ەلورداداعى اتاتۇرىك ساياباعىندا «كورىسۋ كۇنى – امال مەرەكەسى» اتتى اۋقىمدى مادەني ءىس-شارا ۇيىمداستىرىلدى. مەرەكەلىك ءىس-شاراعا مادەنيەت قايراتكەرلەرى, زيالى قاۋىم وكىلدەرى مەن قالا قوناقتارى قاتىستى.
مەرەكە تەاترلاندىرىلعان كورىنىسپەن باستالدى. قىدىر اتا مەن ۇماي انا جينالعان جۇرتقا باتا بەرىپ, اماندىق, باق-بەرەكە مەن باقىت تىلەدى. ودان كەيىن ۇلتتىق كيىم كيگەن مىڭنان استام ادام ءبىر مەزەتتە ەجەلگى كورىسۋ كۇنى ءداستۇرىن ورىنداپ, ءبىر-بىرىمەن قۇشاقتاسىپ كورىسىپ, جىلى لەبىزدەرىن ءبىلدىردى.
سالتاناتتى جيىن بارىسىندا كوكتەمنىڭ كەلۋى مەن تابيعاتتىڭ جاڭارۋىن بەينەلەيتىن قويىلىمدار ساحنالانىپ, ۇلتتىق سالت-جورالعىلار مەن ينتەراكتيۆتى مادەني باعدارلامالار ۇسىنىلدى. سونداي-اق ساحنادا استانا قالاسىنىڭ مادەنيەت باسقارماسىنا قاراستى شىعارماشىلىق ۇجىمدارى ونەر كورسەتىپ, بۇقارا مەرەكەلىك كونتسەرتتى تاماشالادى.
بەلگىلى اقىن داۋلەتكەرەي كاپ ۇلىمەن اڭگىمەلەسكەنىمىزدە: «قازىر حالىق ناۋرىز مەرەكەسىنىڭ ءمان-ماڭىزىن تەرەڭ ءتۇسىنىپ, ەلىمىزدىڭ ءار وڭىرىندە ۇلتتىق ءداستۇردى ۇلىقتاۋ جاندانىپ كەلەدى. كورىپ وتىرسىز, بۇگىنگى مەرەكەلىك كوڭىل كۇي كەرەمەت. مۇنداي مەرەكەلەردىڭ باستى ماقساتى حالقىمىزدىڭ عاسىرلار بويى قالىپتاسقان مادەني مۇراسىن, ۇلتتىق ونەرى مەن سالت-ءداستۇرىن دارىپتەۋ, ەل بىرلىگى مەن ۇلتتىق بىرەگەيلىكتى ناسيحاتتاۋ بولۋعا ءتيىس», دەدى ول.
«كورىسۋ كۇنى – امال مەرەكەسى» اتتى ءىس-شارانى ۇيىمداستىرۋشىلار ۇلتتىق ءداستۇر مەن زاماناۋي تەحنولوگيانى ۇشتاستىرىپ, جاساندى ينتەللەكت ارقىلى مادەني قۇندىلىقتاردى تانىتۋدى دا كوزدەپتى. ەلوردانىڭ تسيفرلىق دامۋىنا ەرەكشە ۇلەس قوسىپ جۇرگەن ازاماتتار ارنايى كيىز ءۇي تىگىپ, AI-ايماق تا ۇيىمداستىرعان. بۇل كيىز ۇيگە كەلگەن قوناقتار ەكرانداعى قىزدان ناۋرىز مەرەكەسىنە قاتىستى سۇراق سۇراپ, ەلەكتروندى ساداق اتىپ, قۇلتەمىرمەن بي بيلەپ, ءسان-سالتانات قۇردى. «Astana innovations» ۇيىمىنىڭ قىزمەتكەرى ايدىن ەسبەك ەل بىرلىگى مەن ۇلتتىق بولمىستى زامانعا ساي تەحنولوگيامەن ناسيحاتتاۋ كەرەكتىگىنە توقتالىپ, جاساندى ينتەللەكت ارقىلى ءداستۇردى ناسيحاتتاۋ الدا دا جالعاسىن تاباتىنىن ايتتى.
سونىمەن قاتار ساياباق اۋماعىندا ۇلتتىق مۋزىكالىق اسپاپتار مەن قولدانبالى ونەر بۇيىمدارىنىڭ كورمەسى ۇيىمداستىرىلىپ, كەلۋشىلەرگە قازاق حالقىنىڭ باي مادەني مۇراسىمەن جاقىنىراق تانىسۋعا مۇمكىندىك بەرىلدى. جۇرت ونەرپازداردىڭ كونتسەرتىن تاماشالاۋدان بولەك, كىر تاسىن كوتەرىپ, التىباقان تەۋىپ, اسىق, توعىزقۇمالاق ويناپ, كوڭىل كوتەردى.