الماتىدا 32 جاستاعى جۇكتى ايەل شۇعىل وتادان سوڭ كوز جۇمدى. دارىگەرلەر كەسار تىلىگىمەن نارەستەنى امان ساقتاپ قالۋعا تىرىسقانىمەن, كوپ ۇزاماي ەكەۋى دە باقيلىق بولعان, دەپ حابارلايدى Egemen.kz.
تۋىستارىنىڭ ايتۋىنشا, اننا ەفيمەنكو جۇكتىلىك كەزىندە تۇراقتى تەكسەرۋدەن ءوتىپ تۇرعاندىقتان, انا مەن بالا دەنساۋلىعىنا قاۋىپ توندىرەتىن ەلەۋلى ماسەلە انىقتالماعان. ايەلدىڭ جاعدايى ناشارلاعان سوڭ ول الدىمەن №2 قالالىق اۋرۋحاناعا, كەيىن №5 قالالىق اۋرۋحاناعا اۋىستىرىلعان.
«وعان دەيىن ءبارى قالىپتى بولدى. دارىگەرلەر تەكسەرىپ, بالانىڭ جاعدايىن باقىلاپ وتىردى. ەشقانداي قاۋىپ بايقالمادى. ال №2 پەرزەنتحانادا جارتى ساعاتتىڭ ىشىندە ۇلكەن ابىگەر باستالىپ, دارىگەرلەر جۇگىرىپ, تەلەفون سوعا باستادى», دەيدى مارقۇمنىڭ جۇبايى الەكسەي ەفيمەنكو.
دارىگەرلەر شۇعىل كەسار تىلىگىن جاساۋ تۋرالى شەشىم قابىلداعان. الايدا ءسابيدى امان الىپ قالۋ مۇمكىن بولمادى. وپەراتسيادان ءبىر تاۋلىك وتكەن سوڭ اننا ەفيمەنكونىڭ ءوزى دە قايتىس بولدى.
مارقۇمنىڭ اپكەسى الەنا گرادوۆيچ جاڭا تۋعان نارەستەنىڭ ولىمىنە قاتىستى دا تۇسىنىكسىز جايتتار بار ەكەنىن ايتتى.
«بالانىڭ قايتىس بولعانىن ءبىز تەك 5 مامىر كۇنى كەشكى ساعات التى شاماسىندا بىلدىك. ال مەديتسينالىق قۇجاتتا نارەستەنىڭ 5 مامىر كۇنى ساعات 08:12-دە كوز جۇمعانى كورسەتىلگەن. ءولىم سەبەبى رەتىندە گيپوكسيا جازىلعان, ال اۋىزشا سويلەسكەندە بىزگە اسفيكسيا تۋرالى ايتىلعان ەدى», دەدى ول.
الماتى قالالىق قوعامدىق دەنساۋلىق ساقتاۋ باسقارماسى سوت-مەديتسينالىق ساراپتاما اياقتالعانعا دەيىن وقيعانىڭ ەگجەي-تەگجەيى جاريالانبايتىنىن حابارلادى.
الماتىداعى №1 پەرزەنتحانا اقىرى ءسۇرىلىپ تىندى
قازىرگى ۋاقىتتا اتالعان جايتقا بايلانىستى مەديتسينالىق جانە فارماتسەۆتيكالىق باقىلاۋ كوميتەتىنىڭ دەپارتامەنتى تەكسەرۋ جۇرگىزىپ جاتىر.
ەسكە سالا كەتەيىك, بۇعان دەيىن الماتىدا انا ءولىمىن ءتيىستى ورگاندارعا ۋاقتىلى حابار بەرمەگەن مەديتسينالىق ۇيىمعا اكىمشىلىك ايىپپۇل سالىنعان ەدى.