كەشكە اقىن, مەملەكەتتىك سىيلىقتىڭ لاۋرەاتى عالىم جايلىباي, اكادەميك ءۋاليحان قاليجان, ادەبيەتتانۋشى باۋىرجان وماروۆ, انشىلەر ايتبەك نىعىزباەۆ, گۇلميرا سارينا, بەلگىلى كۇيشى جانعالي ءجۇزباي جانە ەلوردالىق زيالى قاۋىم وكىلدەرى قاتىستى.
كەشتىڭ القيسساسى ۋنيۆەرسيتەت ستۋدەنتتەرىنىڭ اقىن ولەڭدەرىن جاتقا وقۋىمەن اشىلدى. «دومبىرا», ء«ۇش تال ۇكى», «الاشا», «قولتاڭبا» سىندى ورەلى ولەڭدەر وقىرمان قاۋىمنىڭ ىقىلاسىنا بولەندى.
اقىن عالىم جايلىباي قالامگەرگە ارناۋ جىرىن وقىدى.
– باۋىرجانداردىڭ بۋىنى ادەبيەتكە ۇلكەن تولقىن بولىپ كەلدى. باۋىرجان وماروۆ بۇل بۋىن تۋرالى جاقسى جازىپ ءجۇر. باۋىرجان جاقىپ – ءوز الەمى, ءوز بولمىسى, تابيعاتى بار اقىن. جاڭا وقىلعان «الاشا», ءۇش تال ۇكى» سىندى ولەڭدەر ۇلت پوەزياسىنىڭ جەتىستىگى دەپ ايتار ەدىم,–دەدى ول.
بەلگىلى جۋرناليست, عالىم باۋىرجان وماروۆ ستۋدەنتتىك شاقتاردى ەسكە الىپ, اقىن دوسىنىڭ جىرىن جاتقا وقىعاندا كورەرمەن قاۋىم ريزالىقپەن قول سوقتى.
ء«بىزدىڭ كەزدەگى ستۋدەنتتەردىڭ ءبارى وقۋعا ولەڭ جازىپ كەلەتىن. باسەكەلەستىك وتە جوعارى ەدى. سۆەتقالي نۇرجان, باۋىرجان ۇسەنوۆ, نۇرلان ماۋكەن ۇلى, گۇلنار سالىقباي, باۋىرجان جاقىپ سىندى اقىندار جىر جازاتىن. باۋىرجان جاقىپ بارلىق جاس اقىندار سەكىلدى اۋەلى ماحاببات ليريكاسىنان باستادى, ءتۇرلى ەكسپەريمەنتتەرگە باردى. ول جىرلار الماتىنىڭ سول كەزدەگى اۋاسى سىندى تاپ-تازا, ءمولدىر بولاتىن», – دەدى ب.وماروۆ.
سۇراق-جاۋاپ فورماتىندا وتكەن كەشتە ارقيلى ساۋالدار قويىلىپ, اقىننىڭ ولەڭىمەن بىرگە ومىرىنەن قىزىقتى سىرلار اقتارىلدى. باۋىرجان اقىن جاقىندا ومىردەن وتكەن اقىن اعاسى نەسىپبەك ايت ۇلىن قايعىرا ەسكە الىپ, ونىڭ قازاق پوەزياسىنداعى بيىك ورىنى تۋرالى ايتتى. الدىڭعى بۋىن اعالارىمەن بىرگە سوڭىنان ەرگەن ىنىلەرىنىڭ اتىن اتاپ, زور ءۇمىت كۇتەتىنىن جەتكىزدى.
كەش سوڭىندا اقىن ۋنيۆەرسيتەت كىتاپحاناسىنا كەيىنگى كەزدەرى شىققان بەس كىتابىن سىيعا تارتسا, رەكتور ەرلان سىدىقوۆ اقىنعا ۋنيۆەرسيتەتتىڭ ەڭ جوعارى ماراپاتى «كۇلتەگىن» مەدالىن تاعىپ, قۇرمەت كورسەتتى.
