قازاقستان مەن تۇركيا اراسىندا «ماڭگىلىك دوستىق تۋرالى» دەكلاراتسيا قابىلدانادى

مەملەكەت باسشىسى تۇركيا قازاقستان ءۇشىن باۋىرلاس ەل, ماڭىزدى ءارى سەنىمدى سەرىكتەس سانالاتىنىن اتاپ ءوتىپ, تامىرى تەرەڭ بايلانىستار قوس حالىقتىڭ مىزعىماس دوستىعىن ودان ءارى نىعايتۋعا ىقپال ەتىپ وتىرعانىن ايتتى.

«قازىرگى تاڭدا قازاق-تۇرىك ەكىجاقتى قارىم-قاتىناسى كەڭەيتىلگەن ستراتەگيالىق سەرىكتەستىك رۋحىندا قارقىندى دامىپ جاتىر. ەلدەرىمىزدىڭ اراسىندا ەشقانداي تۇيتكىل جوق. مەملەكەتارالىق جانە ۇكىمەتارالىق بايلانىستارىمىز نىعايىپ كەلەدى. پارلامەنتارالىق ىقپالداستىعىمىز دا جوعارى دەڭگەيدە. تۇرىك دەلەگاتسياسىنىڭ قۇرامىندا ءبىر توپ دەپۋتاتتىڭ جانە پارتيا مۇشەلەرىنىڭ بولۋى – سونىڭ ايقىن دالەلى. سونىمەن قاتار ەكى ەلدىڭ ەكونوميكالىق ىنتىماقتاستىعى كۇشەيە ءتۇستى. تۇركيا ءىرى ينۆەستورلارىمىزدىڭ قاتارىنا كىرەدى. وسى ۋاقىتقا دەيىن ءسىزدىڭ ەلىڭىزدەن ەكونوميكامىزعا 6 ميلليارد دوللار ينۆەستيتسيا تارتىلدى. قازاقستاننىڭ تۇركياعا سالعان ينۆەستيتسياسى دا ءوسىپ, 2,5 ميلليارد دوللارعا جۋىقتادى. سونداي-اق تۇرىك ەلى – نەگىزگى بەس ساۋدا سەرىكتەسىمىزدىڭ ءبىرى. قوس حالىقتىڭ مادەني-گۋمانيتارلىق بايلانىستارى قارىم-قاتىناسىمىزدىڭ التىن ارقاۋى سانالادى. ءبىز وسى يگى ءۇردىستى ساقتاپ, ءوزارا ىقپالداستىعىمىزدىڭ اياسىن كەڭەيتە بەرۋگە مۇددەلىمىز. بۇگىن «ماڭگىلىك دوستىق جانە كەڭەيتىلگەن ستراتەگيالىق سەرىكتەستىك تۋرالى» دەكلاراتسيانى قابىلدايمىز. وسى ماڭىزدى قۇجات قازاق-تۇرىك قاتىناستارىن دامىتۋعا تىڭ سەرپىن بەرەتىنى انىق. بۇل ماسەلە بويىنشا ەكى ەلدىڭ دە نيەت-تىلەگى – ءبىر, سوندىقتان الەۋەتىمىز دە, مۇمكىندىگىمىز دە مول دەپ ايتۋعا تولىق نەگىز بار», دەدى قاسىم-جومارت توقاەۆ.

«قادىرلى باۋىرىم»: توقاەۆ تۇركيا پرەزيدەنتىمەن كەزدەسۋىنەن فوتو جاريالادى

قازاقستان پرەزيدەنتى بۇگىندە تۇركيا الەۋمەتتىك-ەكونوميكالىق دامۋدىڭ جاڭا كەزەڭىنە قادام باسىپ, ءتۇرلى سالادا ەلەۋلى تابىسقا قول جەتكىزگەنىنە نازار اۋداردى.

ء«سىزدىڭ ساليقالى, سارابدال ساياساتىڭىزدىڭ ناتيجەسىندە تۇركيانىڭ الەمدەگى ىقپالى مەن بەدەلى ارتا ءتۇستى. تۇرىك ەلى قۋاتتى ەكونوميكا مەن سالماقتى ديپلوماتيانىڭ ارقاسىندا ەۋروپا مەن ازيانى, كۇللى تۇركى دۇنيەسىن جالعاعان التىن كوپىر رەتىندە تانىلىپ وتىر. مەملەكەتىڭىزدىڭ جەتىستىكتەرى – ءسىزدىڭ ۇلت مۇددەسىن قورعاۋ جولىنداعى قاجىرلى ەڭبەگىڭىزدىڭ جەمىسى دەپ بىلەمىز», دەدى پرەزيدەنت.

رەجەپ تايپ ەردوعان رەسپۋبليكالىق رەفەرەندۋمدا حالىق قولداۋىنا يە بولعان جاڭا كونستيتۋتسيا قازاقستاننىڭ ىنتىماعىن ارتتىرا بەرەتىنىنە سەنىم ءبىلدىردى. سونىمەن قاتار تۇركيا پرەزيدەنتى ەكى ەل اراسىنداعى قارىم-قاتىناس كەڭەيتىلگەن ستراتەگيالىق ارىپتەستىك اياسىندا بارلىق سالادا نىعايىپ كەلە جاتقانىن ايتتى.

مەملەكەت باسشىسى تۇركيا پرەزيدەنتىمەن شاعىن قۇرامدا كەلىسسوز جۇرگىزدى

«قادىرلى باۋىرىممەن وتكىزگەن كەزدەسۋدە ساۋدادان باستاپ ەنەرگەتيكا, قورعانىس ونەركاسىبى, كولىك-لوگيستيكا سالالارىنداعى ىنتىماقتاستىق, سونداي-اق جاھانداعى وزەكتى ماسەلەلەر سەكىلدى كوپتەگەن تاقىرىپتا پىكىر الماستىق. ءبىز ساۋدا اينالىمىن 15 ميلليارد دوللارعا جەتكىزۋگە نيەتتى ەكەنىمىزدى راستادىق. وسى ورايدا 15 ساۋىردە استانادا وتكەن ۇكىمەتارالىق ەكونوميكالىق كوميسسيانىڭ 14-ءشى وتىرىسىندا قابىلدانعان 67 تارماقتان تۇراتىن ءىس-قيمىل جوسپارىن جۇزەگە اسىرۋدىڭ ماڭىزىنا توقتالدىق. ينۆەستيتسيا سالاسىندا كومپانيالارىمىزدى ىنتالاندىرۋدى جالعاستىرامىز. بۇگىنگى بيزنەس-فورۋم سياقتى ىسكەرلىك ورتانى بىرىكتىرەتىن ءىس-شارالار ەكى ەلدىڭ ساۋدا-ەكونوميكالىق بايلانىستارىن نىعايتۋ تۇرعىسىنان اسا ماڭىزدى دەپ سانايمىن», دەدى تۇركيا پرەزيدەنتى.

كەڭەس وتىرىسىندا تاراپتار ساۋدا-ەكونوميكالىق ىقپالداستىقتى تەرەڭدەتۋ ماسەلەسىن تالقىلادى.

ەسكە سالا كەتەيىك, كەشە تۇركيا رەسپۋبليكاسىنىڭ پرەزيدەنتى رەجەپ تايپ ەردوعان قازاقستانعا مەملەكەتتىك ساپارمەن كەلدى. 15 مامىردا تۇركيا پرەزيدەنتى تۇركىستان قالاسىندا تۇركى مەملەكەتتەرى ۇيىمىنا مۇشە ەلدەر باسشىلارىنىڭ بەيرەسمي سامميتىنە قاتىسادى.