استانا قالاسىنداعى تاۋەلسىزدىك سارايىندا «التىن وردا – دالا وركەنيەتىنىڭ مودەلى: تاريح, ارحەولوگيا, مادەنيەت, بىرەگەيلىك» اتتى حالىقارالىق سيمپوزيۋم ءوتتى. مەملەكەت باسشىسى قاسىم-جومارت توقاەۆ سيمپوزيۋمنىڭ اشىلۋ سالتاناتىندا ءسوز سويلەدى, دەپ حابارلايدى Egemen.kz.
سيمپوزيۋمدا التىن وردانىڭ تاريحي مۇراسى, ونىڭ مەملەكەتتىلىكتىڭ دامۋىنا, ديپلوماتيالىق قاتىناستارعا, مادەني الماسۋعا جانە ورتاق ەۋرازيالىق كەڭىستىكتىڭ قالىپتاسۋىنا تيگىزگەن ىقپالى ماسەلەلەرى قاراستىرىلدى. ەرەكشە نازار ۇلى دالا حالىقتارىنىڭ تاريحي-مادەني مۇراسىن ساقتاۋ مەن ناسيحاتتاۋعا اۋدارىلدى.
مادەني ءمانى جوعارى جيىندا تاتارستان رەسپۋبليكاسى مادەنيەت ءمينيسترى يرادا ايۋپوۆا قازاقستان مەن تاتارستان اراسىنداعى جوعارى دەڭگەيدەگى ىنتىماقتاستىقتى اتاپ ءوتىپ, تۇركى حالىقتارىنىڭ تاريحي ورتاقتىعى مەن كوپعاسىرلىق بايلانىستارىن ەرەكشە اتاپ كورسەتتى.
«ىنتىماقتاستىقتىڭ جوعارى دەڭگەيى قالىپتاسقان قازاقستان مەن تاتارستان – تۇركى حالىقتارىنىڭ تاعدىرلارىنىڭ كوپعاسىرلىق توعىسۋىنا نەگىزدەلگەن وركەنيەتتىك سينتەزدىڭ بىرەگەي ۇلگىسى. مۇنىڭ كوپ بولىگى شىعىس پەن باتىستى بايلانىستىرعان نەگىزگى تاريحي توراپ قىزمەتىن اتقارعان التىن وردا مۇراسىمەن بايلانىستى. وردا كەڭ اۋماقتاردى بىرىكتىرگەن تۇراقتى ساياسي جۇيە قالىپتاستىردى – وندا ورتالىقتاندىرىلعان باسقارۋ ايماقتاردىڭ كەڭ اۋقىمدى اۆتونومياسىمەن ۇشتاسقان», دەپ اتاپ ءوتتى ول.
سيمپوزيۋمعا قاتىسۋشىلار التىن وردا مۇراسىن زەرتتەۋدىڭ قازىرگى گۋمانيتارلىق عىلىمداردى دامىتۋ, حالىقارالىق عىلىمي ىنتىماقتاستىقتى نىعايتۋ جانە ورتاق مادەني-تاريحي قۇندىلىقتاردى حالىقارالىق دەڭگەيدە ىلگەرىلەتۋ ءۇشىن ماڭىزدى ەكەنىن اتاپ ءوتتى.
ايتا كەتەيىك, استانادا وتكەن حالىقارالىق سيمپوزيۋمعا 20-دان استام ەلدەن دەلەگاتسيا كەلدى.