ءيا, قايبىر قالامگەر بولسىن, ەڭ الدىمەن, «ادام جانىنىڭ ينجەنەرى». ەڭ ءبىرىنشى, ءوز جانىنىڭ زەرتتەپ زەردەلەۋشىسى.
اقىن بوپ ءومىر كەشىرۋ وڭاي دەيمىسىڭ, قاراعىم,
اۋزىندا بولۋ بۇل ءوزى سىزداعان بارلىق جارانىڭ.
كوكىرەگىڭە قۇيىپ اپ الەمنىڭ اسقاق بار ءانىن,
قوسۋدىڭ ارپالىسى بۇل –
توعىسپاس جولدار تورابىن.
ايبەرگەنوۆ شۋماعىنىڭ سىرى, ارپالىسقا تولى ءومىرىنىڭ كولەڭكەسى كۇندەلگىنەن قىلاڭ بەرەدى. ءتىپتى باسقا قىرىنان كورىنەدى. كۇندەلىگىنىڭ العاشقى پاراعىندا ءبۇي دەيدى: «وزگەگە قالاي كورىنەتىنىن بىلمەيمىن, مەن ءۇشىن ويلانۋ مەن قيالعا بەرىلۋ بۇكىل ءومىرىمنىڭ باس قىزىعىنداي سانالادى. وسى از ءومىرىم ىشىندە ويلانىپ وتكىزگەن ۋاقىتتارىمدى ءوز مىندەتىن اتقارىپ وتكەن, سانالى وتكەن, داڭقتى وتكەن ۋاقىت دەپ ەسەپتەيمىن». تولەگەن پوەزياسىنىڭ ايشىقتى تۇسى, انىق تۇسى – ويشىلدىققا مالىنعان ورەن جىرلار. ماسەلەن, ورمانعا ساپار كەزىندە جازىلعان ولەڭىن الىپ كورەلىك.
ورمان ءىشى كوز تۇنادى جارىسا وسكەن اعاشتان,
ءبىرى الاسا, ءبىرى بيىك ءبارى كوككە تالاسقان.
...مەن ويلايمىن ورماندا كەي قيسىق
وسسە بايتەرەك,
قيسىقتى دا ءتۇزۋ دەپ ءبىز قابىلدار ما ەك,
قايتەر ەك.
ەگەر دە سەن تۋرالىقتى جەڭسىن دەسەڭ الەمدە,
وزگەلەردىڭ قيسىقتىعىن ءتۇزۋ تۇرىپ دالەلدە!
مىنە, بۇل اقىننىڭ پالساپالىق تولعامى, ءار قۇبىلىسقا تەك وزىنشە باعا بەرۋى. جالعىزدىعى اتىنان جالپاق عالامعا سىر شاشىپ, ءبىردىڭ ميلليونعا ءۇن قاتۋى.
كۇندەلىكتە قىسقا عانا تۇيىندەر, سانا تۇكپىرىنەن جالت ەتكەن اق الماس ويلار مەن شيىرشىق اتقان بايلامدار بار. ولار ءار جەردە شاشىلىپ جاتقان كۇمىس تەڭگەلەر ىسپەتتى. «كەشىرىمدىلىك – ءومىر كورگەندىكتىڭ بەلگىسى. ءومىر كورمەگەن ادام ەشقاشان كەشىرىمدى بولا المايدى». «كوپ ادام ۇلىلىقتى, دارىندى داتتاۋعا قۇمار. ويتكەنى ولار وزدەرىن دە «دالاعا تاستاعىسى» كەلمەيدى». «كەي ادامدار سەنىمەن العاش تانىساردا «قۇدايداي» قۇرمەت تۇتىپ كەلەدى دە, سەن ونىمەن بۇكپەسىز اشىق ەكى-ءۇش ساعات سويلەسكەننەن كەيىن بايىپتىلىقتان وزگەرمەگەنىڭە قاراماي, سەنى «الىنعان قامال» سياقتاندىرادى دا ارتىق سىرلاسۋعا زاۋقى بولمايدى. ومىردە مۇنداي ادامدار بار. ونى بىلىمسىزدىگى ءۇشىن تەك اياۋ عانا كەرەك».
بىردە شاعىرماق ويلاردىڭ ىشىندە جانعا سونشالىق ەتەنە جاقىن, ءوز باسىڭنان كەشىرگەندەي ءىز قالدىراتىن سوزدەر بار. ەشقاشان مۇقالماس, مايىرىلماس اق ادال سەنىم, ادامعا قۇلاي بەرىلۋ بار. «ادامعا شەكسىز بەرىلۋ, قالتقىسىز ماحاببات كۇلكى بولارلىق جەڭىلدىككە اپارىپ, ادامدى, ونىڭ ۇلى تۇلعاسىن مازاق تا ەتەدى», دەيدى اقىن. شىنىندا, كەيدە اق جۇرەگىڭدى قولعا ۇستاپ الا بارساڭ «قۇشاقتاپ تۇرىپ قابىرعاڭدى سانايتىن», اڭقىلداق بولمىسىڭدى كەلەكەگە اينالدىرار كۇيكى پەندەلەر كەزىگەدى. جالقىنىڭ جالپى الدىندا وعاش كورىنۋى, اۋمەسەر, اۋىش اتانۋى دا لەزدە. وزىنە ۇقساماعاندى كەشىرە الماس وركوكىرەك مىنەزدەر, كوك ەشكىنى مۇيىزدەيتىن كوپ ەشكى قاي ۋاقىتتىڭ دا كوگىلجىم سۋرەتىندە بار.
كۇندەلىكتە شەتەلدىك ەكى قالامگەردىڭ ەسىمى كەزىگەدى. ءبىرى – دانىشپان بايرون, ءبىرى – جازۋشى ماكسيم گوركي. «چايلد گارولدتىڭ ساپار شەگۋى» داستانىنداعى ءداۋىردىڭ كوكەيكەستى ماسەلەلەرىن ءسوز ەتكەن اقىن, داستاندى تۇپنۇسقادا ەركىن وقىپ سۋسىنداي الماعانىنا قاپالانادى. ماكسيم گوركيدىڭ ادام تاعدىرىن وقىرمان الدىنا جايىپ تاستاپ, ءزارلى شىندىقتى ادال كوڭىلمەن اقتارا ايتا الاتىنىنا ءتانتى بولادى.
ايبەرگەنوۆ كۇندەلىگى – ءتۇيسىنۋ تەرەڭىنە, سەزىنۋ سەلەۋىنە, ءومىر بۇلاعىنا تولى. اقىن تۇيمەدەي بەلگىدەن ءزاۋلىم پىكىر تۇيەدى, تامشىداي زاتتان تەرەڭ وي تابادى. ءسىرا, تالانتتىڭ ءبىر قىرى كەز كەلگەن دۇنيەنى وزىنشە سارالاي ءبىلۋ بولسا كەرەك.
