«Qazaq National Product» – قۇنارلى قۇرتىمەن تانىمال كاسىپورىن. قاپتامالارىندا «قاراعاندىدا جاسالعان» دەگەن جازۋى بار قۇنارلى اس بىرەگەي برەندكە اينالدى. ەرتەدە اجەلەرىمىز جايعان اق قۇرتقا جاڭاشا سيپات بەرگەن تسەح تەحنولوگتەرى دامدەۋىشتىڭ ءتۇر-ءتۇرىن قوسىپ, ءتىل ۇيىرەر ءونىم ازىرلەپ كەلەدى.
اۋەلگىدە كاسىپكەر جازيرا تولەگەنوۆا قۇرت ساۋداسىمەن اينالىسقان. تابىستىڭ كوزىن تاۋىپ, ءتىپتى قىرعىزستاننان دا توننالاپ قۇرت جەتكىزىپتى. ماركەتينگتى مىقتى مەڭگەرگەن مامان قۇرت ساتاتىن ەكى ساۋدا نۇكتەسىن اشقان. سول كەزدە برەندتىك قوراپتارعا سالىنعان ءتۇرلى دامدەگى اسسورتي قۇرتتارى تۇتىنۋشىلار اراسىندا سۇرانىسقا يە بولدى.
ۋاقىت وتە كەلە لوگيستيكا, جەتكىزۋ مەرزىمىنىڭ ۇزاقتىعى, باعانىڭ قىمباتتاۋى, وزدەرى وندىرمەگەندىكتەن, ساپاسىنا تولىق جاۋاپ بەرە الماۋ سىندى كەدەرگىمەن بەتپە-بەت كەلىپتى.
– سول كەزدە «نەگە وسى ۇلتتىق تاعامدى ءوزىمىز وندىرمەسكە؟» دەگەن وي كەلدى. ءسويتىپ, ءوندىرىس اشۋعا بەل بۋدىق. العاشقى قادام وڭاي بولمادى. ءۇيدىڭ ماڭىنان شاعىن ورىن جالداپ, سۇتپەن تاجىريبە جاساپ, قۇرت دايىنداۋدى ۇيرەنە باستادىق. قارجىلاندىرۋ ماسەلەسى دە ءبىراز قيىندىق تۋدىردى. ەكى رەت بيزنەس گرانتىنا قاتىسقانىممەن, ءساتسىز بولدى. سول كەزدە كوڭىلىم ءتۇسىپ, ءتىپتى بيزنەستى توقتاتۋ تۋرالى شەشىم قابىلداعىم دا كەلدى. بىراق تاباندىلىق تانىتىپ, ءوز قاراجاتىمىزعا سەپاراتور مەن قۇرت جاسايتىن ستانوك ساتىپ الدىق. بارلىعىن تاجىريبە ارقىلى ۇيرەندىك, – دەيدى كاسىپورىن باسشىسى جازيرا تولەگەنوۆا.
وسىلايشا, ءتۇرلى سىناق, كۇندەلىكتى تاجىريبە ءوندىرىستى جەتىلدىرەدى. 2024 جىلى كاسىپكەر قاراعاندى قالاسى اكىمىنىڭ گرانتىنا قاتىسىپ, قازىلار القاسىنا وزدەرى ازىرلەگەن قۇرتتى ۇسىنادى. ءپىشىنى مەن ءدامى قازىلار قۇرامىن بىردەن تاڭىرقاتىپ, جەرگىلىكتى ءونىم قولداۋعا يە بولدى.
ءسويتىپ, كاسىپكەر 1,5 ميلليون تەڭگە گرانتتى جەڭىپ الىپ, وندىرىسىنە قاجەتتى قۇرال-جابدىقتار ساتىپ الادى. سول جىلدان باستاپ ءوز تسەحىندا قۇرت ءوندىرۋ ءىسى تولىق جولعا قويىلدى. ءبىر جىلدىڭ ىشىندە كاسىپورىن كەڭەيىپ, جاڭا تسەحقا كوشكەن.
مۇنىمەن قوسا, تسەحتا قايماق, ماي, ىرىمشىك, قىزىل ىرىمشىك دايىندالادى. ءتىپتى ىرىمشىك قايناتۋدان قالعان كوك سۋىنىڭ ءوزى تۇتىنۋشىلار اراسىندا سۇرانىسقا يە. بۇدان بولەك, بيداي تالقانىنان جەنت ازىرلەپ, ۇلتتىق تاعامداردىڭ قاتارىن تولىقتىرعان.
ونىمدەرى قالا دۇكەندەرى مەن سۋپەرماركەتتەرىنىڭ سورەسىندە سامساپ تۇر. ونىڭ ۇستىنە بىلتىر كاسىپكەر قاراعاندى وبلىسى اكىمىنىڭ گرانتىن جەڭىپ الىپ, جاڭا ءپىشىن ازىرلەيتىن ستانوك ساتىپ العان. قازىر وندىرىستە كادەگە جاراتىپ وتىر.
وتباسىلىق كاسىپتىڭ تاعى ءبىر ءتانتى ەتەرى – ءونىم رەتسەپتۋراسىنىڭ بارلىعىن وزدەرى ازىرلەيدى. كلاسسيكالىق قۇرتتان بولەك جاڭا دامدەردى ويلاپ تاۋىپ, ءونىم كولەمىن مولايتىپ وتىر. مىسالعا, سارىمساق قوسىلعان قۇرت – وسى ءوندىرىستىڭ اتاپ ايتار جاڭالىعى. بۇل يدەيانى جازيرانىڭ كۇيەۋى ايدار قيساەۆ ۇسىنعان. «العاشىندا جۇرت قالاي قابىلدار ەكەن؟» دەگەن قوبالجۋ بولعانىمەن, ۋاقىت وتە كەلە بۇل ءونىم ناعىز برەندكە اينالعان. تابيعي ىستالعان اششى قۇرت پەن سارىمساقتىڭ ۇيلەسىمى تابەت اشار ءدام بولىپ شىعا كەلگەن.
قازىر وندىرىستە اششى قۇرتتىڭ بەس ءتۇرى شىعارىلادى: كلاسسيكالىق تۇزدى قۇرت, تابيعي ىستالعان قۇرت, بازيليك قوسىلعان قۇرت, سارىمساق قۇرتى جانە چيلي قوسىلعان اششى قۇرت. جاز مەزگىلىندە بالعىن سۇزبەدەن قۇلپىناي, ورىك, قاراقات سەكىلدى جەمىستەر قوسىلعان ءتاتتى قۇرتتار دا دايىندالادى. بۇل ونىمدەر دەسەرت رەتىندە ۇسىنىلادى.
ارنايى ستانوكتاردىڭ كومەگىمەن قۇرتتى دومالاق, سىقپا, سپيرال, رومبيك سياقتى ءارتۇرلى پىشىندە جاساۋعا مۇمكىندىك بار. ال اسىق پىشىندەگى قۇرتقا كوپشىلىك قىزىعۋشىلىق تانىتادى. الداعى ۋاقىتتا تسەح ۇجىمى قۇرتتى ءتورت ت ۇلىك مالدىڭ پىشىنىندە دايىنداۋدى ويلاستىرىپ وتىر. بۇل باستامالارى ارقىلى ۇلتتىق تاعامعا دەگەن قىزىعۋشىلىقتى ارتتىرىپ, قازاقتىڭ ءداستۇرلى ونىمدەرىن زاماناۋي فورماتتا ناسيحاتتاۋدى كوزدەيدى.
«مەن – جوبانىڭ اۆتورىمىن. ءوندىرىستىڭ نەگىزگى جۇمىسىن جولعا قويعان – جۇبايىم ايدار, ال باس تەحنولوگىمىز – قايىن اتام. ءبىز بۇل ءىستى ءبىر عانا سەپاراتوردان باستاپ, بارلىق تەحنولوگيانى ءوز تاجىريبەمىز ارقىلى ۇيرەندىك», دەيدى جازيرا تولەگەنوۆا.
شيكىزات نەگىزىنەن جاقىن ماڭداعى شارۋا قوجالىقتارىنان الىنادى. قازىر ايىنا شامامەن 2 توننا سۇزبە وڭدەلىپ, ودان 1 توننا دايىن قۇرت وندىرىلەدى. الداعى جوس-پارلارى دا اۋقىمدى. جازيرا تولەگەنوۆا ۇلكەن كوماندا قۇرىپ, ءوندىرىس قۋاتىن ارتتىرۋدى, ءونىمدى ەلىمىزدىڭ ءىرى قالالارىنا جەتكىزۋدى ماقسات ەتىپ وتىر. نەگىزگى ماقسات – «Qazaq National Product» قۇرت ءوندىرىسىن ۇلتتىق برەندكە اينالدىرۋ. بولاشاقتا قۇرت ساتاتىن دۇكەندەردىڭ فرانشيزاسىن اشپاقشى.
ۇلتتىق تاعامدى جاڭا دەڭگەيگە كوتەرۋگە ۇمتىلعان جاس كاسىپكەرلەردىڭ باستاماسى – قۇرتتىڭ تەك اۋىلدىڭ ءدامى عانا ەمەس, زامان تالابىنا ساي دامىپ كەلە جاتقان ۇلتتىق برەندكە اينالىپ كەلە جاتقانىن كورسەتەدى.
قاراعاندى وبلىسى