شىمبۇلاق پەن وي-قاراعاي كۋرورتتارى اسپالى جول ارقىلى بىرىكتىرىلەدى

پرەمەر-مينيستر جوسپارلانعان ءىس-شارالاردىڭ ورىندالۋ بارىسى, جوبالاردىڭ اعىمداعى مارتەبەسى جانە اتك دامىتۋ جونىندەگى الداعى قادامدار تۋرالى باياندامالاردى تىڭدادى.

الماتى تاۋ كلاستەرىن دامىتۋدىڭ كەشەندى جوسپارى 73 ءىس-شارانى قامتيدى, ونىڭ 49-ىن بيىل جۇزەگە اسىرۋ جوسپارلاعان. ءبىرىنشى كەزەڭدە شىمبۇلاقتى جاڭعىرتۋ جانە بۋتاكوۆكا, كىماسار شاتقالدارى ايماقتارىن دامىتۋ كوزدەلگەن. ەكىنشى كەزەڭ 2027 جىلى باستالادى جانە پيونەر, Oi-Qaragai كۋرورتتارىن دامىتۋدى, سونداي-اق ولاردى اسپالى جول جۇيەسى ارقىلى بىرىكتىرۋدى قامتيدى.

Kazakh Tourism Development Ltd اتقارۋشى ديرەكتورى ەرجان ەركىنباەۆ Almaty Superski تۇجىرىمداماسىندا جاياۋ سەرۋەندەۋشىلەردىڭ كەشەندى ينفراقۇرىلىمىن, زاماناۋي ۆيزيت-ورتالىقتارىن جانە سوقپاقتار مەن مارشرۋت بەلگىلەرىنەن باستاپ بيىك تاۋلى ايماقتارداعى شۇعىل بايلانىسقا, تسيفرلىق ناۆيگاتسياعا جانە كۇردەلىلىگى ءارتۇرلى دەڭگەيدەگى مارشرۋتتار كاتالوگتەرىنە دەيىن بىرىڭعاي قاۋىپسىزدىك جۇيەسىن قۇرۋعا ەرەكشە ءمان بەرىلەتىنىن باياندادى. جوبانىڭ ەرەكشەلىگى شىمبۇلاق, Almaty Superski كۋرورتتارىنا جانە باسقا دا كەلەشەگى زور باعىتتارعا اسپالى جولداردىڭ نەگىزگى كولىك تورابى بولاتىن بىرىڭعاي ۆوكزال بولادى. 

كوشى-قون ساياساتى وزگەرەدى: ولجاس بەكتەنوۆ مينيسترلەرگە ناقتى مىندەتتەر جۇكتەدى

قالا اكىمى دارحان ساتىبالدى الماتى قالاسىنىڭ اكىمدىگى اتقارىپ جاتقان جۇمىستار تۋرالى باياندادى. شىمبۇلاقتى جاڭعىرتۋ اياسىندا بيىل مامىر ايىندا جەتى اسپالى كوپىردىڭ العاشقىسىنىڭ قۇرىلىسى باستالادى. جىل سوڭىنا دەيىن ەكى جاڭا جەلىنى اياقتاۋ جوسپارلانۋدا, وعان 5 شاقىرىمنان استام تراسسانى قوسىلادى (قازىرگى جالپى ۇزىندىعى – 18 كم). سونداي-اق شىمبۇلاقتا 2 اسپالى جول جاڭعىرتىلادى. 

Almaty Superski جوباسى قازىر ينجەنەرلىك ينفراقۇرىلىم دايىنداپ, جابدىقتار ساتىپ الۋدا. بيىل 8 كوپىر مەن سۋ وتكىزۋ قۇرىلىستارىن سالۋ كوزدەلگەن. بيىلعى ماۋسىم ايىندا ۇزىندىعى 6 شاقىرىم اۆتوجول قۇرىلىسىن باستاۋ جوسپارلانىپ وتىر. گازبەن جابدىقتاۋ جانە كارىز جەلىلەرى 2027 جىلى جولمەن ءبىر مەزگىلدە سالىنادى. جالپى, قالا اكىمدىگىنىڭ مالىمدەۋىنشە, ينجەنەرلىك ينفراقۇرىلىم مەن اۆتوجول 2027 جىلدىڭ قىركۇيەگىنە دەيىن اياقتالادى دەپ كۇتىلۋدە. 

الماتى وبلىسىنىڭ اكىمى مارات سۇلتانعازيەۆ 2025-2029 جىلدارعا ارنالعان كەشەندى جوسپار شەڭبەرىندە وڭىردە 92,8 ملرد تەڭگە بولاتىن 15 ءىس-شارا كوزدەلگەنىن, ونىڭ 83,8 ملرد تەڭگەسى جەكە ينۆەستيتسيالار ەكەنىن باياندادى. Oi-Qaragai كۋرورتىندا بۇگىندە بىرقاتار جۇمىستار ورىندالدى, سونىڭ ىشىندە 10 ورىندىق گوندولا جانە 6 ورىندىق اسپالى جول, شاڭعى تراسسالارىنىڭ ءبىرىنشى كەزەڭى, پاراگلايدينگ الاڭى جانە باسقا دا نىساندار پايدالانۋعا بەرىلدى. 2027 جىلدىڭ III توقسانىندا كۋرورتتى قوسىمشا ەلەكترمەن جابدىقتاۋ جوباسى اياقتالادى دەپ كۇتىلۋدە. سونداي-اق, «تاۋ-تۇران – بايبۇلاق» اۆتوموبيل جولىن كۇردەلى جوندەۋ جوسپارلانۋدا.

پرەمەر-مينيستر جاۋاپتى مەملەكەتتىك ورگاندار مەن ۇيىمدار تاراپىنان جۇمىس قارقىنى باياۋ ەكەنىن ايتتى. الماتى تاۋ كلاستەرى مەن Almaty Superski كۋرورتىنىڭ دامۋى ەرەكشە باقىلاۋدا ەكەنى اتاپ ءوتىلدى.

«الماتى تاۋ كلاستەرى مەن Almaty Superski كۋرورتىن دامىتۋ – ەكونوميكا ءۇشىن تۋريستەر اعىنىن ۇلعايتۋعا جانە ينۆەستورلاردى تارتۋعا تىكەلەي ىقپال ەتەتىن  ماڭىزدى جوبالار. ولاردى جۇزەگە اسىرۋ نەگىزسىز سوزىلىپ بارا جاتىر. مەملەكەتتىك ورگاندار بۇل جۇمىسقا تولىق كىرىسكەن جوق. بارلىق ماسەلەنى جەدەل جانە بىرلەسىپ شەشىڭىزدەر», دەدى ولجاس بەكتەنوۆ.

پرەمەر-مينيستر بىرقاتار تاپسىرما بەردى. ولار – اتك جانە Almaty Superski جوبالارى بويىنشا مەملەكەتتىك ساراپتاما قورىتىندىلارىن ۋاقىتىندا بەرۋ; جوبالاردى عىلىمي سۇيەمەلدەۋ; ارنايى جانە ءورت ءسوندىرۋ تەحنيكالارىنىڭ ءوتۋى ءۇشىن قوسىمشا ۋچاسكەلەر ءبولۋ جونىندە شارالار قابىلداۋ; Almaty Superski كۋرورتىنىڭ نىساندارىن سالۋدى باستاۋ ءۇشىن ۋاقىتشا ينفراقۇرىلىم (جولدار, ينجەنەرلىك جەلىلەر جانە ت.ب.) جۇرگىزۋ جانە قاجەتتى كەلىسىمدەر بەرۋدى قامتاماسىز ەتۋ.

جالپى, الماتى تاۋ كلاستەرىن جانە Almaty Superski جوباسىن دامىتۋ زاماناۋي جانە قولجەتىمدى تاۋ ينفراقۇرىلىمىن كەڭەيتۋگە, بۇقارالىق جانە كاسىبي سپورتتى تانىمال ەتۋگە, سونداي-اق جىل بويعى دەمالىستى ىنتالاندىرۋعا باعىتتالعان. Almaty Superski جوباسى ءوڭىر ەكونوميكاسى ءۇشىن جاڭا ءوسۋ نۇكتەسىنە اينالۋعا, مىڭداعان جۇمىس ورىندارىن قۇرۋعا, تۋريستىك اعىندى ۇلعايتۋعا, قازاقستاننىڭ تاۋ ءتۋريزمىنىڭ حالىقارالىق كارتاسىنداعى پوزيتسياسىن نىعايتۋعا جانە الماتىنىڭ ورتالىق ازيانىڭ زاماناۋي تۋريستىك ورتالىعى رەتىندە دامۋىنا جاڭا سەرپىن بەرۋگە قابىلەتتى.

شارۋالارعا تۇسەتىن قارجىلىق جۇكتەمەنى ازايتۋ: بەكتەنوۆ ۇكىمەت قاۋلىسىنا ءتيىستى وزگەرىستەر ەنگىزۋدى تاپسىردى

تۇجىرىمدامانىڭ ماڭىزدى بولىگى بالالار مەن جاسوسپىرىمدەردى قىسقى سپورت تۇرلەرىمەن, بەلسەندى ءومىر سالتىمەن جانە تاۋدا قاۋىپسىزدىكتى ساقتاۋ مادەنيەتىمەن تانىستىرۋ ءۇشىن مەكتەپ جانە ءبىلىم بەرۋ باعدارلامالارىن ىسكە قوسۋ بولماق. كادرلاردى دايارلاۋ ماقساتىندا تاۋ شاڭعىسى ماماندىقتارى بويىنشا 350-گە جۋىق گرانت ءبولۋ جوسپارلانۋدا. كوللەدجدەر اسپالى جول ينجەنەرلەرىن, كوتەرگىش مەحانيكتەردى, تراسسالار مەن قار ينجەنەرلەرىن, قار زەڭبىرەكتەرى, قار كوشكىنى جانە تاعى دا باسقالار بويىنشا ماماندار دايارلاۋدى باستايدى.

جۇمىستاردىڭ جەكەلەگەن ءبىر باعىتى – سالالىق عىلىمي ينستيتۋتتارمەن جانە ساراپتامالىق ۇيىمدارمەن ىنتىماقتاستىق ورناتۋ. جوبا شەڭبەرىندە ەكولوگيا, زوولوگيا, توپىراقتانۋ, گەولوگيا, گيدرولوگيا سالاسىنداعى ماماندارمەن ءوزارا ءىس-قيمىل جۇرگىزىلەدى. مۇنداي ءتاسىل جوبانى زاماناۋي عىلىمي دەرەكتەر, حالىقارالىق قاۋىپسىزدىك ستاندارتتارى جانە تابيعي ورتاعا ۇقىپتى قاراۋ قاعيداتتارى نەگىزىندە جۇزەگە اسىرۋدى قامتاماسىز ەتەدى.

ولجاس بەكتەنوۆ: شاعىن اۆياتسيانىڭ اۋە كەمەلەرىن ساتىپ الۋ ىسىندە كەمشىلىكتەر بار

تۋريزم جانە سپورت مينيسترلىگىنىڭ دەرەكتەرى بويىنشا, جوبالاردى جۇزەگە اسىرۋ جىل بويعى تۋريستىك اعىمدى 2 ملن-نان 5 ملن ادامعا دەيىن ۇلعايتۋعا مۇمكىندىك بەرەدى. بۇل ايماق پەن جالپى ەلىمىز ءۇشىن ەلەۋلى الەۋمەتتىك-ەكونوميكالىق تيىمدىلىكتى قامتاماسىز ەتەدى.