«استانا وپەرادا» 29-30 قىركۇيەكتە جانە ءبىرىنشى, ءۇشىنشى قازاندا گەرمان لەۆەنسكولدتىڭ «سيلفيدا» بالەتىنىڭ پرەمەراسى وتەدى.
ارمان مەن شىندىقتىڭ, اقيقات پەن قيالداعى ءومىردىڭ شارپىسۋى تۋرالى قويىلىمنىڭ كورەرمەنگە بەرەرى مول.
– گەرمان لەۆەنسكولدتىڭ «سيلفيدا» بالەتىنىڭ پرەمەراسى ەلىمىزدىڭ باس ساحناسىندا بولعالى جاتىر. «سيلفيدا» بالەتىمەن بىرگە رومانتيزم ءداۋىرى كەلدى. ءبىرىنشى پرەمەراسى 1832 جىلى پاريجدەگى گراند-وپەرا تەاترىندا بولدى. دانيالىق بالەتمەيستەر ا.ءبۋرنونۆيلدىڭ ارقاسىندا وسىناۋ اڭىزعا اينالعان بالەت ءبىزدىڭ زامانىمىزعا جەتتى. بالەت تولىعىمەن ءبۋرنونۆيلدىڭ ستيلىنەن, شوتلانديانىڭ مادەنيەتىنەن تۇرادى. ءوز جاعىمىزدان وسى ستيل مەن مادەنيەتتى كورسەتۋگە قىزۋ جۇمىس ءجۇرىپ جاتىر, – دەدى «استانا وپەرا» ءسوليسى سەرىك ناقىسبەكوۆ.
«استانا وپەرا» تەاترىنىڭ ءسوليسى شۇعىلا ادەپحان باستى پارتيانى ورىنداۋداعى «سيلفيدا» بالەتىنىڭ ەرەكشەلىگىن اتاپ ءوتتى.
– بۇل بالەتتە ءتىپتى سەكىرۋدىڭ ءوزى باسقا بالەتتەردەگى سەكىرۋلەرگە ۇقسامايدى. وندا قوزعالىس پوەتيكاسى, الدەبىر سالماقسىزدىق كورىنىس تابۋى قاجەت. سوندا كورەرمەن سەنىڭ عاجايىپتان تۋعان تىرشىلىك يەسى ەكەنىڭدى تۇسىنەدى. مەن ءۇشىن بالەتتىڭ دراماتۋرگياسىن ءتۇسىنۋ, ءوزىمدى باسقا رولدە بايقاپ كورۋ, جان-جاقتى اشىلۋ وتە ماڭىزدى بولدى. ىشكى جان دۇنيەمە قىزىقتى ساياحات جاساعاندايمىن, – دەدى ول.
