وزبەكستاننىڭ سامارقاند قالاسىندا تاۋەلسىز مەملەكەتتەر دوستاستىعىنا قاتىسۋشى ەلدەردىڭ شەكارا اسكەرلەرى قولباسشىلارى كەڭەسىنىڭ 92-وتىرىسى ءوتتى, دەپ حابارلايدى Egemen.kz.
جيىنعا تمد-عا مۇشە توعىز ەلدىڭ شەكارا ۆەدومستۆولارىنىڭ دەلەگاتسيالارى, تمد اتقارۋشى كوميتەتىنىڭ وكىلدەرى, سونداي-اق شىۇ راتس اتقارۋشى كوميتەتى مەن شەكارا قىزمەتى ارداگەرلەرىنىڭ حالىقارالىق ۇيىمىنىڭ وكىلدەرى قاتىستى.
جيىن بارىسىندا تمد ەلدەرىنىڭ سىرتقى شەكارالارىنداعى قازىرگى احۋال تالقىلانىپ, بىرقاتار ۆەدومستۆولار مەن ۇيىمدار وكىلدەرى بايانداما جاسادى. سونداي-اق شەكارا قاۋىپسىزدىگىن قامتاماسىز ەتۋ جانە ىنتىماقتاستىقتى نىعايتۋ ماسەلەلەرى قارالدى.
كەڭەس وتىرىسىندا تمد شەكارا اسكەرلەرى قولباسشىلارى كەڭەسى قىزمەتى اياسىندا اتقارىلعان جانە جوسپارلانعان ءىس-شارالار تۋرالى اقپارات ۇسىنىلدى.
سونىمەن قاتار قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ شەكارا اكادەمياسىنا تمد ەلدەرى ءۇشىن شەكارالىق باقىلاۋ ماسەلەلەرىن زەرتتەۋ, كادر دايارلاۋ جانە بىلىكتىلىكتى ارتتىرۋ بويىنشا بازالىق ۇيىم مارتەبەسىن بەرۋ تۋرالى ەرەجە بەكىتىلدى.
ايتا كەتەيىك, بۇگىن, 15-مامىردا تۇركىستان قالاسىندا تۇركى مەملەكەتتەرى ۇيىمىنىڭ بەيرەسمي ءسامميتى وتەدى. مەملەكەت باسشىسى سامميتكە قاتىسۋ ءۇشىن تۇركىستان قالاسىنا باردى.