قايىرىمدىلىق جاساۋ كۇنىنە وراي ەرىكتىلەردىڭ قاتىسۋىمەن يگى اكتسيا ۇيىمداستىرىلدى. «استانا جاستارى» جاستار رەسۋرستىق ورتالىعىنىڭ ەرىكتىلەرى كوممۋنالدىق قىزمەتكەرلەرگە ىستىق شاي مەن باۋىرساق تاراتتى. بۇل تۋرالى ەلوردا اكىمدىگىنىڭ رەسمي سايتى ءمالىم قىلدى, دەپ حابارلايدى Egemen.kz.
ءىس-شارا «استانا جاستارى» جاستار رەسۋرستىق ورتالىعى جانە سارايشىق اۋدانى اكىمدىگىمەن بىرلەسىپ ۇيىمداستىرىلدى. اتالعان ورتالىق قۇرامىنداعى ەرىكتىلەر قوزعالىسىن دامىتۋ ءبولىمى 2014 جىلدان بەرى جۇمىس ىستەپ كەلەدى. قازىرگى تاڭدا مەكەمەدە 8000-نان استام ەرىكتى قىزمەت اتقارادى.
«بۇگىن 15 ناۋرىز – قايىرىمدىلىق جاساۋ كۇنى, بۇل كۇن مەيىرىمدىلىك پەن تاتۋ ءومىر سۇرۋگە, بەيبىتشىلىككە شاقىرادى. نەگىزگى ماقسات – ەڭبەك ادامدارىنا ادال ەڭبەكتەرى ءۇشىن راحمەت ايتۋ, كىشكەنە بولسا دا كوڭىلدەرىن كوتەرۋ», دەيدى ەرىكتىلەر قوزعالىسىن دامىتۋ ءبولىمىنىڭ باس مامانى ايزات الي.
اكتسيا اياسىندا ەرىكتىلەر كوممۋنالدىق قىزمەت جۇمىسشىلارىن ىستىق باۋىرساق پەن شايدان ءدام تاتقىزدى. سونىمەن قاتار ەرىكتىلەر كۇرەك الىپ, اۋماقتى تازالاۋعا اتسالىستى.
ناۋرىزناما: بۇگىن – قايىرىمدىلىق جاسايتىن كۇن
«مەن وسى سالادا 10 جىلدان بەرى جۇمىس ىستەيمىن. بىزگە ەرىكتىلەر ءاردايىم قولداۋ كورسەتەدى. ولار مۇمكىندىگىنشە قولعابىس كورسەتىپ, تاتتىلەر تاراتىپ, ىقىلاستارىن بىلدىرەدى. مۇنداي شارالار بىزگە قۋانىش سىيلايدى جانە ەڭبەگىمىزدى باعالايتىن ادامداردىڭ بارىن سەزدىرەدى», دەيدى «تسەلينا سەرۆيس» كوممۋنالدىق قىزمەتىنىڭ قىزمەتكەرى دينارا قاليەۆا.
ۇيىمداستىرۋشىلاردىڭ ايتۋىنشا, مۇنداي باستامالار قوعامدا مەيىرىمدىلىك پەن ءوزارا قولداۋ مادەنيەتىن قالىپتاستىرۋعا, سونداي-اق قاراپايىم ەڭبەك ادامدارىنا قۇرمەت كورسەتۋگە باعىتتالعان. ەرىكتىلەر الداعى ۋاقىتتا دا وسىنداي الەۋمەتتىك ماڭىزى بار شارالاردى تۇراقتى تۇردە وتكىزىپ, قوعامعا پايدالى ىستەردى جالعاستىرا بەرمەك.
حالىق قايىرىمدىلىق قورلارىنا سەنە مە؟