ەلىمىزدە اۆتوموبيل جولدارىن سالۋ مەن جوندەۋگە قاجەتتى جول بيتۋمىنا دەگەن ىشكى سۇرانىس تولىق قامتاماسىز ەتىلدى. بۇعان Caspi Bitum زاۋىتىنىڭ وندىرىستىك قۋاتىن كەڭەيتۋ جوباسى ناتيجەسىندە قول جەتكىزىلدى, دەپ جازادى Egemen.kz.
جوبا اياسىندا زاۋىتتاعى مۇناي وڭدەۋ كولەمى جىلىنا 1 ملن توننادان 1,5 ملن تونناعا دەيىن ۇلعايتىلدى. سونىڭ ناتيجەسىندە جول بيتۋمىن ءوندىرۋ كولەمى دە 500 مىڭ توننادان 750 مىڭ تونناعا دەيىن ارتتى. بۇل – ەنەرگەتيكا مينيسترلىگى جۇزەگە اسىرىپ جاتقان مۇناي وڭدەۋ سالاسىن دامىتۋ تۇجىرىمداماسى شەڭبەرىندە ىسكە اسقان العاشقى جوبا.
قازىر قازاقستاندا جول بيتۋمىن وندىرەتىن جالپى قۋاتى جىلىنا 1,6 ملن توننا بولاتىن 4 زاۋىت جۇمىس ىستەپ تۇر. كولىك مينيسترلىگى مەن «قازاۆتوجول» كومپانياسىنىڭ مالىمەتىنە سايكەس, 2026 جىلى ىشكى نارىقتىڭ قاجەتتىلىگى شامامەن 1,1 ملن توننانى قۇرايدى.
وسىلايشا, قولدانىستاعى وندىرىستىك مۇمكىندىكتەر ەلدىڭ جول بيتۋمىنا دەگەن سۇرانىسىن تولىق وتەۋگە جەتكىلىكتى.
Caspi Bitum زاۋىتى جول سالۋشى كومپانيالاردان سۇرانىس تۇسكەن جاعدايدا ءونىمدى قاجەتتى كولەمدە شىعارۋعا دايىن ەكەنىن مالىمدەدى.
سالادا قابىلدانعان شارالار وتاندىق جول-قۇرىلىس كومپانيالارىن بيتۋممەن تۇراقتى قامتاماسىز ەتۋگە مۇمكىندىك بەرەدى. سونىمەن قاتار بۇل باستامالار يمپورتقا تاۋەلدىلىكتى ازايتىپ, مۇناي ونىمدەرىنىڭ ىشكى نارىعىنداعى تۇراقتىلىقتى نىعايتا تۇسپەك.
جول-قۇرىلىس سالاسى وتاندىق بيتۋممەن تولىق قامتاماسىز ەتىلدى