حالىقارالىق بالالاردى قورعاۋ كۇنىنە وراي مانەرلەپ سىرعاناۋدان الەم چەمپيوناتىنىڭ جۇلدەگەرى, سپورتشى ميحايل شايدوروۆ ەرەكشە قايىرىمدىلىق اكتسياسىن ۇيىمداستىردى, دەپ حابارلايدى Egemen.kz.
سپورتشى الماتى قالاسىنداعى №3 بالالار مەن جاسوسپىرىمدەر سپورت مەكتەبىندە جاتتىعاتىن جاس سپورتشىلارعا قولداۋ كورسەتىپ, سپورتتىق جابدىقتار ساتىپ الۋعا ارنالعان سەرتيفيكاتتار تابىستادى. قايىرىمدىلىق كومەكتىڭ جالپى كولەمى 6 ميلليون تەڭگەنى قۇرادى.
30 جاس سپورتشىنىڭ ارقايسىسىنا 200 مىڭ تەڭگەلىك سەرتيفيكات بەرىلگەن. بۇل قاراجات بالالاردىڭ قاجەتتى سپورتتىق قۇرال-جابدىقتار الۋىنا مۇمكىندىك بەرەدى.
ءوز سوزىندە ميحايل شايدوروۆ وسكەلەڭ ۇرپاقتى قولداۋدىڭ ماڭىزىن اتاپ ءوتتى.
«قولداۋ بىلدىرگەن بارشاڭىزعا العىس ايتامىن. بالالارعا قۋانىش سىيلاپ, ولاردىڭ ءوز كۇشىنە دەگەن سەنىمىن ارتتىرا العانىما قۋانىشتىمىن», دەدى سپورتشى.
ايتا كەتەيىك, بۇعان دەيىن ميحايل شايدوروۆ اقپان ايىنان بەرى جالاقى الماعانىن مالىمدەگەن بولاتىن. كەيىن بۇل ماسەلەگە قاتىستى تۋريزم جانە سپورت مينيسترلىگى تۇسىنىكتەمە بەرىپ, سپورتشىعا جاڭا كەلىسىمشارت ۇسىنىلعانىن حابارلاعان ەدى.
وليمپيادا چەمپيوندارى دا ميحايل شايدوروۆ توڭىرەگىندەگى داۋعا بايلانىستى پىكىر ءبىلدىردى.