قاسىم-جومارت توقاەۆ قازاقستاندا بەرىك ورنىققان پرەزيدەنتتىك باسقارۋ ۇلگىسى التىن وردا كەزىندە قۇرىلعان ساياسي جۇيەدەن باستاۋ الاتىنىن ايتتى, دەپ حابارلايدى Egemen.kz.
«بۇدان بولەك, ءبىز جاڭا كونستيتۋتسيادا قازاق ەلىنىڭ ءتول شەجىرەسى ۇلى دالانىڭ مىڭداعان جىلدىق تاريحىمەن ساباقتاس ەكەنىن ايقىن كورسەتتىك.
ەلوردامىزدا ۇلى دالا وركەنيەتىنە ارنالعان ءزاۋلىم عيمارات سالىنادى. جاقىندا استانادا يۋنەسكو-نىڭ اياسىندا التىن وردا مۇراسىن زەرتتەۋ ىسىنە ارنالعان حالىقارالىق سيمپوزيۋم وتكىزىلدى. مۇنىڭ ءبارى مەملەكەتتىگىمىزدىڭ تۇعىرىن نىعايتا تۇسۋگە زور ىقپال ەتەدى», دەدى مەملەكەت باسشىسى.
مەملەكەت باسشىسى: تاۋەلسىزدىكتىڭ 35 جىلدىعىن ناقتى ناتيجەلەرمەن قارسى الۋىمىز كەرەك
پرەزيدەنتتىڭ ايتۋىنشا, التىن وردا ءوزىنىڭ باسقارۋ ينستيتۋتتارى, ديپلوماتيالىق قىزمەتى, بايلانىس جانە كەدەن جۇيەسى, الەمدە مويىندالعان ۆاليۋتاسى, وزىق يننوۆاتسيالارى بار ورتا عاسىرداعى الىپ ەل بولدى.
«قازىر قازاقستاندا بەرىك ورنىققان پرەزيدەنتتىك باسقارۋ ۇلگىسى التىن وردا كەزىندە قۇرىلعان ساياسي جۇيەدەن باستاۋ الادى. التىن وردانىڭ ەڭ باستى مۇراسى – ونىڭ مىزعىماس قۇندىلىقتارى. سەبەبى الىپ مەملەكەتتە ءدىنى, ءتىلى, مادەنيەتى, ءداستۇرى بولەك ادامدار ورتاق ەرەجەلەر اياسىندا تاتۋ-ءتاتتى ءومىر ءسۇردى. بابالارىمىزدىڭ وسىنداي تاعىلىمدى جولى ءبىز ءۇشىن وشپەس ونەگە جانە باستى ستراتەگيالىق باعدار بولىپ قالا بەرەدى.
التىن وردانىڭ جەتىستىگى ەۋرازياداعى كوپتەگەن حالىقتىڭ ورتاق يگىلىگى سانالادى. سوندىقتان ۇلىق ۇلىستىڭ مۇراگەرى رەتىندە ءبىز ەۋرازيانىڭ بىرتۇتاستىعىن, ءوسىپ-وركەندەگەنىن, ونداعى مەملەكەتتەردىڭ بارلىعى تاتۋ-ءتاتتى عۇمىر كەشىپ, ورتاق قاۋىپسىزدىكتى ساقتاپ, حالىقتارىنىڭ يگىلىگى ءۇشىن قىزمەت ەتكەنىن قۇپتايمىز.
ءبىزدىڭ ماقساتىمىز – وزگەلەردىڭ تاپتاۋرىن بولعان تاجىريبەلەرى مەن يدەيالارىن ۇلگى-ونەگە ەتپەۋ, ونبەيتىن داۋ-دامايدان بويدى اۋلاق سالۋ. سونىمەن بىرگە وتكەن ۇلى ءداۋىردىڭ قۇندىلىقتارىن وي ەلەگىنەن وتكىزىپ, ساپالى تۇردە جاڭعىرتىپ, زاماناۋي وركەنيەتكە قاراي بەيىمدەۋ», دەدى مەملەكەت باسشىسى.
قازاقستان تاريحىنىڭ ءبىر تومى تۇگەلدەي التىن وردا تاقىرىبىنا ارنالدى
ايتا كەتەيىك, بۇگىن قاسىم-جومارت توقاەۆ ەلورداداعى «اتامەكەن» ەتنومەموريالدى كەشەنىندە وتكەن مەملەكەتتىك تۋ كوتەرۋ راسىمىنە قاتىستى. مەملەكەت باسشىسى تاياۋ ارادا ۇكىمەت مەملەكەتتىك رامىزدەردى ورىندى پايدالانۋ ماسەلەسى بويىنشا قاۋلىعا قاجەتتى تۇزەتۋلەردى ەنگىزەتىنىن اتاپ ءوتتى.