ەۋروپاعا جەتۋگە تالپىنعان ميگرانتتاردىڭ ساپارى تاعى دا ادام شىعىنىمەن اياقتالدى. ليۆيا مەن اۋعانستاننان شىققان ادامداردىڭ قايىقتارى اپاتقا ۇشىراپ, ونداعان ادام كوز جۇمدى, بىرنەشەۋى اۋىر جاعدايدا اۋرۋحاناعا جەتكىزىلدى. بۇل تۋرالى اقپاراتتى euronews.com سايتى ءمالىم قىلدى, دەپ حابارلايدى Egemen.kz.
سارسەنبى كۇنى لامپەدۋزا ارالى ماڭىندا ميگرانتتار مىنگەن قايىقتان كەمىندە 19 ادامنىڭ ءمايىتى تابىلدى, تاعى 5 ادامنىڭ جاعدايى وتە اۋىر. قۇتقارۋشىلار بۇل كەمەنى حالىقارالىق سۋلاردا, ارالدان شامامەن 160 كم قاشىقتىقتا انىقتاعان. قايىقتا بارلىعى 77 ادام بولعان.
الدىن الا مالىمەت بويىنشا, كەيبىر جولاۋشىلار قۇتقارۋشىلار جەتكەنگە دەيىن-اق سۋىقتان قاتىپ قالۋ جانە قايىق تۇبىنە جينالعان كومىرسۋتەك بۋلارىنان ۋلانۋ سالدارىنان كوز جۇمعان.
لامپەدۋزا – سولتۇستىك افريكادان جەرورتا تەڭىزى ارقىلى ەۋروپاعا وتەتىن نەگىزگى باعىتتاردىڭ ءبىرى. الايدا بۇل جول اسا قاۋىپتى. حالىقارالىق كوشى-قون ۇيىمى دەرەگىنە سايكەس, بيىلدىڭ وزىندە ورتالىق جەرورتا تەڭىزىندە 624 ادام قازا تاپقان نەمەسە ءىز-ءتۇزسىز جوعالعان, ال وتكەن جىلى بۇل كورسەتكىش 1300-دەن اسقان. يتاليا ىشكى ىستەر مينيسترلىگىنىڭ مالىمەتىنشە, جىل باسىنان بەرى ەل جاعالاۋىنا 6 117 ميگرانت جەتكەن.
تۇركيا يران ەلىنەن كەلەتىن ميگرانتتاردى قابىلدايدى
وسى كۇنى تاعى ءبىر قايعىلى وقيعا ەگەي تەڭىزى اۋماعىندا تىركەلدى. مۋگلا پروۆينتسياسى جاعالاۋىندا ميگرانتتار مىنگەن ۇرلەمەلى قايىق اۋدارىلىپ, تاعى 19 ادام قازا تاپتى, ونىڭ ىشىندە 1 بالا بار.
تۇركيا جاعالاۋ كۇزەتىنىڭ مالىمەتىنشە, قايىقتاعى ادامدار ءپاترۋلدىڭ بىرنەشە رەت جاساعان ەسكەرتۋىن ەلەمەي, جوعارى جىلدامدىقپەن قاشۋعا تىرىسقان. سونىڭ سالدارىنان كەمە اۋدارىلعان. وقيعا ورنىنان كەمىندە 20 ادام قۇتقارىلدى.
مۋگلا پروۆينتسياسىنىڭ گۋبەرناتورى يدريس اكبىيك بارلىق ميگرانتتاردىڭ اۋعانستان ازاماتتارى ەكەنىن مالىمدەدى. ولار گرەكيا ارالدارىنا جەتۋدى كوزدەگەن.
جالپى, گرەكيا مەن يتاليا – تاياۋ شىعىس, افريكا جانە ازياداعى قاقتىعىستار مەن كەدەيلىكتەن قاشقان ادامدار ءۇشىن ەۋروپاعا كىرەتىن نەگىزگى قاقپا. الايدا ولاردىڭ كوبى اشىق تەڭىزگە جارامسىز شاعىن قايىقتارمەن ساپارعا شىعىپ, جولدا قازا تاۋىپ جاتىر.
قازاقستانعا ەڭبەك ميگرانتتارى قاي ەلدەن كوپ كەلەدى