قوستاناي وبلىسىندا 2022 جىلعى تابيعي ورتتەن زارداپ شەككەن امانقاراعاي ورمانىن قالپىنا كەلتىرۋگە ارنالعان اۋقىمدى ۆولونتەرلىك اكتسيا ءوتتى. AGROMASH جانە Allur ماشينا جاساۋ كاسىپورىندارىنىڭ 300-دەن استام قىزمەتكەرى 5 مىڭنان اسا قاراعاي كوشەتىن وتىرعىزدى. ءىس-شارانى ۇيىمداستىرۋعا جۇمىسشى جاستاردان قۇرىلعان «ەڭبەك جاستارى» قوزعالىسى باستاماشىلىق ەتكەن, دەپ حابارلايدى Egemen.kz.
اكتسيا پرەزيدەنت قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان «تازا قازاقستان» جالپىۇلتتىق ەكولوگيالىق جوباسىنىڭ اياسىندا ءوتتى. باعدارلاما ەكولوگيالىق مادەنيەتتى قالىپتاستىرۋعا, تابيعاتتى ساقتاۋ ماسەلەلەرى توڭىرەگىندە قوعامدى بىرىكتىرۋگە جانە ەلدەگى ەكولوگيالىق تەپە-تەڭدىكتى قالپىنا كەلتىرۋگە باعىتتالعان.
«تازا قازاقستان»: كەلەشەك مەكتەپتەرىنىڭ وقۋشىلارى ەكواكتسياعا قاتىستى
امانقاراعاي ورمانى − قازاقستانداعى ماڭىزدى تابيعي نىسانداردىڭ ءبىرى. كوپتەگەن كاسىپورىن قىزمەتكەرلەرى ءۇشىن ورماندى قالپىنا كەلتىرۋگە اتسالىسۋ ازاماتتىق جاۋاپكەرشىلىكتىڭ كورىنىسى عانا ەمەس, جۇرەككە جاقىن جەكە وقيعاعا اينالدى. 2022 جىلى ءدال وسى ازاماتتار حالىقتى ەۆاكۋاتسيالاۋ مەن ءىرى ءورتتىڭ سالدارىن جويۋ جۇمىستارىنا دا قاتىسقان بولاتىن.
AGROMASH زاۋىتىنىڭ پرەزيدەنتى دينارا شۇكىجانوۆا ورماندى قالپىنا كەلتىرۋگە قاتىسۋ توتەنشە جاعداي كەزىندە ءوڭىر تۇرعىندارىنىڭ ءبىر-بىرىنە كورسەتكەن قولداۋىنىڭ جالعاسى ەكەنىن اتاپ ءوتتى.
«امانقاراعايدا الاپات ءورت بولعان كەزدە ءبىز شەت قالمادىق. بۇل − مەنىڭ تۋعان جەرىم, سول ساتتە جۇرەگىمىز قان جىلادى. جالىن ۇيلەرگە تاياپ قالعان كەزدە ادامداردىڭ ەسىگىن قاعىپ, زاتتارىن جيناۋعا كومەكتەستىك, العاشقى مەديتسينالىق كومەك كورسەتتىك. ونى ەسكە الۋدىڭ ءوزى اۋىر, بىراق ۇمىتۋ مۇمكىن ەمەس. كۇيىپ كەتكەن اعاشتاردىڭ جانىنان وتكەن سايىن سول كۇندەردىڭ اۋىرتپالىعى سەزىلەدى. بۇگىنگى شارامىزدىڭ ماقساتى − جوعالتقانىمىزدى قالپىنا كەلتىرىپ, ءوڭىردىڭ بولاشاعىنا ۇلەس قوسۋ», دەدى ول.
ءىس-شارا بارىسىندا ۆولونتەرلىك باستامالار مەن جاستار قوزعالىستارىنىڭ ەلدىڭ ەكولوگيالىق كۇن ءتارتىبىن جۇزەگە اسىرۋداعى رولىنە ەرەكشە نازار اۋدارىلدى. ۇيىمداستىرۋشىلاردىڭ ايتۋىنشا, مۇنداي جوبالار جاۋاپكەرشىلىك مادەنيەتىن قالىپتاستىرىپ, ادامداردى ورتاق يگى قۇندىلىقتار توڭىرەگىندە بىرىكتىرەدى جانە ءىس جۇزىندەگى ءپاتريوتيزمنىڭ ۇلگىسىنە اينالادى.
«تازا قازاقستان»: ءبىر كۇندە ەلىمىزدە 46 مىڭ گەكتاردان استام اۋماق تازارتىلدى
«ەڭبەك جاستارى» قوعامدىق, الەۋمەتتىك جانە ەكولوگيالىق جوبالارعا بەلسەندى قاتىساتىن كاسىپورىنداردىڭ جاس ماماندارىن بىرىكتىرەدى.
ء«بىزدى تۋعان ولكەگە پايدالى ءىس جاساپ, ورماندى قالپىنا كەلتىرۋگە ناقتى ۇلەس قوسۋعا دەگەن ورتاق نيەت بىرىكتىردى. كوشەتتەردى ءوز قولىڭمەن وتىرعىزعاندا, بولاشاق ۇرپاققا نە قالاتىنىن تەرەڭىرەك تۇسىنەسىڭ. ءبىز وندىرىستە ماشينا جاساۋعا بەيىمدەلگەنبىز, بىراق زاۋىتتان تىس جەردە دە ءوز جەرىڭ, ءوز مەملەكەتىڭ ءۇشىن ەڭبەك ەتىپ, يگىلىك جاساۋ ماڭىزدى. مەن ءۇشىن پاتريوتيزم − قۇر ءسوز ەمەس, ناقتى ءىس. بۇگىن ءبىز ءدال سونداي ماڭىزدى ءىس ءۇشىن جينالدىق», دەدى Allur زاۋىتىنىڭ ماشينا-كونتاكتىلى دانەكەرلەۋ ۋچاسكەسىنىڭ دانەكەرلەۋشىسى دياس بەرىكوۆ.
كاسىپورىن قىزمەتكەرلەرىنىڭ ايتۋىنشا, ەكولوگيالىق اكتسياعا قاتىسۋ ءوڭىردىڭ دامۋىنا ناقتى ۇلەس قوسىپ, ەكولوگيا مەن تۇراقتى دامۋ سالاسىنداعى ماڭىزدى مەملەكەتتىك باستامالاردى قولداۋعا مۇمكىندىك بەرگەن.
«سەميوزەر ورمان شارۋاشىلىعى مەكەمەسى» كمم جەتەكشىسى رينات سەردەنباەۆ ءوڭىر ەكوجۇيەسىن قالپىنا كەلتىرۋ ىسىندەگى بيزنەس پەن ۆولونتەرلىك قاۋىمداستىقتىڭ ۇلەسىن ەرەكشە اتاپ ءوتتى.
«ورتتەن كەيىن ءتورت جىل وتكەن سوڭ امانقاراعاي تابيعاتى قالپىنا كەلە باستادى. ۇزاق ۋاقىت تىنىش كۇيدە جاتقان قاراعاي تۇقىمدارى ونە باستادى. دەگەنمەن ورمانعا ءبىزدىڭ كومەگىمىز قاجەت. وتىرعىزۋ ءۇشىن ءبىز ەكى جىلدىق كوشەتتەردى پايدالانامىز. ءىرى اعاشتارعا قاراعاندا ولار جەرگىلىكتى ورتاعا تەز بەيىمدەلىپ, توپىراقپەن جاقسى ءبىتىسىپ كەتەدى. بۇل ولاردىڭ جەرسىنۋ كورسەتكىشىن ارتتىرادى. ۇزاق ۋاقىت قاجەت. بىراق ءبىز بولاشاق ۇرپاق ءۇشىن ەڭبەك ەتىپ جاتقانىمىزدى تۇسىنەمىز, سوندىقتان جۇمىسىمىزدىڭ ءمانى ەرەكشە. مۇنداي باستامالار تابيعي مۇرانى ساقتاۋ جولىندا قوعامدى ورتاق ماقساتقا جۇمىلدىرادى. اسىرەسە ەڭبەك ۇجىمدارى مەن جاستاردىڭ بەلسەندى قاتىسۋى وتە ماڭىزدى», دەدى رينات سەردەنباەۆ.
ەسكە سالايىق, 2022 جىلى قوستاناي وبلىسىندا بولعان تابيعي ءورت ءوڭىر تاريحىنداعى ەڭ ءىرى اپاتتاردىڭ ءبىرى بولدى. سونىڭ سالدارىنان شامامەن 25 مىڭ گەكتار ورمان القابى زارداپ شەكتى.