بۇگىن استانا وپەرا تەاترىندا ازەربايجاننىڭ ورتالىق سايلاۋ كوميسسياسىنىڭ توراعاسى مازاحير ماگوممەد وگلى پاناحوۆ ەلدىڭ جاڭا كونستيتۋتسياسىن قابىلداۋ جونىندەگى رەفەرەندۋمعا قاتىستى پىكىرىن ءبىلدىردى. سپيكەردىڭ ايتۋىنشا ازەربايجاندىق باقىلاۋشىلار ەلۋگە جۋىق سايلاۋ ۋچاسكەسىندە بولىپ, رەفەرەندۋمعا كەلگەن حالىقتىڭ بەلسەندىلىگىن بايقاعان, دەپ جازادى Egemen.kz.
ازەربايجاننان جيىرمادان استام باقىلاۋشى كەلگەن. دەلەگاتسيا قۇرامىندا پارلامەنت مۇشەلەرى, ورتالىق سايلاۋ كوميسسياسىنىڭ ماماندارى مەن ازەربايجاننىڭ قازاقستانداعى ەلشىلىگىنىڭ وكىلدەرى بار. ولار تاڭەرتەڭنەن باستاپ ءارتۇرلى سايلاۋ ۋچاسكەلەرىنە ءبولىنىپ, رەفەرەندۋم بارىسىن قاداعالاپ وتىر.
«بۇگىن شامامەن ەلۋگە جۋىق سايلاۋ ۋچاسكەسىندە بولدىم. كەش باتقانشا ازەربايجان دەلەگاتسياسىنىڭ وكىلدەرى باقىلاۋ جۇرگىزىپ جاتقان بارلىق ۋچاسكەلەردى ارالاپ, قانداي دا ءبىر زاڭ بۇزۋشىلىق نەمەسە پروبلەمالار بار-جوعىن سۇراپ شىعامىن. قازىرگە ونداي ولقىلىقتار ورىن العان جوق. جالپى العاندا, شۇكىر, رەفەرەندۋم قالىپتى تۇردە ءوتىپ جاتىر. ءتىپتى اۋا رايىنىڭ سالقىندىعىنا قاراماستان, سايلاۋشىلاردىڭ بەلسەندىلىگى بايقالادى. مىنە, وزدەرىڭىز دە كەزەگىن كۇتكەن ازاماتتاردى كوزبەن كورىپ وتىرسىزدار», دەدى مازاحير پاناحوۆ.
سونداي-اق, سپيكەر ءوز سوزىندە بۇعان دەيىن دە قازاقستاندا وتكەن سايلاۋلارعا باقىلاۋشى بولعانىن, ءار سايلاۋ سايىن قازاق ەلى وڭ وزگەرىستەرگە نىق قادام باسىپ كەلە جاتقانىن ايتتى.
«حالىق ءوز ەلىنىڭ بولاشاعىنا دەگەن جاۋاپكەرشىلىگىن تولىق سەزىنەتىنىن بايقادىم. ورتالىق سايلاۋ كوميسسياسىنىڭ مۇشەلەرى ءوز كاسىبي دەڭگەيلەرىن كورسەتىپ, وتە اۋقىمدى جانە اۋىر جۇمىستى قۇلشىنىسپەن اتقارىپ جاتىر. قازاقستاننىڭ ورتالىق سايلاۋ كوميسسياسى دامىعان ەۋروپا مەن اقش ەلدەرىندە قولدانىلىپ جۇرگەن بارلىق زاماناۋي ادىستەردى ەركىن پايدالانۋدا. سونىمەن قاتار, مۇمكىندىگى شەكتەۋلى, ناشار كورەتىن, ەستىمەيتىن جانە ءجۇرىپ-تۇرۋىندا قيىندىقتارى بار ازاماتتارعا قاجەتتى جاعدايدىڭ ءبارىن جاساپ بەرىپ وتىر», دەدى ءوز سوزىندە.
ۆااگن وۆاكيميان: قازاقستان حالقىنىڭ اۋىزبىرشىلىگىنە ءتانتى بولدىم
ازەربايجاندىق باقىلاۋشى بيىلعى رەفەرەندۋمنىڭ تاعى ءبىر ەرەكشەلىگى رەتىندە سايلاۋ ۋچاسكەلەرىندە اۋديوجۇيەنىڭ ىسكە قوسىلۋىن ايتتى.
«ەگەر داۋىس بەرۋگە قۇقىلى ازامات رەفەرەندۋمنىڭ ءمانىن بىلگىسى كەلسە, ياكي مازالاعان باسقا دا سۇراقتارى بولسا, ول ارنايى ورناتىلعان اۋديو-جۇيە ارقىلى وزىنە قاجەتتى اقپاراتتى الا الادى. بۇل جۇيە سايلاۋدا كاسىبي باقىلاۋشى بولىپ كەلە جاتقان ماماندارعا دا وتە پايدالى بولارى ءسوزسىز. سوندىقتان دا قازاقستانداعى رەفەرەندۋم بارىسىن باقىلاۋعا كەلگەن 350-دەن استام حالىقارالىق باقىلاۋشىلار بۇل جۇيەگە وڭ باعا بەرىپ وتىر», دەدى ازەربايجاننىڭ ورتالىق سايلاۋ كوميسسياسىنىڭ توراعاسى.
باحتيور حۋدويورزودا: ازاماتتاردىڭ بەلسەندىلىگى جوعارى ەكەنىن كورىپ وتىرمىز
ءسوز سوڭىندا ءتۇبى ءبىر تۋىستاس ەلدىڭ وكىلى ءبىز تاۋەلسىزدىك العالى قازاقستاننىڭ ورتالىق سايلاۋ كوميسسياسىمەن تىعىز بايلانىس ورناتقانىن اتاپ ءوتتى.
«ەكى ەل ءاردايىم ءبىر-بىرىمەن ءوز تاجىريبەسىن ءبولىسىپ كەلەدى. ءتىپتى, باسقا ەلدەردەگى سايلاۋلاردى باقىلايتىن كەزدە دە ستاندارتتارىمىز بەن تاجىريبەمىزدى ورتاعا سالامىز. ال, بۇگىنگى رەفەرەندۋمعا قاتىستى ايتارىم, جىل ساناپ سايلاۋ ۋچاسكەلەرىندەگى كاسىبي دەڭگەي ارتىپ كەلەدى, بارلىق ۋچاسكەلەردە قالا, اۋىل دەمەي سايلاۋشىلاردىڭ قۇقىقتارى بىردەي قامتاماسىز ەتىلگەن. ينتەرەر ءار ۋچاسكەدە ءارتۇرلى بولۋى مۇمكىن, بىراق باستىسى ءبىزدى سايلاۋشىلاردىڭ قۇقىنىڭ تەڭدىگى, كوڭىل كۇيىنىڭ كوتەرىڭكى ەكەنى قۋانتادى», دەپ تۇيىندەدى ءوز ءسوزىن.