پاۆلودارلىق مەكتەپ تۇلەگى ۇلتتىق بىرىڭعاي تەستىلەۋدەن رەكوردتىق 140 ۇپاي جينادى. ءالتايىر اسەت وبلىس ورتالىعىنداعى № 7 ورتا مەكتەپتى تامامداعالى وتىر.
ۇستازدارىنىڭ ايتۋىنشا, ءالتايىردىڭ ءبىلىم بايگەسىندەگى جەڭىستى جولى جىل بويعى تالپىنىسىنان انىق بايقالعان. قاڭتار ايىنداعى سىناما تەستىلەۋدە 123 ۇپاي جيناسا, ناۋرىز ايىندا ناتيجەسىن 131 ۇپايعا دەيىن كوتەرگەن. ال نەگىزگى سىناقتا ءوز مۇمكىندىگىن تولىق دالەلدەپ, ءابسوليۋتتى ناتيجە كورسەتتى. مۇنداي كورسەتكىشكە جەتۋ – كەز كەلگەن تالاپكەردىڭ ارمانى, ال وعان قول جەتكىزۋ – تەك ۇزدىكتەردىڭ ەنشىسىندەگى جەتىستىك.
ء«التايىر اسەت – بىلىمىمەن عانا ەمەس, جان-جاقتىلىعىمەن دە ەرەكشەلەنگەن دارىندى جاس. 2024–2025 وقۋ جىلىندا قالالىق جانە وبلىستىق «اباي وقۋلارىنا» قاتىسىپ, جۇلدەلى ورىنداردى يەلەندى. بۇعان قوسا اباي وبلىسىندا وتكەن رەسپۋبليكالىق كەزەڭدە ءى ورىندى جەڭىپ الىپ, ءوزىنىڭ ادەبيەتكە, ءسوز ونەرىنە دەگەن ەرەكشە قابىلەتىن دالەلدەدى», دەيدى №7 ورتا مەكتەپتەگى ۇستازدارى.
دارىندى تۇلەك عىلىم-ءبىلىم سايىستارىندا دا بيىكتەردەن كورىنگەن. «التىن تۇلەك» وليمپياداسىنىڭ قالالىق جانە وبلىستىق كەزەڭدەرىنىڭ ءى ورىن يەگەرى اتانىپ, ۇزدىك وقۋشىلار قاتارىنان تابىلدى. ال جالپى ءبىلىم بەرەتىن پاندەر وليمپياداسىندا ماتەماتيكا پانىنەن ءىىى ورىن الىپ, ايماق نامىسىن ابىرويمەن قورعادى.
ءالتايىر قازىرگى ۋاقىتتا استاناداعى ماقسۇت نارىك-باەۆ اتىنداعى ۋنيۆەرسيتەتتى تاڭداپ, «مەنەدجمەنت» ماماندىعىنا وقۋعا ءتۇسۋدى ۇيعارىپ قويىپتى. ول ءۇشىن اعىلشىن تىلىنەن قوسىمشا ielts ەمتيحانىن تاپسىرماقشى. ال ءوزى ۇبت-دان قوسىمشا كۋرس وقىعان ءبىلىم ۇيىمى وعان ەلوردادان پاتەر تارتۋ ەتكەن.
بىلىمگە قۇشتار, جاۋاپكەرشىلىگى جوعارى تالاپكەر ءوز جەتىستىگى ارقىلى مەكتەبىنىڭ عانا ەمەس, بۇكىل ەرتىس–بايان ءوڭىرىنىڭ مەرەيىن ۇستەم ەتتى. ونىڭ جەتىستىگى – اتا-اناسىنىڭ تاربيەسى مەن ۇستازدارىنىڭ تىنىمسىز ەڭبەگىنىڭ ناتيجەسى. ءبىلىم مەن پاراساتتى سەرىك ەتكەن ءالتايىر كوپتەگەن جاس تالاپكەرگە ۇلگى بولعانى ايدان انىق.
پاۆلودار