الماتىداعى ۇلتتىق ورتالىق مۋزەيدە كورنەكتى سۋرەتشى, اۋقىمدى ۇلتتىق جوبالاردىڭ اۆتورى بولات مۇحامەديەۆتىڭ «قولونەر تاريحى» اتتى رەتروسپەكتيۆتى كورمەسى اشىلدى, دەپ جازادى Egemen.kz.
ەكسپوزيتسيا سۋرەتشىنىڭ سان قىرلى شىعارماشىلىق جولىن ايشىقتايدى. اۆتور ءۇشىن ونەر – ۇنەمى العا ۇمتىلۋ, فورمانىڭ كەمەلدىگى مەن مازمۇن تەرەڭدىگىن ۇيلەستىرۋ جولىنداعى ۇزدىكسىز ىزدەنىس دەرسىز. اۆتور شىعارماشىلىق عۇمىرىندا باتىل ەكسپەريمەنت جاساپ, جانرلىق جانە ستيلدىك شەكارالاردى كەڭەيتىپ كەلەدى.
كورمەدە مۇسىندىك جانە ساۋلەتتىك جوبالار, كەسكىندەمە مەن گرافيكا تۋىندىلارى, ديزاين, تسيفرلىق ونەر جانە كوركەم فوتوسۋرەت سالاسىنداعى ەڭبەكتەر ۇسىنىلعان. ءاربىر جۇمىس اۆتوردىڭ ماتەريالدى سەزىنۋ ەرەكشەلىگىن, پلاستيكالىق ويلاۋ جۇيەسىن جانە كاسىبي شەبەرلىگىن تانىتادى.
سۋرەتشى ءۇشىن «قولونەر» ۇعىمى تەك تەحنيكالىق ماشىق ەمەس, ول – ءداستۇر مەن جاڭاشىلدىقتى, ۇلتتىق كوركەمدىك كودتار مەن زاماناۋي الەمدىك ۇردىستەردى توعىستىراتىن شىعارماشىلىق فيلوسوفيا.
كورمە قازاقستاندىق سۋرەتشىلەردىڭ ۇلتتىق بەينەلەۋ ونەرىن دامىتۋداعى ەلەۋلى ۇلەسىن ايقىندايدى. تەرەڭ اكادەميالىق مەكتەپتەن وتكەن, مول تاجىريبە جيناقتاعان وتاندىق شەبەرلەر ەلدىڭ مادەني كەڭىستىگىن قالىپتاستىرۋدا ماڭىزدى ءرول اتقارىپ كەلەدى.
«بۇل كورمە جاس ۇرپاق ءۇشىن دە تاعىلىمدى. مۋزەيدىڭ باستى مىندەتى – كوركەم مۇرانى ساقتاۋ جانە كورسەتۋ عانا ەمەس, مادەني ساباقتاستىقتى نىعايتۋ, قازاقستاننىڭ كورنەكتى سۋرەتشىلەرىنىڭ ەسىمدەرىن كەڭىنەن ناسيحاتتاۋ ارقىلى بولاشاق بۋىنعا كاسىبي ءارى رۋحاني ۇلگى كورسەتۋ», دەيدى كورمەنى ۇيىمداستىرۋشىلار.
كورمەنىڭ اشىلۋ سالتاناتىنا سۋرەتشىنىڭ ارىپتەستەرى مەن زامانداستارى نەللي بۋبە, مارات تۇرعىمباي, مارلان نىسانباەۆ, ماقسات قاڭتارباەۆ, ەسەنعالي سادىرباەۆ, دجاميليا تاكەن, شوقان تولەش, ەستاي داۋباەۆ, فاتيما تارازي جانە باسقا دا ونەر قايراتكەرلەرى قاتىستى. جينالعاندار «قولونەر تاريحى» رەتروسپەكتيۆاسى – شىعارماشىلىقتىڭ ارالىق قورىتىندىسى عانا ەمەس, زاماناۋي قازاقستاندىق ونەر كەڭىستىگىندە وزىندىك ورنى بار شەبەردىڭ ۇزدىكسىز كوركەمدىك ەۆوليۋتسياسىنىڭ ايقىن كورىنىسى ەكەنىن اتاپ ءوتتى.