پرەزيدەنت قاسىم-جومارت توقاەۆ تۇركيا پرەزيدەنتى رەجەپ تايپ ەردوعاننىڭ ەلىمىزگە مەملەكەتتىك ساپارى اياسىندا ستراتەگيالىق سەرىكتەستىكتى ودان ءارى نىعايتۋ ماسەلەلەرىن تالقىلادى, دەپ حابارلايدى Egemen.kz.
قاسىم-جومارت توقاەۆ مادەني-گۋمانيتارلىق بايلانىس – قازاق-تۇرىك قاتىناسىنىڭ التىن كوپىرى ەكەندىگىن اتاپ ءوتتى.
«بۇل ماڭىزدى ماسەلە ءاردايىم نازاردا بولادى. سونىڭ ىشىندە ءبىلىم جانە عىلىم سالاسىنىڭ ورنى ەرەكشە. بۇگىن گازيانتەپ پروۆينتسياسىنداعى جەر سىلكىنىسىنەن زارداپ شەككەن ازاماتتار ءۇشىن قازاقستاننىڭ اتىنان سالىنعان جاڭا مەكتەپتىڭ اشىلۋ ءراسىمى ءوتتى. بۇل – قازاق حالقىنىڭ تۇرىك ەلىنە كورسەتكەن قولداۋى مەن ىستىق ىقىلاسىنىڭ ايقىن كورىنىسى. ساپار اياسىندا ءتيىستى مينيسترلىكتەر استانا مەن الماتىدا «مااريف» قورىنىڭ ەكى مەكتەبىن اشۋ تۋرالى مەموراندۋمعا قول قويعانىن ايرىقشا اتاپ وتكەن ءجون. وسى مەكتەپتەر سانالى ۇرپاق تاربيەلەيتىن ىرگەلى ءبىلىم ورداسى رەتىندە قىزمەت ەتەدى دەپ سەنەمىن. بۇل مەكتەپتەردىڭ قۇرىلىسىنا ءتيىستى جەر تەلىمدەرىن بەرۋ جونىندە تاپسىرما بەرىلدى. كوپ سوزباي قۇرىلىستى باستايمىز. جوعارى ءبىلىم بەرۋ سالاسىنداعى ىنتىماقتاستىق تا تابىستى دامىپ كەلەدى. قازىر 14 مىڭعا جۋىق ازاماتىمىز تۇركيادا وقىپ جاتىر. سونداي-اق 260-قا جۋىق تۇرىك ستۋدەنتى ەلىمىزدىڭ جوعارى وقۋ ورىندارىندا ءبىلىم الۋدا. جاقىندا شىمكەنت قالاسىنداعى پەداگوگيكالىق ۋنيۆەرسيتەتتىڭ جانىنان تۇركيانىڭ گازي ۋنيۆەرسيتەتىنىڭ فيليالى جۇمىس ىستەي باستايدى. الداعى ۋاقىتتا ءال-فارابي اتىنداعى قازاق ۇلتتىق ۋنيۆەرسيتەتى تۇركيادا فيليال اشۋدى جوسپارلاپ وتىر. ءبىز بۇل يگى باستامالاردى جالعاستىرىپ, ءبىلىم بەرۋ, مەديتسينا, تۋريزم سالاسىنداعى بايلانىسىمىزدى نىعايتا بەرەمىز», دەدى پرەزيدەنت.
مەملەكەت باسشىسى تۇركيا پرەزيدەنتىمەن شاعىن قۇرامدا كەلىسسوز جۇرگىزدى
مەملەكەت باسشىسى قازاقستان مەن تۇركيا اراسىندا ءوزارا قۇرمەت پەن سىيلاستىققا, باۋىرلاستىق پەن دوستىققا نەگىزدەلگەن بەرىك قارىم-قاتىناس ورناعانىنا نازار اۋداردى.
«بۇل – پرەزيدەنت رەجەپ تايپ ەردوعاننىڭ تىكەلەي قولداۋىنىڭ ارقاسى ەكەنى ءسوزسىز. رەجەپ بەي ەكى ەلدىڭ بىرلىگىن بەكەمدەۋگە ايرىقشا ۇلەس قوسۋدا. سونداي-اق قوعامدىق-ساياسي, الەۋمەتتىك جانە مادەني-گۋمانيتارلىق سالاداعى قازاق-تۇرىك ىقپالداستىعىن كۇشەيتۋگە مول ەڭبەك ءسىڭىرىپ كەلەدى. سوندىقتان مەن قادىرلى دوسىم, باۋىرىم رەجەپ تايپ ەردوعاندى تۇركى الەمىنىڭ رۋحاني كوسەمى – Qoja Ahmet Yasaui وردەنىمەن ماراپاتتادىم. مۇنى بارشا قازاق ەلىنىڭ تۇرىك جۇرتىنا جانە تۇركيا پرەزيدەنتىنە دەگەن زور قۇرمەتىنىڭ كورىنىسى دەۋگە بولادى. ەردوعان مىرزا وسى بەدەلدى ناگرادانىڭ تۇڭعىش يەگەرى ەكەنىن ەرەكشە اتاپ وتكىم كەلەدى», دەدى قاسىم-جومارت توقاەۆ.
ەسكە سالا كەتەيىك, بۇعان دەيىن تاراپتار ساۋدا-ەكونوميكالىق ىقپالداستىقتى تەرەڭدەتۋ باعىتىندا ەكى اراسىندا ماڭىزدى ساۋدا كەلىسىمدەرىن جاساسقان بولاتىن.