ساناۋلى ساعاتتار ىشىندە ەل تۇرعىندارى زەينەتاقى جيناقتارىنداعى قاراجاتىن اۋدارىپ الا الادى. سەبەبى ەلىمىزدە 5 ماۋسىمنان باستاپ زەينەتاقى شوتتارىنداعى جەتكىلىكتىلىك شەكتەرىن ەسەپتەۋدىڭ جاڭا ادىستەمەسى كۇشىنە ەنەدى, دەپ حابارلايدى Egemen.kz.
بۇعان دەيىن پرەمەر-مينيستر ولجاس بەكتەنوۆ زەينەتاقى جيناعىن پايدالانۋ شەگىن انىقتاۋ ادىستەمەسىن وزگەرتۋ تۋرالى قاۋلىعا قول قويعان بولاتىن. جاڭا ەرەجەگە سايكەس, زەينەتاقى شوتىندا قالۋعا ءتيىس ەڭ تومەنگى سوما ايتارلىقتاي ارتۋى مۇمكىن. بۇل ءوز كەزەگىندە ازاماتتاردىڭ زەينەتاقى جيناقتارىن الۋ مۇمكىندىگىن شەكتەيدى.
مامانداردىڭ ايتۋىنشا, جاڭا ءتارتىپ ەنگىزىلگەنگە دەيىن سالىمشىلار شەكتى مولشەردەن اسقان قاراجاتىن پايدالانۋ ءۇشىن ءوتىنىش بەرە الادى. ول ءۇشىن ءوتىنىشتى enpf-otbasy.kz پلاتفورماسى ارقىلى 5 ماۋسىمعا دەيىن تاپسىرۋ قاجەت.
بۇرىنعى ەسەپتەۋ جۇيەسى ازاماتتىڭ بولاشاق جارنالارىن ەسكەرۋگە نەگىزدەلسە, جاڭا ءتاسىل زەينەتكە شىققاننان كەيىن ءومىر بويى تولەنەتىن تولەمدەردى قامتاماسىز ەتۋگە قاجەتتى سومانى ەسەپتەۋگە باعىتتالعان.
ەسەپتەۋ كەزىندە ينۆەستيتسيالىق تابىستىلىق, جىل سايىنعى يندەكساتسيا, ازاماتتىڭ جاسى, ءومىر ءسۇرۋ ۇزاقتىعى جانە زەينەتاقى الۋ مەرزىمى سياقتى فاكتورلار ەسكەرىلەدى.
ەسكە سالا كەتەيىك, بۇعان دەيىن زەينەتاقىدان اقشا الۋ قيىنداۋى مۇمكىن ەكەندىگىن جازعان بولاتىنبىز.