ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋىردا اقمولا وبلىسى زەرەندى كەنتىندە ورنالاسقان «تۇمار» وقۋ-ساۋىقتىرۋ كەشەنىندە «Zerendi Photo Fest II» اتتى فوتوتىلشىلەر فەستيۆالىن وتكىزدى.
ءداستۇرلى ءىس-شارا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيەتىنىڭ رەكتورى ەرلان سىدىقوۆتىڭ باستاماسىمەن, وسى وقۋ ورداسى ءباسپاسوز قىزمەتىنىڭ, سونداي-اق جۋرناليستيكا جانە الەۋمەتتىك عىلىمدار فاكۋلتەتىنىڭ ۇيىمداستىرۋىمەن ءوتتى.
ءىس-شاراعا مەملەكەتتىك ورگانداردا, بۇقارالىق اقپارات قۇرالدارىندا قىزمەت ەتەتىن فوتوتىلشىلەر, سونداي-اق ەۇۋ-دا جۋرناليستيكا ماماندىعى بويىنشا وقىپ جۇرگەن ستۋدەنتتەر قاتىستى.
بايقاۋ بارىسىندا ەلوردالىق جانە حالىقارالىق باق, مەملەكەتتىك ورگانداردىڭ فوتوتىلشىلەرى ەكى كۇن بويى ستۋدەنتتەرگە ءتۇرلى جانردا سۋرەتكە ءتۇسىرۋ تەحنيكاسىن ۇيرەتىپ, شەبەرلىكتى شىڭداۋ دارىستەرىن وتكىزدى. ولاردىڭ ىشىندە پرەمەر-ءمينيستردىڭ ءفوتوتىلشىسى باۋىرجان جۋاسباەۆ, «Egemen Qazaqstan» گازەتىنىڭ ءفوتوتىلشىسى ەرلان ومار, «استانا اقشامى» گازەتىنىڭ ءفوتوتىلشىسى سۇلتان سەيىت, وزگە دە فوتوونەر حاس شەبەرلەرىنىڭ ءىس-تاجىريبەسى ستۋدەنتتەرگە ءتالىمى مول تاعىلىمداما بولدى.
فوتوشەبەرلەردىڭ ارقايسىسى جانىنا بىرنەشە ستۋدەنتتى ەرتىپ ءجۇرىپ, قيلى جانردا فوتوعا ءتۇسىرۋدىڭ ءادىس-تاسىلدەرىن ۇيرەتتى. ناتيجەسىندە, جەكە ءفوتوتىلشىنىڭ عانا ەمەس, ونىڭ تۇتاس كومانداسىنىڭ تۇسىرگەن سۋرەتتەرى باعالاندى. سولايشا, قاتىسۋشىلار «ۇزدىك ءفوتوتىلشى», «ۇزدىك كومپوزيتسيا», «ۇزدىك فوتوپورترەت», «ۇزدىك فوتورەپورتاج», «ۇزدىك فوتوپەيزاج», «ۇزدىك راكۋرس» اتالىمدارىمەن ماراپاتتالدى. ءىس-شارادا ستۋدەنتتەردىڭ شەبەرلىگىن ارتتىرىپ قانا قويماي, ولاردى قاناتتاندىرىپ, ىنتا-جىگەرىن ارتتىرۋعا دا جول اشىلدى.
ۋنيۆەرسيتەتتىڭ جۋرناليستيكا جانە الەۋمەتتىك عىلىمدار فاكۋلتەتىنىڭ دەكانى قايرات ساق قاتىسۋشىلاردى ارنايى ديپلوممەن ماراپاتتاپ, سىي-سياپات جاسادى. سونىمەن بىرگە ەلىمىزدىڭ اقپارات سالاسىندا ۇزاق جىل ەڭبەك ەتىپ, ەرەكشە ءىز قالدىرعان فوتوونەر ساڭلاعى سوۆەتبەك ماعزۇموۆ فوتوفەستيۆالعا ارنايى قوناق رەتىندە شاقىرىلدى. زەينەتكە شىقسا دا, سۇيىكتى كاسىبىنەن قول ۇزە قويماعان ارداگەر:
– وسى فەستيۆالعا شاقىرعاندارىڭىز ءۇشىن ۋنيۆەرسيتەت ۇجىمىنا, ارىپتەستەرىمە العىسىمدى بىلدىرەمىن. ءبىز جاستارعا بىلگەنىمىزدى ۇيرەتۋگە قاشان دا دايىنبىز,– دەپ اعىنان جارىلدى.
بايقاۋدىڭ باس جۇلدەسىن سوۆەتبەك ماعزۇموۆ جەتەكشىلىك ەتكەن التىناي ءابدىش, ءدىلناز قۋانىشبەكوۆا, گۇلشەكەر سۇلەيمەنوۆا سىندى ستۋدەنتتەردەن جاساقتالعان توپ جەڭىپ الدى. تاڭ الاگەۋىمدە جەتەكشىلەرىمەن بىرگە زەرەندى ولكەسىندە ارقان بويى كوتەرىلگەن قىزىلشاقا كۇننىڭ ارايلى ءساتىن فوتومەن ورنەكتەگەن توپتىڭ ەڭبەگىن قازىلار القاسى جوعارى باعالادى.
«Zerendi Photo Fest» فەستيۆالى الداعى ۋاقىتتا دا جالعاسىن تابادى.
