شىمكەنتتە قازا تاپقان نۇراي سەرىكبايدىڭ ولىمىنە قاتىستى قىلمىستىق ءىستى تەرگەۋ ماۋسىم ايىندا اياقتالىپ, ءىس ماتەريالدارى سوتقا جىبەرىلەدى. بۇل تۋرالى سەنات كۋلۋارىندا ىشكى ىستەر ءمينيسترىنىڭ ءبىرىنشى ورىنباسارى سانجار ءادىلوۆ مالىمدەدى, دەپ حابارلايدى Egemen.kz.
ەسكە سالساق, قايعىلى وقيعا 11 قاڭتاردا بولعان. بەينەباقىلاۋ كامەرالارى كۇدىكتىنىڭ نۇرايدى اڭدىپ, كەيىن پىشاق جاراقاتىن سالعانىن تىركەگەن. 13 قاڭتاردا 28 جاستاعى كۇدىكتى قالادان شامامەن 10 شاقىرىم جەردە ۇستالدى.
مارقۇمنىڭ تۋىستارىنىڭ ايتۋىنشا, وقيعاعا دەيىن قىز بىرنەشە اي بويى قۋدالاۋعا ۇشىراعان. سونداي-اق وعان قاتىستى قىز الىپ قاشۋ ارەكەتى بولعانى ايتىلدى. وتباسى پوليتسياعا بىرنەشە رەت جۇگىنگەنىمەن, ارىزدارىنىڭ تىركەلمەگەنىن مالىمدەگەن.
وقيعادان كەيىن مەملەكەت باسشىسى قاسىم-جومارت توقاەۆ قۇقىق قورعاۋ ورگاندارىنىڭ ارەكەتىنە باعا بەرۋدى تاپسىردى. كەيىن شىمكەنت قالالىق پوليتسيا دەپارتامەنتىنىڭ باسشىسى قىزمەتىنەن بوساتىلىپ, ارىزدى تىركەمەگەن قىزمەتكەرلەرگە قاتىستى سالعىرتتىق فاكتىسى بويىنشا قىلمىستىق ءىس قوزعالدى.
ءساۋىر ايىندا كۇدىكتى الماتى وبلىسىنداعى اقتاس اۋىلىنداعى مامانداندىرىلعان پسيحياتريالىق اۋرۋحاناعا اۋىستىرىلدى. وعان قاتىستى بىرقاتار ساراپتاما تاعايىندالىپ, مەديتسينالىق باقىلاۋ جۇرگىزىلگەن.
مارقۇمنىڭ تۋىستارى كۇدىكتىنىڭ پسيحيكالىق دەرتتى سىلتاۋ ەتىپ, جاۋاپكەرشىلىكتەن جالتارۋى مۇمكىن ەكەنىنە الاڭداۋشىلىق بىلدىرگەن بولاتىن. تەرگەۋ اياقتالعاننان كەيىن ءىستىڭ ءمان-جايىنا سوتتا قۇقىقتىق باعا بەرىلەدى.