پانفيلوۆ اۋدانىندا عاسىردان اسقان كەيۋانا ناعيمان شالاباەۆا ەل ومىرىندەگى ماڭىزدى ساياسي ناۋقاننان قالىس قالماي, العاشقىلاردىڭ ءبىرى بولىپ ءوز تاڭداۋىن جاسادى. 105 جاستاعى قاريا جاركەنت قالاسىنداعى №290 داۋىس بەرۋ ۋچاسكەسىنە ارنايى كەلىپ, داۋىس بەردى, دەپ حابارلايدى Egemen.kz.
ءومىردىڭ تالاي بەلەسىن ارتتا قالدىرعان ناعيمان اپا – ۇلكەن اۋلەتتىڭ ارداقتى اناسى. ول 13 بالا تاربيەلەپ وسىرگەن. بۇگىندە 36 نەمەرە, 103 شوبەرە, 13 شوپشەك ءسۇيىپ وتىرعان ابىز انا ۇرپاعىنىڭ ورتاسىندا باقىتتى عۇمىر كەشىپ وتىر.
عاسىردان اسقان عۇمىرىندا ەل تاريحىنداعى ءتۇرلى كەزەڭدەردىڭ كۋاسى بولعان قاريا ءاربىر ساياسي ناۋقاندا بەلسەندىلىك تانىتىپ, ازاماتتىق پارىزىن ورىنداۋدى وزىنە مىندەت سانايدى. قارت انا دەنساۋلىعىنىڭ جاقسى ەكەنىن ايتىپ, جاستاردى ەل بولاشاعىنا بەيجاي قاراماۋعا شاقىردى.
«تاڭ اتقالى وسى جەرگە كەلۋگە دايىندالىپ وتىردىم. ومىرىمدە تالاي سايلاۋعا قاتىستىم. قۇدايعا شۇكىر, كوپتى كوردىك: اشتىقتى دا, جوقشىلىقتى دا باستان وتكەردىك. قازىر ەلدە بارلىعى بار, سوعان شۇكىرشىلىك ەتۋ كەرەك. ەلۋ جىلدا ەل جاڭا دەيدى عوي. مەنىڭ بۇگىنگى داۋىس بەرۋىم – سول جاڭارۋعا قوسقان ۇلەسىم. ەشتەڭە ىستەمەسەڭ دە, ەلىڭنىڭ بولاشاعىن قولداۋ – ءار ازاماتتىڭ پارىزى. جاسىمدى بەرسىن سەندەرگە», دەپ اق باتاسىن بەردى ناعيمان اپا.
داۋىس بەرۋگە كەلگەن تۇرعىندار دا ابىز انانىڭ باتاسىن الىپ, ەرەكشە قۇرمەت كورسەتتى.
ايتا كەتەيىك, پانفيلوۆ اۋدانىندا بارلىعى 79 رەفەرەندۋم ۋچاسكەسى جۇمىس ىستەيدى. اۋدانداعى 84 410 تۇرعىن داۋىس بەرۋ قۇقىعىنا يە.
رەفەرەندۋم كۇنى الماتىداعى ۋچاسكەلەردىڭ بىرىندە «اجەلەر حورى» ءان ايتتى