ەلوردامىزدا 3 قازاندا شۋشا كۇندەرىنە ارنالعان مەرەكەلىك كەش ءوتتى. كەشتە قالانىڭ تاريحي ءھام رۋحاني ماڭىزىنا نازار اۋدارىلىپ, ازەربايجان مادەنيەتى جونىندە ءسوز قوزعالدى. ءىس-شاراعا حالىقارالىق تۇركى قورلارىنىڭ قىزمەتكەرلەرى, تۇركسوي ۇيىمى, قازاقستانداعى تۇركيا, ازەربايجان, ماجارستان ەلشىلىكتەرىنىڭ وكىلدەرى قاتىستى.
مەرەكەلىك كەشتە ءسوز العان مادەنيەت جانە اقپارات مينيسترلىگى مادەنيەت كوميتەتىنىڭ توراعاسى كۇمىس سەيىتوۆا شۋشا قالاسىنىڭ مادەني كەلبەتىنە توقتالدى.
– ءبىز تۇركى الەمىنىڭ مادەني استاناسى شۋشا قالاسىنىڭ ەلوردامىزداعى كۇندەرىندە باس قوسىپ وتىرمىز. شۋشا ءاۋ باستان ازەربايجاننىڭ مادەني-قوعامدىق ساياسي ءومىرىنىڭ ماڭىزدى ورتالىقتارىنىڭ ءبىرى, يسلام وركەنيەتىنىڭ ءرامىزى. وندا مۇرتازا مامەدوۆ, ناتاۆان حۋرشيدبانۋ سەكىلدى ونەر ساڭلاقتارى دۇنيەگە كەلگەن. باۋىرلاس قازاق-ازەربايجان اراسىنداعى مادەني ىنتاماقتاستىق بايلانىس كۇن ساناپ نىعايىپ كەلەدى, – دەدى ول.
سونىمەن بىرگە حالىقارالىق تۇركى مادەنيەتى مەن مۇراسى قورىنىڭ پرەزيدەنتى گيۋناي ەفەنديەۆا تۇركى بىرلىگىن نىعايتۋعا ارنالعان مەرەكەنىڭ كەلەلى تۇسىن اتاپ ءوتتى.
– بىلتىر تۇركى مادەنيەتى مەن مۇراسىنىڭ حالىقارالىق قورى اتىنان شۋشا كۇندەرىنىڭ ءوتۋى تۋرالى ۇسىنىسىمىزدى بىلدىرگەن بولاتىنبىز. مەرەكەلىك ءىس-شارا بۋرسادان باستاۋ الىپ, تاشكەنتتە جالعاسىن تاپتى. مىنە, بۇگىن استانا قالاسىندا وتكەنىنە كۋا بولىپ وتىرمىز. ءبىرشاما كۇننەن سوڭ شۋشا كۇندەرى تۇرىكمەنستاندا جالعاسپاق, مۇنداي ءىس-شارالار تۇركى الەمىنىڭ اراسىن جاقىنداتىپ, حالىقتاردى بىرىكتىرە تۇسەدى, – دەدى ول.
مەرەكەلىك كەشتە تانىمال ۇلتتىق كيىمدەرى توپتاماسى كورسەتىلىپ, كورەرمەن كوزايىمىنا اينالدى. ۇلتتىق ناقىشتى كيىم ۇلگىلەرىندە ازەربايجاننىڭ باي تاريحي مۇراسى مەن جاڭا ۇلگىدەگى اشەكەيلەرى كورىنىس تاپقان. مۇنان سوڭ تۇركى ەلدەرى ونەرپازدارىنان قۇرالعان «جەتى سۇلۋ» توبى ونەرلەرىن كورسەتىپ, ابايدىڭ «كوزىمنىڭ قاراسى» ءانىن ورىندادى.
جيىنعا سەنات دەپۋتاتى دارحان قىدىرالى, تۇركيانىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋ, ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى اتالار اتاموگلانوۆ, باسقا دا زيالى قاۋىم وكىلدەرى قاتىستى.
مەرەكەلىك شارا اياسىندا شۋشا قالاسىنىڭ تۇمسا تابيعاتى مەن تاريحي كەلبەتى, بۇگىنگى ايبىندى بەدەرى بەينەلەنگەن سۋرەتتەر كورمەسى تانىستىرىلدى.
