ەلوردادا جول قاۋىپسىزدىگىنە قاتەر توندىرگەن زاڭسىز كوشە جارىسىنا توسقاۋىل قويىلدى. قاۋىپتى ارەكەتكە بارعان جۇرگىزۋشىلەر توبى دەر كەزىندە توقتاتىلىپ, جاۋاپكەرشىلىككە تارتىلدى, دەپ جازادى Egemen.kz.
پوليتسەيلەر سالىق زيمانوۆ كوشەسىندە جول قوزعالىسى ەرەجەلەرىن ورەسكەل بۇزىپ, قاۋىپتى جارىس ۇيىمداستىرىپ اپاتتىق جاعداي تۋعىزعان جۇرگىزۋشىلەردى انىقتادى. ولاردىڭ ارەكەتى وزگە جۇرگىزۋشىلەر مەن جاياۋ جۇرگىنشىلەردىڭ ومىرىنە ايتارلىقتاي قاۋىپ توندىرگەن.
قۇقىق بۇزۋشىلاردىڭ قاتارىندا Skoda اۆتوكولىگىنىڭ 18 جاستاعى جۇرگىزۋشىسى, سونداي-اق Toyota Highlander كولىگىن باسقارعان ەكى ادام بولعان. ولاردىڭ ءبىرى – كامەلەتكە تولماعان ءجاسوسپىرىم, ەكىنشىسى – 33 جاستاعى ازامات.
بارلىق قاتىسۋشىلارعا اكىمشىلىك حاتتامالار تولتىرىلدى. سونىمەن قاتار, كامەلەتكە تولماعان ءجاسوسپىرىمنىڭ زاڭدى وكىلى دە جاۋاپكەرشىلىككە تارتىلدى. ول كولىك قۇرالىن باسقارۋ قۇقىعى جوق تۇلعاعا بەرگەنى, بالانى تاربيەلەۋ مىندەتتەرىن تيىسىنشە ورىنداماعانى جانە ءجاسوسپىرىمنىڭ ەرەسەكتەردىڭ قاراۋىنسىز جۇرگەنى ءۇشىن جاۋاپ بەردى.
ءتارتىپ ساقشىلارىنىڭ مالىمەتىنشە, بارلىق قۇقىق بۇزۋشىنىڭ كولىكتەرى كوممۋنالدىق تۇراققا قويىلدى.
مينيسترلىك: ءۇش كۇندە 40 مىڭنان استام جول ەرەجەسىن بۇزۋ دەرەگى تىركەلدى
جالپى, جىل باسىنان بەرى ەلوردادا اپاتتىق جاعداي تۋعىزعانى ءۇشىن شامامەن 1800 جۇرگىزۋشى, ال مانەۆر جاساۋ ەرەجەلەرىن بۇزعانى ءۇشىن 3000-عا جۋىق جۇرگىزۋشى جاۋاپقا تارتىلعان.
پوليتسيا وكىلدەرى جول قوزعالىسى ەرەجەلەرىن ورەسكەل بۇزۋدىڭ الدىن الۋ باعىتىندا جۇيەلى جۇمىس جالعاسىپ جاتقانىن اتاپ ءوتتى. اسىرەسە, قاۋىپتى جۇرگىزۋ, زاڭسىز كوشە جارىستارى جانە ازاماتتاردىڭ ءومىرى مەن دەنساۋلىعىنا قاۋىپ توندىرەتىن ارەكەتتەر ەرەكشە باقىلاۋدا تۇر.
بيىلدان باستاپ جول ەرەجەسىنە قاتىستى ايىپپۇلدار وسەدى