اقتوبە وبلىسى ارقىلى وتەتىن ستراتەگيالىق ماڭىزى بار اقتوبە – ۇلعايسىن كولىك ءدالىزىن قايتا جاڭارتۋ جۇمىستارى كەزەڭ-كەزەڭىمەن جۇزەگە اسىرىلىپ جاتىر. جوبانىڭ جالپى ۇزىندىعى 262 شاقىرىمدى قۇرايدى. اۆتوجول 7 دەربەس ۋچاسكەگە بولىنگەن, دەپ جازادى Egemen.kz.
قازىر ۇزىندىعى 28,1 شاقىرىم بولاتىن بولىكتە قۇرىلىس-مونتاجداۋ جۇمىستارى قارقىندى ءجۇرىپ جاتىر. جوبا 2024-2028 جىلدارعا جوسپارلانعان. ال 2025 جىلدان باستاپ وسى ۋچاسكەدە اسفالتبەتون توسەلگەن جولدىڭ ءبىر باعىتى قوزعالىس ءۇشىن اشىلعان.
نىساندا 102 تەحنيكا مەن 115 مامان جۇمىس ىستەپ جاتىر. بۇگىندە قۇرىلىس جۇمىستارىنىڭ شامامەن 40%-ى ورىندالعان. اتاپ ايتقاندا, نەگىزگى جەر جۇمىستارى اياقتالىپ, جاساندى قۇرىلىستار سالىنعان, جول قاباتتارىنىڭ باسىم بولىگى توسەلگەن. سونىمەن قاتار قاجەتتى قۇرىلىس ماتەريالدارى ازىرلەنىپ, وندىرىستىك بازالار ىسكە قوسىلعان.
بۇل ۋچاسكەدەگى جۇمىستاردى تولىق اياقتاۋ 2028 جىلدىڭ سوڭىنا جوسپارلانىپ وتىر.
«اقتوبە – قارابۇتاق – ۇلعايسىن» تاسجولىن تەزدەتىپ جوندەۋدى تاپسىردى
ال جولدىڭ قالعان 234 شاقىرىمدىق نەگىزگى بولىگىندە رەكونسترۋكتسياعا دايىندىق كەزەڭى جۇرگىزىلىپ جاتىر. قاجەتتى راسىمدەر اياقتالعاننان كەيىن مەردىگەر ۇيىمدارمەن كەلىسىمشارت جاسالىپ, قۇرىلىس-مونتاجداۋ جۇمىستارى كەزەڭ-كەزەڭىمەن باستالادى.
جوبا تولىق اياقتالعان سوڭ اۆتوجول I تەحنيكالىق ساناتقا سايكەستەندىرىلەدى. بۇل كولىك قوزعالىسىنىڭ قاۋىپسىزدىگى مەن قولايلىلىعىن ارتتىرىپ قانا قويماي, رۇقسات ەتىلگەن جىلدامدىقتى كوبەيتۋگە مۇمكىندىك بەرەدى.
اقتوبە – ۇلعايسىن باعىتىن دامىتۋ مەملەكەت باسشىسىنىڭ تاپسىرماسى اياسىندا جۇزەگە اسىرىلىپ جاتىر. جوبا ەلىمىزدىڭ باتىس جانە وڭتۇستىك وڭىرلەرى اراسىنداعى كولىك بايلانىسىن كۇشەيتىپ, قازاقستاننىڭ حالىقارالىق ترانزيتتىك الەۋەتىن ارتتىرۋعا جول اشادى.