سۋ ايدىندارىنىڭ بارلىعى مۇز قۇرسانىپ جاتقانىنا قاراماستان ەرتىس - بايان وڭىرىنە اققۋلار ۇشىپ كەلە باستادى. العاشقىلارى اقسۋ اۋىلدىق ايماعىنان كوزگە تۇسكەن.
حالقىمىزدىڭ ۇعىمىندا قۇستىڭ تورەسى دەپ ەسەپتەلەتىن اققۋلار پاۆلودار جەرىندەگى ايدىنداردى توڭىرەكتەپ ءجۇر. قازىر وبلىس اۋماعىنداعى وزەن-كولدەردىڭ بارلىعىندا كوك مۇز سىرەسىپ تۇر. سوندىقتان قاناتتىلار ەرىگەن قار سۋىن جاعالاپ قونىپ جاتىر.
وبلىستىق ورمان جانە جانۋارلار دۇنيەسىن قورعاۋ مەكەمەسىنىڭ باسشىسى اجدار ءجۇسىپوۆتىڭ دەرەگىنشە, كەلىپ جاتقان قۇستار سۇڭقىلداق جانە قيقىلداق اققۋ تۇرلەرىنە جاتادى.
– اقسۋ اۋىلدىق ايماعى مەن پاۆلودار اۋدانى دالاسىنداعى ەرىگەن قار سۋىنا اققۋلار ورالدى. قاۋىرسىن قاناتتىلاردى ءبىزدىڭ مەكەمەنىڭ ينسپەكتورلارى بايقاعان. بۇل كۇننىڭ كۇرت جىلىناتىنىن بىلدىرەدى. ولاردىڭ ىشىندەگى سۇڭقىلداق اققۋلار ەلىمىزدە كەڭ تاراعان, كوبىنە رەسپۋبليكامىزدىڭ سولتۇستىك, ورتالىق جانە وڭتۇستىك-شىعىس وڭىرلەرىنىڭ قالىڭ قامىستى-قوعالى ءىرى كولدەرىن مەكەندەيدى. قىزىل كىتاپقا ەنگەن قيقىلداق اققۋ دا ءبىزدىڭ ايماقتا كەزدەسەدى, – دەيدى مەكەمە باسشىسى.
ورنيتولوگتەردىڭ ايتۋىنشا, سىبىرلاق اققۋدىڭ (Cygnus olor) تۇرقى ىرىلەۋ, سالماعى 14 كيلوعا دەيىن بولادى. ءتۇسى اق, تۇمسىعى – قىزىل, ونىڭ ۇستىندە قارا شور بايقالادى. جاس قۇستار قوڭىر-سۇر ءتۇستى. جۇزگەندە موينىن لاتىننىڭ S ءارپى تۇرىندە ءيىپ ۇستايدى. ۇشىپ بارا جاتقاندا الىستان قاناتتارىنىڭ ىرعاقتى سۋسىلداعان دىبىسى ەستىلەدى. وسى ەرەكشەلىگى ارقىلى سۇڭقىلداق اققۋدان ەرەكشەلەنەدى ءارى سوڭعىسىنىڭ تۇمسىعى سارى-قارا, شور بولمايدى. ەلىمىزدىڭ بارلىق سۋقويمالارىندا كەزدەسەدى.
پاۆلودار وبلىسى