مەملەكەت باسشىسى «قازاقستان رەسپۋبليكاسىنىڭ ورتا ءبىلىم بەرۋ جۇيەسىنە جاساندى ينتەللەكتىنى ەندىرۋ جونىندەگى شارالار تۋرالى» جارلىققا قول قويدى, دەپ حابارلايدى Egemen.kz.
جارلىقتىڭ نەگىزگى ماقساتى – جاساندى ينتەللەكت جەدەل دامىپ كەلە جاتقان كەزەڭدە قازاقستان رەسپۋبليكاسىنىڭ وركەندەۋىن قامتاماسىز ەتىپ, ادامي كاپيتالدى ىلگەرىلەتۋگە ۇلەس قوساتىن زاماناۋي, يننوۆاتسيالىق ءبىلىم بەرۋ جۇيەسىن قالىپتاستىرۋعا جاعداي جاساۋ.
جارلىققا سايكەس قازاقستان رەسپۋبليكاسىنىڭ ۇكىمەتى 2026 جىلدىڭ 1 شىلدەسىنە دەيىن دەربەس وقىتۋ تەتىگىن, تسيفرلىق ينفراقۇرىلىمدى, پەداگوگ كادرلار دايارلاۋدى, ءبىلىم الۋشىلاردىڭ جەكە مالىمەتتەرىن قورعاۋدى كوزدەيتىن ورتا ءبىلىم بەرۋ جۇيەسىنە جاساندى ينتەللەكتىنى ەنگىزۋدىڭ 2026-2029 جىلدارعا ارنالعان كەشەندى ءىس-شارالار جوسپارىن بەكىتەدى.
جارلىقتا جاساندى ينتەللەكتىنى دامىتۋ جونىندەگى كەڭەستىڭ مۇشەسى لي كاي-ءفۋدىڭ ۇسىنىمدارىن جۇمىس بارىسىندا قولدانۋ قاراستىرىلعان. ۇكىمەت قالا مەن اۋىل مەكتەپتەرى اراسىندا ءبىلىم بەرۋ ساپاسىنىڭ الشاقتىعىن قىسقارتۋ ماقساتىندا 2026 جىلدىڭ 1 ماۋسىمىنا دەيىن ورتا ءبىلىم بەرۋ سالاسىنداعى پيلوتتىق جوبانى ىسكە اسىرۋ, ونى ودان ءارى كەڭىنەن تاراتۋ جونىندە ناقتى ۇسىنىستار ەنگىزۋگە ءتيىس.
2026 جىلدىڭ 1 تامىزىنا دەيىن پيلوتتىق جوبانى ىسكە اسىرۋ اياسىندا مەكتەپتەر تەحنيكالىق تۇرعىدان جاراقتاندىرىلادى, سونىڭ ىشىندە تۇراقتى, جىلدامدىعى جوعارى ينتەرنەتپەن قامتاماسىز ەتىلەدى.
2026 جىلدىڭ 1 قىركۇيەگىنە دەيىن ورتا ءبىلىم بەرۋ جۇيەسىندە جاساندى ينتەللەكتىنى قولدانۋ ستاندارتتارى بەكىتىلەدى.
سونداي-اق 2026 جىلدىڭ 1 قىركۇيەگىنە دەيىن پەداگوگتەردىڭ كاسىبي تۇرعىدان ۇزدىكسىز دامۋىن كوزدەي وتىرىپ, ولاردىڭ قىزمەتىنە نۇقسان كەلتىرمەي ءارى الماستىرماي جاساندى ينتەللەكت تەحنولوگيالارىن ءبىلىم بەرۋ پروتسەسىندە قوسىمشا ءتيىمدى قۇرال رەتىندە پايدالانۋدى قامتاماسىز ەتەتىن شارالار جوسپارى قابىلدانادى.