دەنساۋلىق ساقتاۋ مينيسترلىگى 14-17 جاستاعى مەكتەپ وقۋشىلارىنا ادام پاپيلوماسى ۆيرۋسىنا (ۆپچ) قارسى قوسىمشا ۆاكتسيناتسيا جۇرگىزىلەتىنىن حابارلادى, دەپ جازادى Egemen.kz.
ەندى اتا-اناسىنىڭ نەمەسە زاڭدى وكىلىنىڭ كەلىسىمىمەن ءجاسوسپىرىم قىزدارعا ەكپە سالۋعا مۇمكىندىك بەرىلەدى. ءتيىستى قاۋلىعا ەلدىڭ باس مەملەكەتتىك سانيتاريالىق دارىگەرى قول قويعان.
ايتا كەتەيىك, قازاقستاندا 2024 جىلدان باستاپ 11 جاستاعى قىزدارعا ادام پاپيلوماسىنا قارسى جوسپارلى ۆاكتسيناتسيا جۇرگىزىلىپ كەلەدى. سونىمەن قاتار 12-13 جاستاعى وقۋشىلار اراسىندا دا قوسىمشا ەكپە جۇمىستارى ۇيىمداستىرىلعان.
مينيسترلىكتىڭ مالىمەتىنشە, 1 مامىرعا دەيىن 11-13 جاس ارالىعىنداعى قىزدارعا جاتىر موينى وبىرىن تۋدىراتىن ۆيرۋسقا قارسى 398 مىڭنان استام پروفيلاكتيكالىق ەكپە سالىنعان.
دەنساۋلىق ساقتاۋ مينيسترلىگى بۇل ۆاكتسينا قىز بالالار اراسىندا اۋرۋدىڭ الدىن الۋدا 90-100 پايىزعا دەيىن ءتيىمدى ەكەنىن اتاپ ءوتتى.
بۇعان دەيىن سوڭعى جىلدارى قازاقستاندا ۆاكتسينادان باس تارتۋ جاعدايلارى ارتىپ كەلە جاتقانىن جازعان بولاتىنبىز.
باس مەملەكەتتىك سانيتاريالىق دارىگەر قول قويعان قاۋلىعا سايكەس ەلىمىزدە قىزىلشا دەرەگى انىقتالعان جاعدايدا ەكپە الماعان بالالار بالاباقشا مەن مەكتەپكە ۋاقىتشا قابىلدانبايدى.