مەملەكەتتىك رامىزدەر كۇنىنە وراي استاناداعى «بايتەرەك» مونۋمەنتى الاڭىندا ەرەكشە پاتريوتتىق ءىس-شارا ءوتتى. «استانا تازالىق» مەكەمەسىنىڭ 100-گە جۋىق قىزمەتكەرى باس قوسىپ, قازاقستان رەسپۋبليكاسىنىڭ مەملەكەتتىك ءانۇرانىن ورىندادى, دەپ حابارلايدى Egemen.kz.
ەلوردانىڭ تازالىعى مەن كوركەيۋىنە كۇن سايىن ۇلەس قوسىپ جۇرگەن كوممۋنالدىق قىزمەتكەرلەر بۇل باستاما ارقىلى مەملەكەتتىك رامىزدەرگە دەگەن قۇرمەتىن ءبىلدىردى. بۇگىندە كاسىپورىندا 1500-دەن استام ادام ەڭبەك ەتەدى.
ۇيىم وكىلدەرىنىڭ ايتۋىنشا, ءىس-شارانىڭ باستى ماقساتى – پاتريوتتىق رۋحتى نىعايتۋ, ەل بىرلىگىن دارىپتەۋ جانە ازاماتتىق جاۋاپكەرشىلىك قۇندىلىقتارىن ناسيحاتتاۋ.
«تازا سانا – تازا قالا» قاعيداتىن ۇستانعان مەكەمە قىزمەتكەرلەرى قالانىڭ تازالىعىن قامتاماسىز ەتۋمەن قاتار, قوعامدا وتانسۇيگىشتىك قۇندىلىقتاردى دارىپتەۋگە دە ەرەكشە ءمان بەرەدى.
ءىس-شارا سوڭىندا ۇجىم وتانداستارىمىزدى مەملەكەتتىك رامىزدەر كۇنىمەن قۇتتىقتادى.
ەسكە سالايىق, بۇگىن – مەملەكەتتىك رامىزدەر كۇنى. بۇل كۇن ەلىمىزدىڭ تاۋەلسىزدىگى مەن ەگەمەندىگىن ايقىندايتىن ەرەكشە مەرەكە.