىرلەسكەن ءىس-قيمىل جوس-پارىن قابىلداۋىن قۇپتايمىز جانە ەكونوميكالىق ساياساتتى جۇزەگە اسىرۋعا ۇيلەستىرىلگەن كوزقاراس ماكروەكونوميكالىق تۇراقتىلىقتى ودان ءارى نىعايتۋعا, قازاقستان ەكونوميكاسىنىڭ تۇراقتى دامۋىنا ىقپال ەتەدى دەپ سەنەمىز», دەدى ا.لارەش.
قور ساراپشىلارى ەكونوميكالىق ءوسىمنىڭ تۇراقتى ەكەنىن اتاپ ءوتتى. وڭدەۋ ونەركاسىبىن, قىزمەت كورسەتۋ سالالارىن, كولىك پەن قۇرىلىس سەكتورلارىن دامىتۋعا باعىتتالعان جۇيەلى شارالار مۇناي ءوندىرۋ كولەمىنىڭ قىسقارۋىنىڭ ورنىن تولتىرىپ وتىر. ينفلياتسيا قارقىنىن باسەڭدەتۋ, سالىقتىق اكىمشىلەندىرۋدى جاقسارتۋ, فيسكالدىق ساياساتتى جەتىلدىرۋ باعىتتارىندا ىلگەرىلەۋ بايقالادى. بۇل باعىتتا ينفلياتسيالىق تاۋەكەلدەردى ودان ءارى تومەندەتۋ مەن كۆازيفيسكالدىق ساياساتتى جاقسارتۋعا قاتىستى بىرقاتار ۇسىنىس ايتىلدى.
تالقىلاۋعا پرەزيدەنت كەڭەسشىسى – ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى اسەت ەرعاليەۆ, قارجى ءمينيسترى ءمادي تاكيەۆ, ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين, ۇلتتىق بانك توراعاسىنىڭ ورىنباسارى ءاليا مولدابەكوۆا قاتىستى.
كەزدەسۋ قورىتىندىسىندا پرەمەر-مينيستر ولجاس بەكتەنوۆ امينا لارەش پەن حۆق كومانداسىنا رەفورمالاردى جۇزەگە اسىرۋدا قولداۋ كورسەتكەنى ءۇشىن العىسىن ءبىلدىردى. ەل ۇكىمەتى ءوزارا ءتيىمدى ارىپتەستىكتى ودان ءارى نىعايتۋعا باعىتتالعان سىندارلى ديالوگكە اشىق. ساپار ناتيجەسىندە حالىقارالىق ۆاليۋتا قورىنىڭ ۇسىنىستارى سالالىق مەملەكەتتىك ورگاندار تاراپىنان قارالادى.
