«مەرەيلى وتباسى» ۇلتتىق كونكۋرسىنا ءوتىنىم قابىلداۋ باستالدى

كونكۋرسقا قاتىسۋعا وتىنىمدەر 15 مامىردان 15 ماۋسىمعا دەيىن وڭىرلىك كوميسسيالاردا قابىلدانادى.

«بايقاۋ ادامگەرشىلىك قاسيەتتەردى جانداندىرۋعا, وتباسى مارتەبەسى مەن قۇندىلىقتارىن ارتتىرۋعا باعىتتالعان. ەڭبەك پەن سپورتتا, شىعارماشىلىق جانە زياتكەرلىك سالالاردا, عىلىم مەن ونەردە جەتىستىكتەرى بار وتباسىلار, سونداي-اق قوعامدىق پايدالى قىزمەتكە بەلسەندى ارالاساتىن وتباسىلار قاتىسا الادى», دەلىنگەن حابارلامادا.

بايقاۋ ەكى كەزەڭنەن تۇرادى:

اۋداندىق (قالالىق) كەزەڭ (15 ماۋسىمنان 30 ماۋسىمعا دەيىن). وبلىستىق (رەسپۋبليكالىق ماڭىزى بار قالالار مەن ەلوردا) كەزەڭ (30 ماۋسىمنان 15 شىلدەگە دەيىن).

قازاقستاننىڭ بارلىق وڭىرىنەن ۇزدىك دەپ تانىلعان 20 وتباسىعا «مەرەيلى وتباسى» ۇلتتىق كونكۋرسىنىڭ لاۋرەاتى اتاعى بەرىلەدى. جەڭىمپازداردى سالتاناتتى ماراپاتتاۋ ءراسىمى استانا قالاسىندا وتەدى.

«مەرەيلى وتباسى-2025» بايقاۋىنىڭ جەڭىمپازدارى ماراپاتتالدى

ايتا كەتەيىك, وسى جىلدار ىشىندە كونكۋرسقا قازاقستاننىڭ بارلىق وڭىرلەرىنەن 20 مىڭنان استام وتباسى قاتىستى. بيىل قاتىسۋعا نيەت بىلدىرگەندەر ءوز وتىنىمدەرىن وڭىرلىك كوميسسيالارعا جىبەرە الادى. تولىق اقپاراتتى +7 (7172) 74-10-52, 74-01-62 تەلەفون نومىرلەرى ارقىلى بىلۋگە بولادى. 

ەسكە سالايىق, بىلتىر اتالعان كونكۋرستىڭ جەڭىمپازدارىن پارلامەنت سەناتىنىڭ توراعاسى ماۋلەن اشىمباەۆ  قۇتتىقتاعان بولاتىن.