قازاقشا كيىمدەگى ەتنو قۋىرشاقتار رەسەيدىڭ كيروۆ قالاسىندا ءبىرشاما ۋاقىتتان بەرى شىعارىلادى. بۇگىندە قامزول مەن ساۋكەلە كيگەن قىز بەن شاپان, تاقيا كيگەن ۇل قۋىرشاقتار رەسەي دۇكەندەرىندە سۇرانىسقا يە. مۇنىڭ دالەلى, كوپتەگەن دۇكەننەن قازاقى كيىم كيگەن قۋىرشاقتاردى كەزدەستىرۋگە بولادى.
– فابريكامىزدان ءبىر عانا قازاق ۇلتتىق كيىمىندەگى قۋىرشاقتار ەمەس, وزگە ۇلتتاردىڭ كيىم ۇلگىسىندەگى ونىمدەردى دە شىعارىپ وتىرمىز. قازىرگى تاڭدا قىزۋ جۇمىس جالعاسىن تاۋىپ, كيىمدەردىڭ ءتۇر-ءتۇسى مەن تۇتىنىلاتىن ماتالارعا ازداپ وزگەرىس ەنگىزدىك. «ەتنو» اتتى توپتامامىزعا وزگە ەلدەردىڭ مادەني احۋالىمەن تانىسۋعا, ولارمەن دوستىق قارىم-قاتىناستى نىعايتۋعا باعىتتالعان وقىتۋ جۇيەسى بولعاندىقتان, ارنايى بالاباقشالاردان سۇرانىس كوپتەپ ءتۇسىپ وتىر. ارينە, بالالار ءۇشىن قۋىرشاقتار ارقىلى وزگە ەلدىڭ ءداستۇرى مەن مادەنيەتىنە قانىعۋ الدەقايدا تيىمدىرەك ەكەنى داۋسىز, – دەيدى ويىنشىقتار فابريكاسىنىڭ جەتەكشىسى تاتيانا كاشينا.
فابريكادان شىعاتىن ارنايى 400-گە جۋىق قۋىرشاق تۇرلەرى بولسا, ولار ارقىلى 30-عا تارتا ۇلتتىق كيىم ۇلگىلەرى ناسيحاتتالىپ وتىر. جىلىنا وندىرىستەن ميلليونعا جۋىق ءونىم شىعىپ, تۇتىنۋشىلاردىڭ قىزىعۋشىلىعى ارتا ءتۇستى. ونىڭ ىشىندە «ەلي» مەن «مارات» اتالاتىن قازاقشا كيىنگەن قۋىرشاقتاردىڭ بەينەسى جاقىندا عانا تۇبەگەيلى جاڭارۋدان وتكەن.
قۋىرشاقتار فابريكاسىنىڭ باس ديرەكتورى ولگا دوروتيۋك ۇلتتىق قۇندىلىقتاردىڭ ماڭىزىن اتاپ ءوتتى.
– قازاقشا قۋىرشاقتارعا قىزىعۋشىلىق بىلدىرۋشىلەر ءۇشىن جاقىندا جاڭا توپتامامىزدىڭ تۇساۋكەسەر ءراسىمىن وتكىزدىك. ولاردىڭ ەرەكشەلىگى – قازىرگى زاماناۋي ۇلتتىق كيىم ۇلگىلەرىمەن جابدىقتالعان. ەلىمىزدە قازاق, وزبەك, كاۆكاز حالىقتارى مول بولعاندىقتان, ونىمدەرىمىز ورىس حالقىنا جانە بالالار اراسىندا كەڭىنەن تانىمال, – دەيدى ول.
فابريكادا جاڭا ۇلگىدەگى ونىمدەردى بەزەندىرۋگە سۋرەتشىلەر مەن ارنايى ديزاينەرلەر جۇمىس جاساپ وتىر. ءداستۇرلى قازاقشا كيىمدەگى قۋىرشاقتارعا سۇرانىس وسكەندىكتەن, بۇگىندە زاماناۋي ۇلگىدەگى ونىمدەردىڭ سانى ارتىپ كەلەدى.
