الماتىدا ۇلتتىق عىلىم اكادەمياسىندا «Science & Business» V حالىقارالىق عىلىمي-تاجىريبەلىك كونفەرەنتسياسى ءوتتى. عىلىمدى دامىتۋ, عىلىم مەن بيزنەستى ىقپالداستىرۋ, سونداي-اق عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋ تەتىكتەرىن جەتىلدىرۋ ماسەلەلەرىنە ارنالعان جيىن پرەزيدەنت جانىنداعى ۇلتتىق عىلىم اكادەمياسى مەن «جالىن» عىلىمي-وندىرىستىك-تەحنيكالىق ورتالىعىمەن بىرلەسىپ ۇيىمداستىرىلدى, دەپ جازادى Egemen.kz.
پلەنارلىق سەسسيادا ۇعا پرەزيدەنتى ا. كۇرىشباەۆتىڭ قاتىسۋشىلارعا ارناعان ءسوزىن ۆيتسە-پرەزيدەنت ا. سەرىكقانوۆ وقىدى.
«بۇگىنگى تاڭدا عىلىم – تەك ءبىلىم كوزى عانا ەمەس, سونىمەن قاتار تۇراقتى الەۋمەتتىك-ەكونوميكالىق دامۋدىڭ نەگىزگى قوزعاۋشى كۇشى. قازاقستان ءۇشىن بۇل شيكىزاتتىق مودەلدەن بىلىمگە, تەحنولوگيالارعا جانە يننوۆاتسيالارعا نەگىزدەلگەن ەكونوميكاعا كوشۋدى بىلدىرەدى. وسى تۇرعىدا عىلىمي جۇيەنىڭ ناتيجەلەردى تەك قالىپتاستىرىپ قانا قويماي, ولاردى نارىقتا سۇرانىسقا يە ونىمدەرگە, قىزمەتتەرگە جانە تەحنولوگيالىق شەشىمدەرگە ءتيىمدى تۇردە اينالدىرۋ قابىلەتى ەرەكشە ماڭىزعا يە», دەلىنگەن ا. كۇرىشباەۆتىڭ قاتىسۋشىلارعا ارناعان سوزىندە.
جيىندا ۇعا اكادەميگى, فيلولوگيا عىلىمدارىنىڭ دوكتورى, پروفەسسور كارىمبەك قۇرماناليەۆ مەملەكەت باسشىسىنىڭ عىلىمي ازىرلەمەلەردى وندىرىسكە ەنگىزۋ باعىتىنداعى تاپسىرمالارىنا, عىلىم مەن بيزنەستى ينتەگراتسيالاۋداعى ماڭىزدى تەتىكتەرگە توقتالىپ ءوتتى. جاھاندىق ەكونوميكا جاعدايىندا ەكونوميكالىق تۇراقتىلىقتى قامتاماسىز ەتە وتىرىپ, كاسىپكەرلىككە باعىتتالعان يننوۆاتسيالاردى ىسكە اسىرۋدا ءبىلىم-عىلىم, بيزنەس ىقپالداستىعىنىڭ ماڭىزىن اتاپ ءوتتى.
وندىرىسكە سەرپىن بەرگەن ونەرتابىستار
القالى جيىندا اكادەميك م. جۇرىنوۆ, ميكروبيولوگيا جانە ۆيرۋسولوگيا عىلىمي-وندىرىستىك ورتالىعىنىڭ باس ديرەكتورى ا.سادانوۆ, ءال-فارابي اتىنداعى قازقۋ سۋپەركومپيۋتەر ورتالىعىنىڭ ديرەكتورى ءا. تەمىرباەۆ, ۇعا پانارالىق ورتالىعىنىڭ ديرەكتورى ق. ءاليحانوۆ, باسقا دا عالىمدار عىلىمدى كوممەرتسيالاندىرۋدىڭ وزەكتى ماسەلەلەرىن قوزعاي وتىرىپ, مەملەكەتتىك ورگاندار, دامۋ ينستيتۋتتارى, بيزنەس وكىلدەرى مەن حالىقارالىق ساراپشىلار قاۋىمداستىعى اراسىندا تاجىريبە الماسۋدىڭ ماڭىزىن, سونداي-اق عىلىمي ازىرلەمەلەردى وندىرىسكە جانە ەكونوميكاعا ەنگىزۋ بويىنشا پراكتيكالىق شەشىمدەر ازىرلەۋدىڭ وزەكتىلىگىن اتاپ ءوتتى.
كونفەرەنتسيا بارىسىندا «عىلىم قورى» تاراپىنان وندىرىسكە ەنگەن جوبالار تانىستىرىلدى. كورمەدە «جالىن» عىلىمي وندىرىستىك تەحنيكالىق ورتالىعى, «انتيگەن» عىلىمي-وندىرىستىك كاسىپورنى, MVA group, قازاق ۇلتتىق اگارلىق ۋنيۆەرسيتەتى, ساتباەۆ اتىنداعى قازۇتزۋ, تاعى باسقا كاسىپورىندار مەن جوعارى وقۋ ورىندارى بازاسىندا وندىرىلگەن ونىمدەر تانىستىرىلدى. قازىرگى كەزدە بۇل ونىمدەر ەلىمىز نارىعىمەن قاتار شەتەلگە ەكسپورتتالىپ, ەلىمىزدە وندىرىلگەن ونىمدەردىڭ باسەكەگە قابىلەتتىگىن ايعاقتايدى.
پەتروپاۆلدا «تۇقىم كۇنى – 2026» حالىقارالىق كونفەرەنتسياسى ءوتتى
كونفەرەنتسيا پلەنارلىق وتىرىستار, عىلىمدى كوممەرتسيالاندىرۋ بويىنشا فورسايت-سەسسيامەن جالعاستى. فورسايت-سەسسيا اياسىندا تەحنولوگيالىق دايىندىق دەڭگەيى جوعارى, وندىرىسكە ەنگىزۋگە دايىن ازىرلەمەلەردىڭ, سونىڭ ىشىندە TRL 4-7 دەڭگەيىندەگى جوبالار تانىستىرىلدى. اتالعان سەسسيا عىلىمي ناتيجەلەردى پراكتيكاعا ىلگەرىلەتۋدىڭ تەتىكتەرىن ىزدەستىرۋگە, ارىپتەستىكتى كەڭەيتۋگە جانە ازىرلەمە اۆتورلارى مەن تەحنولوگيالاردىڭ الەۋەتتى تۇتىنۋشىلارى اراسىنداعى ورنىقتى بايلانىستاردى دامىتۋعا باعىتتالعان.
كونفەرەنتسيا جۇمىسىنا مەملەكەتتىك ورگانداردىڭ وكىلدەرى, «عىلىم قورى» اق, مەملەكەتتىك عىلىمي-تەحنيكالىق ساراپتاما ۇلتتىق ورتالىعى, «اتامەكەن» ۇكپ, الماتى قالاسىنىڭ اكىمدىگى وكىلدەرى, سالالىق ۇلتتىق عىلىم اكادەميالارىنىڭ جەتەكشىلەرى, جوعارى وقۋ ورىندارىنىڭ رەكتورلارى, عىلىمي ۇيىمداردىڭ باسشىلارى, عالىمدار, سونداي-اق بيزنەس, يندۋستريا جانە ءوندىرىس سالاسىنىڭ وكىلدەرى قاتىستى.
ۇلتتىق عىلىم اكادەمياسىنىڭ 80 جىلدىق مەرەيتويى اياسىندا وتكەن جيىنعا Zhanykulov foundation قورى دەمەۋشىلىك ەتتى.
الماتى