مادەنيەت جانە اقپارات مينيسترلىگىنىڭ قولداۋىمەن ۇلتتىق مۋزەيدە قىزىلوردا وبلىستىق تاريحي-ولكەتانۋ مۋزەيىنىڭ 85 جىلدىعى اياسىندا «سىر ءوڭىرى – تۇركى وركەنيەتىنىڭ التىن بەسىگى» اتتى كورمەنىڭ سالتاناتتى اشىلۋ ءراسىمى ءوتتى.
ءىس-شاراعا مادەنيەت جانە سپورت مينيسترلىگى مادەنيەت كوميتەتىنىڭ توراعاسى كۇمىس سەيىتوۆا, قىزىلوردا قالاسى اكىمىنىڭ ورىنباسارى شاحماردان بايمانوۆ, ەلوردالىق قالامگەرلەر مەن انشىلەر قاتىستى.
– سىر ءوڭىرىنىڭ رۋحاني جادىگەرلەرىن ناسيحاتتاۋ ماقساتىندا 2023 جىلى استانا قالاسىنىڭ 25 جىلدىعىنا ارنالعان وبلىسىمىزدىڭ ەلوردادا ونەر كۇندەرى وتكىزىلسە, 2024 جىلى الماتى قالاسىندا دا سىر ەلىنىڭ مادەني كۇندەرى وتكىزىلگەن بولاتىن. وڭىرلەر اراسىنداعى رۋحاني بايلانىستى ارتتىرۋ, تاجىريبە الماسۋدى كوزدەيتىن بۇل يگى باستامالار بۇگىندە ەلوردامىزدا جۇزەگە اسىپ جاتىر. مىنە, كورمەگە ارحەولوگيالىق قازبا جۇمىسى كەزىندە تابىلعان ەكسپوناتتار, ساق وركەنيەتىنە جاتاتىن شىرىك راباتتان تابىلعان التىن جاپسىرمالار, سونىمەن بىرگە س.ايتباەۆ اتىنداعى كوركەمسۋرەت گالەرەياسى قورىندا ساقتالعان قىلقالام شەبەرلەرىنىڭ 40-قا جۋىق كارتيناسى كوپشىلىك نازارىنا ۇسىنىلماق, – دەدى شاحماردان اسقار ۇلى.
مۇنان سوڭ جىرشى, تەرمەشى, «دارىن» مەملەكەتتىك جاستار سىيلىعىنىڭ لاۋرەاتى كۇنسۇلۋ تۇرىكپەن «تولعاۋ» تەرمەسىن ورىنداپ, كورەرمەنگە سىر ونەرپازدارىنىڭ مۇراسىنان شاشۋ شاشتى. كەلگەن قوناقتار كورمە زالىنا ءوتىپ, تاريحى تەرەڭ ءوڭىردىڭ ەتنوگرافيالىق بۇيىمدارىن, مۋزەي قورىنداعى تەڭدەسى جوق زەرگەرلىك بۇيىمدار كوللەكتسياسىن تاماشالادى. سونىمەن قاتار كورمەگە تاريحي تۇلعالار بۇقارباي باتىر ەستەكباي ۇلىنىڭ, قالمۇحاممەد يشان مارال ۇلىنىڭ, ەر سەيىتپەنبەت اۋليەنىڭ, سەردالى بي بەكشورا ۇلىنىڭ, قۇلبولدى يشان سۇلتان ۇلىنىڭ قارۋ-جاراق, ءمور, كىتاپ, قولجازبا, شەجىرە سياقتى پايدالانعان جادىگەرلەرى اكەلىنگەن. «سىعاناق حانشايىمى» رەكونسترۋكتسياسى قوناقتاردىڭ نازارىن اۋداردى. مارجان كوزدى التىن سىرعالار, كوگىلدىر اقىق كوزدى تسيليندر فورماسىنداعى تۇمار, تامشى تۇرىندەگى تۇيمەلەر جانە مارجان مونشاقتاردىڭ تۇپنۇسقا كوللەكتسياسى, قىش ىدىستار مەن گلازۋرلى قاپتامالار, ءارتۇرلى قۇمىرالار كورەرمەن كوزايىمىنا اينالدى.
