قازاقستاندا فەرمەرلەرگە بورداقىلاۋ الاڭدارىن دامىتۋ ءۇشىن جىلدىق 5%-بەن جەڭىلدەتىلگەن نەسيە بەرۋ باستالدى. بۇل تۋرالى اگرارلىق نەسيە كورپوراتسياسى حابارلادى, دەپ جازادى Egemen.kz.
جاڭا باعدارلاما اياسىندا شارۋالار 12 ايعا دەيىن نەسيە راسىمدەي الادى. قارجىنىڭ كەمىندە 70%-ى ءىرى جانە ۇساق مالدى ساتىپ الۋعا باعىتتالۋى ءتيىس. قالعان 30%-ىن جەم-ءشوپ, جانار-جاعارماي, تەحنيكا بولشەكتەرى, سونداي-اق مالدى سايكەستەندىرۋگە ارنالعان چيپتەر مەن سىرعالاردى ساتىپ الۋعا جۇمساۋعا بولادى.
اگرارلىق نەسيە كورپوراتسياسىنىڭ مالىمەتىنشە, باعدارلاما ىشكى نارىقتى ساپالى ەتپەن قامتاماسىز ەتىپ, باعانى تۇراقتاندىرۋعا باعىتتالعان.
«اتالعان باعدارلاما ىشكى نارىقتى ساپالى ەتپەن قامتاماسىز ەتىپ, ساۋدا ورىندارىنداعى باعانى تۇراقتاندىرۋعا مۇمكىندىك بەرەدى. ءبىز فەرمەرلەر قىمبات نارىقتىق قارجىلاندىرۋ كوزدەرىن ىزدەۋگە الاڭداماي, مال مەن جەم-ءشوپتى جەدەل ساتىپ الا الۋى ءۇشىن قارجىعا قولجەتىمدىلىكتى جەڭىلدەتتىك», دەپ اتاپ ءوتتى اگرارلىق نەسيە كورپوراتسياسىندا.
نەسيە تولەمىن كەشىكتىرگەندە نەنى بىلگەن ءجون؟
قارجىلاندىرۋ تىكەلەي كورپوراتسيا فيليالدارى ارقىلى نەمەسە نەسيە سەرىكتەستىكتەرى, ەكىنشى دەڭگەيلى بانكتەر مەن ميكروقارجى ۇيىمدارى ارقىلى جۇزەگە اسادى.
باعدارلاماعا قاتىسۋ ءۇشىن بورداقىلاۋ الاڭى كەمىندە 500 باس ءىرى قاراعا نەمەسە 1 000 باس ۇساق مالعا ەسەپتەلۋى قاجەت. سونىمەن قاتار شارۋاشىلىقتاردا قاجەتتى ينفراقۇرىلىم, سۋ جۇيەسى, كارانتين الاڭى جانە ەكولوگيالىق قورىتىندى بولۋى ءتيىس.
ايتا كەتەيىك, بۇعان دەيىن اۋىل شارۋاشىلىعى مينيسترلىگى شارۋالارعا سيىر ەتىنىڭ باعاسىن 3275 تەڭگەدەن اسىرماۋ تۋرالى مىندەتتەمە ەنگىزگەن بولاتىن.