تۇركىستان وبلىسىندا بالالاردى قورعاۋ كۇنى قارساڭىندا قايعىلى وقيعا بولعان. كەلەس اۋدانىنداعى وشاقتى كانالىندا اعالى-ءىنىلى ەكى بالا سۋعا كەتىپ, قازا تاپتى. قۇتقارۋشىلار 8 جاستاعى يۋسۋفاحمەت پەن 13 جاستاعى دياستى تاۋلىككە جۋىق ۋاقىت ىزدەدى, دەپ حابارلايدى Egemen.kz.
بەلگىلى بولعانداي, بالالاردىڭ ءمايىتى كانالدىڭ ءارتۇرلى تۇسىنان تابىلعان.
جەتى بالانىڭ اناسى ايگۇل تاماشەۆا قاۋىپتى كانالدىڭ جاعاسىن قورشاۋدى تالاپ ەتتى. وقيعا بولعان كۇنى بالالاردىڭ اتا-اناسى جۇمىسقا كەتكەن, ال باۋىرلارىنا ۇلكەن اپكەسى قاراپ قالعان.
تۇرعىنداردىڭ سوزىنشە, وشاقتى كانالىندا مۇنداي قايعىلى جاعداي العاش رەت بولىپ وتىرعان جوق. بۇعان دەيىن دە بالالار سۋعا كەتىپ, ادام شىعىنى تىركەلگەن. اۋىل تۇرعىندارى كانالدىڭ قورشالماعانىن جانە ەسكەرتۋ بەلگىلەرىنىڭ جوقتىعىن ءجيى ايتىپ كەلەدى.
كەلەس اۋداندىق اكىمدىگى كانال بويىنا قورشاۋ ورناتۋ جۇمىستارى بۇعان دەيىن جوسپارلانعانىن جانە قازىر ونىڭ باستالعانىن حابارلادى. الايدا بۇل شارالار قوس بىردەي بالاسىنان ايىرىلعان وتباسى ءۇشىن كەش قولعا الىنعان شەشىم بولدى.
قايعىلى وقيعادان كوز جۇمعان يۋسۋفاحمەت ەكىنشى سىنىپتى, ال دياس التىنشى سىنىپتى اياقتاعان ەدى. ەكى اعايىندى 1 ماۋسىم – بالالاردى قورعاۋ كۇنى جەر قوينىنا تاپسىرىلدى.
ايتا كەتەيىك, اقمولا وبلىسىندا تىيىم سالىنعان اۋماققا شومىلۋعا بارعان ون جاستاعى بالا سۋعا باتىپ, كوز جۇمدى.
قاراعاندىداعى فەدوروۆ سۋ قويماسىندا ءۇندىستاننان كەلگەن ەكى ستۋدەنت سۋعا باتىپ كەتتى.
قوستانايدا 15 جاستاعى ءجاسوسپىرىم دوستارىمەن باستەسىپ, سۋعا باتىپ, قايتىس بولدى.