سەناتتىڭ قارجى جانە بيۋدجەت كوميتەتىنىڭ دەپۋتاتتارى اقتوبەدە «سالىق كودەكسىنىڭ تۇجىرىمدامالىق ماسەلەلەرى جانە ونىڭ بيزنەستى دامىتۋعا اسەرى» تاقىرىبى بويىنشا دوڭگەلەك ۇستەل وتىرىسىن وتكىزدى.
كوميتەت توراعاسى سۇلتانبەك ماكەجانوۆ وتىرىستى اشا كەلىپ, جاڭا سالىق كودەكسى ەكونوميكالىق ساياساتتىڭ نەگىزگى قۇرالىنىڭ ءبىرى بولىپ تابىلاتىنىنا توقتالىپ, ونى قولدانۋ تاجىريبەسى مەن بيزنەسپەن كەرى بايلانىستى ەسكەرە كەلگەندە كودەكس تۇراقتى پىسىقتاۋدى تالاپ ەتەتىنىن جەتكىزدى. سونىمەن قاتار ەكونوميكالىق ورتانىڭ قۇبىلعان جاعدايىندا بيۋدجەتتىڭ كىرىس بولىگىن قامتاماسىز ەتۋگە دە, كاسىپكەرلىكتى دامىتۋ ءۇشىن قولايلى جاعدايلار جاساۋعا دا باعىتتالعان تەڭدەستىرىلگەن شەشىمدەردى ازىرلەۋگە نازار اۋدارىلدى.
«كەزدەسۋدىڭ ماقساتى – جاڭا سالىق كودەكسىنىڭ ەرەجەلەرىن ىسكە اسىرۋ كەزىندە بيزنەستىڭ قوسىلعان قۇن سالىعى جونىندە تۋىنداعان ماسەلەلەرىن, جاڭا مولشەرلەمەنى ەسەپتەۋدىڭ ءارتۇرلى تەتىكتەرىن, ارنايى سالىق تارتىپتەرىن قولدانۋ, بيزنەستىڭ ۆ2ۆ ءوزارا قارىم-قاتىناسى, سالىق ەسەپ-قيسابىن تولتىرۋ ءتارتىبىن قاراۋ جانە تالقىلاۋ بولىپ تابىلادى», دەپ اتاپ ءوتتى سۇلتانبەك ماكەجانوۆ.
ۇلتتىق ەكونوميكا ءمينيسترىنىڭ ورىنباسارى ازامات ءامرين جاڭا سالىق كودەكسى سالىق سالۋدىڭ نەعۇرلىم قاراپايىم, اشىق جانە ادىلەتتى جۇيەسىن قالىپتاستىرۋعا باعىتتالعانىن اتاپ ءوتتى. ونىڭ ايتۋىنشا, سالىقتار مەن مىندەتتى تولەمدەر سانى قىسقارتىلدى, جەڭىلدىكتەر وڭتايلاندىرىلدى, سونداي-اق ەسەپ-قيساپ نىساندارىن قىسقارتۋ مەن تسيفرلىق شەشىمدەردى ەنگىزۋمەن قوسا اكىمشىلىك راسىمدەر ايتارلىقتاي جەڭىلدەتىلدى.
«اتامەكەن» ۇلتتىق كاسىپكەرلەر پالاتاسىنىڭ وكىلدەرى كومپانيالاردىڭ ءوزارا ءىس-قيمىلىنا, سالىق جۇكتەمەسىنە جانە شەگەرىمدەردى قولدانۋعا اسەر ەتەتىن جەكەلەگەن ەرەجەلەرمەن قوسا بيزنەس الدىندا تۇرعان بىرقاتار پروبلەمالىق ماسەلەلەردى اتاپ ءوتتى. بۇل رەتتە مەملەكەتتىڭ سالىق جونىندەگى مۇددەلەرى مەن كاسىپكەرلىكتى دامىتۋ ءۇشىن جاعدايلار اراسىنداعى تەپە-تەڭدىكتى ساقتاۋدىڭ ماڭىزدىلىعى ايتىلدى.
سەناتورلار اقتوبە وبلىسىنا ساپار اياسىندا «اقتوبە» اەا, «اقتوبە رەلس ارقالىق زاۋىتى», «زەردە-كەراميكا اقتوبە» جشس, «قازحروم «تۇك» اق, سونداي-اق «ايس-پليۋس», «KazFeltec» جشس جۇمىسىمەن دە تانىستى.