ەلوردادا قازاقستان – تۇركيا جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ التىنشى وتىرىسى ءوتتى. كەڭەستە تاراپتار ساۋدا-ەكونوميكالىق ىقپالداستىقتى تەرەڭدەتۋ ماسەلەسىن تالقىلادى, دەپ حابارلايدى Egemen.kz.
وتكەن جىلدىڭ قورىتىندىسى بويىنشا تاۋار اينالىمى 8,8 پايىزعا ءوسىپ, 5,4 ميلليارد دوللاردان اسقان. قاسىم-جومارت توقاەۆ ساۋدا-ساتتىقتى ءارى قاراي جانداندىرۋعا قولايلى جاعداي جاساپ, الىس-بەرىستى ءارتاراپتاندىرۋدىڭ ماڭىزىنا توقتالدى.
پرەزيدەنتتىڭ ايتۋىنشا, قازاقستان تۇركياعا قازىردىڭ وزىندە 34 تاۋار ءتۇرى بويىنشا ەكسپورت كولەمىن ۇلعايتا الادى. ونىڭ جالپى قۇنى – 630 ميلليون دوللاردان اسادى. بۇل رەتتە مەملەكەت باسشىسى ەكى ەلدىڭ قارجى ورتالىقتارى مەن تسيفرلىق ساۋدا پلاتفورمالارى اراسىنداعى سەرىكتەستىكتىڭ, سونداي-اق بۇگىن استانادا ءوتىپ جاتقان قازاق-تۇرىك بيزنەس-فورۋمىنىڭ ناتيجەسى ساۋدا-ەكونوميكالىق بايلانىستاردى ودان ءارى تەرەڭدەتە تۇسەتىنىنە سەنىم ءبىلدىردى.
مەملەكەت باسشىسى تۇركيا پرەزيدەنتىمەن شاعىن قۇرامدا كەلىسسوز جۇرگىزدى
كەڭەستە اۋىل شارۋاشىلىعى سالاسىنداعى ىقپالداستىققا ايرىقشا ءمان بەرىلدى. قاسىم-جومارت توقاەۆ Tiryaki Agro قولعا العان گليۋتەن مەن كراحمال ءوندىرىسىن, Alarko Holding سالىپ جاتقان جىلىجاي كەشەنىن مىسالعا كەلتىردى. تۇركيا تاراپىنا اۋىل شارۋاشىلىعى ونىمدەرىنىڭ ءوزارا ساۋداسىن جانداندىرۋ جونىندە 2026-2028 جىلدارعا ارنالعان جول كارتاسىن قابىلداۋ ۇسىنىلدى.
جيىندا قازىرگى گەوساياسي جاعدايدا كولىك-لوگيستيكا سالاسىنىڭ ستراتەگيالىق ماڭىزى ارتا تۇسكەنىنە نازار اۋدارىلدى. مەملەكەت باسشىسى بۇل رەتتە ترانسكاسپي حالىقارالىق كولىك دالىزىنە وزگە ەلدەردىڭ قىزىعۋشىلىعى ارتىپ كەلە جاتقانىنا توقتالىپ, تۇرىك كومپانيالارىن قۇرىق, اقتاۋ پورتتارى ارقىلى جۇك تاسىمالىن ۇلعايتۋدى كوزدەيتىن جوبالارعا بەلسەندى اتسالىسۋعا شاقىردى.
سونىمەن قاتار پرەزيدەنت تۇركيا بيزنەسمەندەرىن شيكىزاتتىق ەمەس جوبالاردى بىرلەسە ىسكە اسىرۋعا ۇندەدى. بۇدان سوڭ مەملەكەت باسشىسى تۇركيا پرەزيدەنتىن «قوجا احمەت ياساۋي» وردەنىمەن ماراپاتتادى.