تابيعي ناننىڭ ءدامى

ونىڭ ونىمدەرى – زاماناۋي نارىقتاعى باسەكەگە توتەپ بەرەتىن, سونىمەن قاتار, ءداستۇرلى ادىسپەن دايىندالاتىن نان. ون سەگىز جاسىنان كاسىپكەرلىككە دەن قويعان ەربولاتقا بۇل سالا توسىن ەمەس. دەگەنمەن, ناۋبايشىلىق – جاي تابىس كوزى ەمەس, جان قالاۋى. نارىقتى مۇقيات سارالاعان ول كوپشىلىككە تانىس ءونىمدى جاڭاشا سيپاتتا ۇسىنۋعا بولاتىنىن اڭعارعان. ءسويتىپ, جارتى جىل بويى الماتى قالاسىندا ءبىلىم الىپ, تاجىريبە جيناقتايدى. سول كەزەڭدە تابيعي اشىتقىنىڭ قاسيەتىن تەرەڭ مەڭگەرىپ, ءۇي نانىنىڭ شىنايى ءدامىن ساقتاۋدىڭ قۇپياسىن ۇيرەنەدى.

«نان وندىرىسىندە جاڭالىق اشۋ قيىن كورىنەدى. بىراق ساپا مەن تابيعيلىققا باسىمدىق بەرۋ ارقىلى تۇتىنۋشىنىڭ جۇرەگىنە جول تابۋعا بولادى», دەيدى كاسىپكەر.

ەربولاتتىڭ باستى ۇستانىمى – ءونىمنىڭ تابيعيلىعى. ونىڭ ناۋبايحاناسىندا وندىرىلەتىن جەتى ءتۇرلى ناننىڭ بارلىعى دا كادىمگى تابيعي اشىتقىمەن ازىرلەنەدى. ياعني قۇرامىندا جاساندى قوسپالار جوق. جەرگىلىكتى ديىرمەننەن الىناتىن ۇن مەن تابيعي ينگرەديەنتتەر عانا پايدالانىلادى. مۇنداي ءتاسىل ناننىڭ سىڭىمدىلىگىن ارتتىرىپ, ءدامىن بايىتادى. قول اشىتقىنىڭ باياۋ جەتىلۋ ۇدەرىسى ارقىلى دايىندالعان ءونىم ۇزاق ساقتالىپ, اعزاعا جەڭىل سىڭەدى. بۇل – دەنساۋلىعىنا ءمان بەرەتىن تۇتىنۋشىلار ءۇشىن ۇلكەن ارتىقشىلىق.

قازىر شاعىن كاسىپورىندا التى ادام تۇراقتى ەڭبەك ەتەدى. كۇن سايىن 350-گە جۋىق ءونىم ءپىسىرىلىپ, وبلىس ورتالىعىنداعى 25 دۇكەنگە جونەلتىلەدى. تاڭعى ۋاقىتتاعى ناۋبايحانادا جاڭا پىسكەن ناننىڭ ەرەكشە اڭقىعان ءيىسى ۇجىمدى دا, تۇتىنۋشىنى دا باۋ­راپ الادى. تالدىقورعان نارىعىن ءجىتى زەرتتەگەن كاسىپكەر ءدال وسى باعىتتا بوس كەڭىستىك بارىن بايقاعان. ءسويتىپ, قولدان پىسىرىلەتىن, تابيعي ادىسپەن دا­يىندالاتىن نان ءتۇرىن وڭىرگە العاشقىلاردىڭ ءبىرى بولىپ ۇسىندى.

«نان ءبىزدى وتباسىمىزدىڭ تاريحىمەن, سالت-داستۇرىمىزبەن, مادەني مۇرامىزبەن بايلان­ىس­تىرادى. سوندىقتان ناۋبايحاناما «ەرەنتال» دەپ اتامنىڭ ەسىمىن بەردىم. قول اشىتقىمەن دايىندالاتىن نان پىسىرۋگە كوبىرەك ۋاقىت كەتەدى, ويتكەنى ۇدەرىستىڭ باسىم بولىگى قولمەن اتقارىلادى. قازىر تارتين نانىن, ءداندى جانە مۇكجيدەك قوسىلعان نان, ءداندى باگەت, بورودينو نانى مەن قارا بيداي نانىن, چياباتتا مەن قاراقۇمىق چياباتتاسىن پىسىرەمىز. سونىمەن قاتار كۇن سايىن 60 بولكە نان پىسىرەمىز. سۇرانىس بولسا, كرۋاسسان, سيننابون, پىراندىك, سامسا, باسقا دا ءتۇرلى نان-توقاش ءونىمىن دايىنداۋعا مۇمكىندىگىمىز بار. قاجەتتى قۇرال-جابدىقتارىمىز دا, ءوسىپ-وركەندەۋگە دەگەن نيەتىمىز دە جەتكىلىكتى», دەيدى ە.ەرەنتالوۆ.

ونىڭ ايتۋىنشا, كاسىپورىن الداعى ۋاقىتتا ءونىم ءتۇرىن كوبەيتۋدى, ءوندىرىس كولەمىن ۇلعايتۋدى جانە برەندتى رەسپۋبليكا كولەمىندە تانىتۋدى جوسپارلاپ وتىر. ساپالى ونىمگە سۇرانىس ءاردايىم بار. ەڭ باستىسى, سەنىم مەن تۇراقتىلىق.

تاعى ءبىر ەرەكشەلىگى – ناۋبايحانادا نان قارقىندى مۇزداتۋ ادىسىنەن وتكىزىلەدى. سونىڭ ارقاسىندا ءونىمدى الىس جەرلەرگە تاسىمالداۋعا مۇمكىندىك بار.

«قازىر ناۋبايحانامىزدىڭ ءونىمى تەك تالدىقورعان قالاسىندا ساتىلىپ جاتىر. الداعى ۋاقىتتا وبلىستىق, رەسپۋبليكالىق دەڭگەيگە شىقساق دەيمىز. ول ءۇشىن ەڭ الدىمەن ساپالى ءارى پايدالى ءونىم وندىرۋگە بار كۇشىمىزدى سالىپ كەلەمىز. ارينە, مەملەكەت تاراپىنان قولداۋ بولسا, ءوندىرىستى كەڭەيتىپ, اسسورتيمەنتتى ۇلعايتۋعا دايىنبىز. ءار ادام ومىردە ءوز ورنىن تاۋىپ, تابىسقا جەتە الادى دەپ سانايمىن. ول ءۇشىن ءوز ءىسىڭدى ءسۇيىپ, ونى جان-تانىڭمەن بەرىلە ىستەۋىڭ كەرەك», دەيدى ءوزى.

جاس كاسىپكەردىڭ بۇل باستاماسى – جەتىسۋدا شاعىن جانە ورتا بيزنەستىڭ دامۋىنا سەرپىن بەرەتىن جارقىن مىسال. تابيعي ونىمگە دەگەن سۇرانىس ارتقان سايىن وسىنداي ادال ەڭبەككە نەگىزدەلگەن جوبالاردىڭ دا عۇمىرى ۇزاق بولارى انىق.

جەتىسۋ وبلىسى