قازاقستاندىق تالانتتى ءانشى نۇرجاس سادىرباەۆ «Voice Beyond Horizon» حالىقارالىق جوباسىندا جەڭىسكە جەتتى. پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا الەۋمەتتىك جەلىدەگى پاراقشاسىندا ونەر يەسىن قۇتتىقتادى, دەپ جازادى Egemen.kz.
«تالانتتى ءانشى نۇرجاس سادىرباەۆتى «Voice Beyond Horizon» حالىقارالىق جوباسىنداعى جارقىن جەڭىسىمەن شىن جۇرەكتەن قۇتتىقتايمىن!
نۇرجاستىڭ تالانتى, ەڭبەگى مەن ساحناداعى شەبەرلىگى الەمنىڭ ءار ەلىنەن كەلگەن قاتىسۋشىلار اراسىندا ەرەكشە تانىلىپ, لايىقتى تۇردە جوعارى باعالاندى.
ديماش قۇدايبەرگەننىڭ باستاماسىمەن ىسكە اسقان جوبا تۇركىستان قالاسىندا باستاۋ الىپ, اقتاۋ مەن الماتىدا جالعاسىپ, ەلوردادا قورىتىندىلاندى. قىتاي, قازاقستان, مالايزيا, سەربيا, يتاليا جانە قىرعىزستان ەلدەرىنەن كەلگەن قاتىسۋشىلار قازاقستاننىڭ كيەلى جەرلەرىن بىرگە ارالاپ, حالقىمىزدىڭ مادەنيەتىمەن, تاريحىمەن جانە ەلىمىزدىڭ باي تابيعاتىمەن تانىستى.
ونەر جولىندا تاباندى ەڭبەك ەتىپ, ەلىمىزدىڭ مادەنيەتىن الەمگە تانىتىپ جۇرگەن جاس دارىن يەسىنە الداعى ۋاقىتتا دا جاڭا شىعارماشىلىق جەتىستىكتەر تىلەيمىن. قازاق ونەرىنىڭ كوكجيەگى كەڭەيە بەرسىن!», دەدى ايدا بالاەۆا.
ەسكە سالا كەتەيىك, 5 اقپان كۇنى الماتى قالاسىنداعى بالۋان شولاق اتىنداعى سپورت سارايىندا ديماش قۇدايبەرگەننىڭ مىڭداعان جانكۇيەرى ونەر يەسىمەن بىرگە «Voice Beyond Horizon» اتتى اۋقىمدى پرەمەراسىنىڭ العاشقى ەپيزودىن تاماشالاۋ ءۇشىن باس قوستى.