قاراعاندى وبلىسىنىڭ قارقارالى اۋدانىندا قامقورشىلىققا الىنعان بالالارعا قاتىگەزدىك كورسەتتى دەپ ايىپتالعان پەداگوگتار وتباسىنا قاتىستى سوت ۇكىمى شىقتى, دەپ حابارلايدى Egemen.kz.
تەرگەۋ دەرەكتەرىنە سايكەس, ەرلى-زايىپتىلار بىرنەشە جىل بويى قامقورلىققا العان بالالاردى اۋىر جۇمىسقا جەگىپ, مال باقتىرعان. اسىراپ الىنعان بالالاردىڭ بولماشى قاتەلىگى ءۇشىن ۇرىپ-سوققان. ولارعا كوڭ ارالاسقان نان جەگىزىلىپ, ءيتتىڭ ۇيشىگىندە ۇيىقتاۋعا ماجبۇرلەنگەن.
دارىگەرلەردىڭ قورىتىندىسى بويىنشا, بالالاردىڭ ءبىرىنىڭ دەنەسىنەن 19 تىرتىق, ال ەكىنشىسىنەن 47 تىرتىق انىقتالعان. جابىرلەنۋشىلەردىڭ ءبىرى بۇعان دەيىن سوتتا ءوزىن كىلەمگە وراپ, ۇستىنەن سەكىرگەندەرىن, سونىڭ سالدارىنان ەسىنەن تانىپ قالعانىن ايتقان. وسى وقيعادان كەيىن بالاعا باسىنان بىرنەشە وپەراتسيا جاساۋعا تۋرا كەلگەن, كەيىن وعان مۇگەدەكتىك بەرىلگەن.
«ساراپشىلاردىڭ قورىتىندىسىنا سايكەس, كامەلەتكە تولماعان بالا بۇعان دەيىن قانداي دا ءبىر پسيحولوگيالىق اۋرۋعا شالدىقپاعان. ال وسى وقيعالاردان سوڭ بالادا پسيحيكالىق بۇزىلىس بايقالعان», دەدى پروكۋرور سوت وتىرىسىندا.
سوت شەشىمىمەن ەر ادام 12 جىلعا, جۇبايى 10 جىلعا, ال قىزى 4 جىل 8 ايعا باس بوستاندىعىنان ايىرىلدى. ۇشەۋى دە سوت زالىندا قاماۋعا الىندى. سونىمەن قاتار سوت ءاربىر جابىرلەنۋشىگە 10 ميلليون تەڭگەدەن مورالدىق وتەماقى تاعايىندادى.
قاراعاندىلىق وتباسى وزدەرى اسىراپ العان بالالاردى ازاپتاپ كەلگەن
الايدا سوت ۇكىمى ازىرگە زاڭدى كۇشىنە ەنگەن جوق. ايىپتالۋشىلاردىڭ قورعاۋشىلارى اپەللياتسيالىق شاعىم تۇسىرەتىندەرىن مالىمدەدى.
ەسكە سالا كەتەيىك, بۇعان دەيىن اقمولا وبلىسىندا اسىراپ العان مۇگەدەك بالاسىن ۇرىپ-سوعىپ, قاتىگەزدىكپەن قورلاپ كەلگەن ايەلگە سوت ۇكىمى شىققان ەدى.