وندىرىستەگى ءورشىل قىزدار

ەلىمىزدىڭ اۆتوونەركاسىپ سالاسىنداعى ءىرى ويىنشى – «Orbis Auto» كومپانياسىندا 2800-دەن استام ادام جۇمىس ىستەيدى. ونىڭ 40%-ى – ايەلدەر. ولار بيزنەستىڭ نەگىزگى سالالارىندا – قارجى مەن بۋحگالتەريادان باستاپ ماركەتينگ, HR, قۇقىقتىق قولداۋ, تالداۋ جانە ديلەرلىك جەلى جۇمىسىنا دەيىنگى سالالاردا قىزمەت ەتەدى.

ء«بىز ايەلدەردىڭ, اسىرەسە باسقارۋشى جانە ساراپشى لاۋازىمدارىنداعى ۇلەسىنىڭ تۇراقتى تۇردە ارتىپ كەلە جاتقانىن كورىپ وتىرمىز. اۆتوكولىك ونەركاسىبى بۇگىندە تەك تەحنولوگيامەن عانا ەمەس, باسقارۋ, تالداۋ, قىزمەت كورسەتۋ, تسيفرلىق ۇدەرىستەر, تۇتىنۋشى تاجىريبەسىمەن دە بايلانىستى. قازىر بۇل سالا ايەلدەرگە كاسىبي جەتىستىككە جەتۋدى قاراستىراتىن ماڭىزدى باعىتقا اينالىپ كەلەدى», دەيدى كومپانيانىڭ باس ديرەكتورى دينارا ىسقاقوۆا.

8-ناۋرىز – ايەل تاعدىرى تۋرالى ويلاناتىن كۇن

دينارا ىسقاقوۆانىڭ ءوزى دە اۆتويندۋستريا سالاسىندا 20 جىلدان استام ۋاقىت ەڭبەك ەتىپ كەلەدى. مانسابىن رەسەپشندە قاراپايىم قىزمەتكەر بولىپ باستاعان ول بۇگىندە بىلدەي ءبىر كومپانيانىڭ تىزگىنىن ۇستاپ وتىر.

«وسى جولدا تۇيگەنىم, ءبىزدىڭ سالادا كاسىبيلىك, ءتارتىپ پەن جاۋاپكەرشىلىك ارقاشان ماڭىزدى. ءوز الەۋەتىن وپەراتسيالىق رولدەردەن باستاپ باسشىلىق لاۋازىمدارعا دەيىن تابىستى جۇزەگە اسىرىپ كەلە جاتقان ايەلدەر سانىنىڭ ارتىپ كەلە جاتقانىنا شىن قۋانامىن. سونداي-اق اتالعان سالادا كاسىبي ءوسۋ مۇمكىندىكتەرى تەك ارتا بەرەتىنىنە سەنىمىم مول», دەيدى ول.

ال «Astana Motors» كومپانياسىنا تيەسىلى «نyundai Trans Kazakhstan» قىزمەتكەرلەرىنىڭ 13%-ى – ايەلدەر, «Astana Motors Manufacturing Kazakhstan» زاۋىتىندا ولاردىڭ ۇلەسى 15%-دى قۇرايدى. بۇرىن زاۋىتتاردا ايەلدەر نەگىزىنەن تەحنيكالىق باقىلاۋ (وتك) مەن لوگيستيكا بولىمىندە جۇمىس ىستەسە, بيىلعى ەسەپپەن ولاردىڭ ۇلەسى شاناقتى بوياۋ تسەحىنىڭ جەلىلەرىندە ءبىرشاما وسكەن. كومپانيا وكىلدەرىنىڭ ايتۋىنشا, اتالعان زاۋىتتار ءوز قىزمەتكەرلەرىنە جۇمىس ورتاسىنا تەز بەيىمدەلۋگە, ترەنينگتەر وتكىزۋگە جانە ۇزدىكسىز بىلىكتىلىكتى ارتتىرۋعا جاعداي جاسايدى.

قۇرمەتكە بولەنگەن انا: ءلاززات تايمىرقىزىنىڭ تاعىلىمعا تولى عۇمىرى

«كاسىپورىندارداعى ايەلدەرگە ارنالعان جۇمىس جاعدايلارى ەڭبەك زاڭناماسىنىڭ تالاپتارى مەن ەڭبەكتى قورعاۋ نورمالارىنا سايكەس, سونىڭ ىشىندە زاڭنامالىق كەپىلدىكتەر مەن شەكتەۋلەردى ساقتاۋمەن قامتاماسىز ەتىلەدى. جۇمىس ورىندارىندا زاماناۋي جابدىقتار (مانيپۋلياتورلار, اۆتوماتتاندىرىلعان جەلىلەر) ورناتىلعان, ءوز كەزەگىندە بۇل اۋىر فيزيكالىق ەڭبەكتى ازايتادى, كەز-كەلگەن ادامعا جۇمىستى قولجەتىمدى ەتەدى. كومپانيادا ەرلەر مەن ايەلدەرگە تەڭ مۇمكىندىكتەر بەرىلگەن», دەيدى كومپانيا وكىلدەرى.

«نyundai Trans Kazakhstan» زاۋىتىنىڭ قىزمەتكەرى ايسۇلۋ اكباروۆا 2022 جىلى جۇمىسقا ورنالاسقان. ءىرى ءوندىرىس ورنى اشىلعانىن ەستىگەن ول تۇيىندەمەسىن جولداپ, شاناقتاردى بوياۋ تسەحىنا سىرلاۋشى (ماليار) بولىپ قابىلدانعان. بىلىكتى مامان بىرنەشە جىل ءونىمدى ەڭبەك ەتىپ, ءوزىن كورسەتە ءبىلدى. بۇگىندە ايسۇلۋ اكباروۆا – تسەحتىڭ گەرمەتيزاتسيالاۋ ۋچاسكەسىنىڭ بريگاديرى.

«العاش زاۋىتقا كەلگەن كۇنى ءىرى ءوندىرىس ورنىنىڭ اۋقىمىن كورىپ, ازداپ قوبالجۋ بولدى. ءبىر جاعىنان, مۇنداي سالادا كوبىنە ەر ازاماتتار ەڭبەك ەتەدى دەگەن تاپتاۋرىن بار. بىراق ۋاقىت وتە كەلە قىزىعۋشىلىعىم قورقىنىشىمنان باسىم ءتۇسىپ, جۇمىسقا تەز بەيىمدەلدىم. بالالىق شاعىمنان تەحنيكاعا قىزىعامىن. اكەم اۋىلدا ۇزاق جىل مەحانيزاتور, باس مەحانيك بولىپ ەڭبەك ەتتى. سونىڭ قاسىندا ءجۇرىپ وسكەندىكتەن, تۇرمىستاعى ۇساق-تۇيەك تەحنيكالاردى ءوزىم جوندەي بەرەتىنمىن. سوندىقتان وندىرىستەگى جۇمىس ماعان اسا تاڭسىق بولعان جوق», دەيدى مامان.

زاۋىتتا اۆتوكولىك دايىن ونىمگە اينالۋى ءۇشىن ءۇش نەگىزگى كەزەڭنەن وتەدى. الدىمەن شاناقتى دانەكەرلەۋ, بوياۋ, سودان سوڭ جيناقتاۋ جۇمىسى جۇرگىزىلەدى. ايسۇلۋ اكباروۆا وسى ۇدەرىستىڭ بوياۋ كەزەڭىندەگى ۋچاسكەدە جۇمىس ىستەيدى. قاراماعىندا 15 ادام بار. كۇن سايىن جۇمىسشىلاردىڭ جاعدايىن باقىلاپ, قاۋىپسىزدىك تالاپتارىنىڭ ساقتالۋىن, جۇمىستىڭ ساپالى ءارى كەدەرگىسىز ءجۇرۋىن قاداعالايدى.

«العاشىندا جاقىندارىم بۇل جۇمىستى تاڭداعانىما الاڭداعانى راس. اۋىر ونەركاسىپ بولعاندىقتان كوبىنە ەر ادامدار ەڭبەك ەتەتىن ورتا عوي. بىراق مەن ءوز تاڭداۋىمدى تۇسىندىرگەننەن كەيىن وتباسىم قولداۋ ءبىلدىردى. كەيدە تۇنگى اۋىسىمدا جۇمىس ىستەپ, ىسساپارلارعا شىعۋعا تۋرا كەلەدى. جاقىندارىمنىڭ جاردەمىنسىز مۇنداي ءىستى اتقارا الماس ەدىم. قازىر ولاردىڭ سەنىمى مەن قولداۋى – مەن ءۇشىن ۇلكەن كۇش. مەنى جۇمىسقا شابىتتاندىراتىن ەڭ باستى نارسە – بالالارىمنىڭ بولاشاعى. سونىمەن قاتار زاۋىتتاعى قولداۋ مەن مۇمكىندىكتەر دە ۇلكەن موتيۆاتسيا بەرەدى. ەڭبەگىمىزدىڭ باعالانىپ, ءتۇرلى ماراپاتتار مەن الەۋمەتتىك قولداۋ كورسەتىلۋى ادامدى جىگەرلەندىرەدى», دەيدى ا.اكباروۆا.

قايسار قىز ناتيجەلى جۇمىسىنىڭ ارقاسىندا بىلتىر استانادا وتكەن ونەركاسىپ جانە قۇرىلىس مينيسترلىگىنىڭ ءىس-شاراسىندا مەملەكەت باسشىسىنىڭ جارلىعىمەن «ەرەن ەڭبەگى ءۇشىن» مەدالىن كەۋدەسىنە تاعىپتى.

«بۇل – مەن ءۇشىن ۇلكەن قۇرمەت. ەڭ باستىسى, ءوز  ماماندىعىمدى جاڭىلماي تاپتىم. بىلتىر پرەزيدەنت جاريالاعان جۇمىسشى ماماندىقتارى جىلى ءارى قاراي الەۋەتىمدى ارتتىرۋعا زور سەپتىگىن تيگىزدى. كەيدە كوشەدە ءوزىمىزدىڭ زاۋىتتا شىعارىلعان اۆتوكولىكتەردى كورگەندە بويىمدى ەرەكشە سەزىم بيلەيدى. سول كولىكتىڭ جاسالۋىنا ءوزىڭنىڭ دە ۇلەسىڭ بار ەكەنىن سەزىنۋ – ۇلكەن ماقتانىش ءارى شابىت», دەيدى ول.

ال اۆتوونەركاسىپتەگى ءىرى كاسىپورىننىڭ ءبىرى – «Allur» زاۋىتىندا كەيىنگى بەس جىلدا ايەلدەر سانى 40% ارتقان. وندا 841 ايەل ەڭبەك ەتەدى. بۇل – جالپى قىزمەتكەرلەر سانىنىڭ 21%-ى. نازىك جاندىلار وندىرىستىك تسەحتاردا, زەرتحانالاردا, قۇراستىرۋ جەلىلەرىندە, سونداي-اق اكىمشىلىك جانە باسقارۋ بولىمدەرىندە جۇمىس ىستەپ, كاسىپورىن قىزمەتىنىڭ ءتۇرلى باعىتتارىنا بەلسەندى اتسالىسىپ كەلەدى. ايەل قىزمەتكەرلەردىڭ الەۋمەتتىك جاعدايىنا دا ەرەكشە كوڭىل بولىنگەن. بالالارى بار قىزمەتكەرلەرگە يكەمدى جۇمىس كەستەسى قاراستىرىلعان. كاسىپورىندا كاسىبي جانە تۇلعالىق دامۋعا باعىتتالعان ءتۇرلى باعدارلامالار بار. 2013 جىلدان بەرى كورپوراتيۆتىك ۋنيۆەرسيتەت, كورپوراتيۆتىك پسيحولوگيا ورتالىعى جانە كوشباسشىلىقتى دامىتۋ باعدارلامالارى جۇمىس ىستەيدى. بۇل باستامالار قىزمەتكەرلەردىڭ جاڭا قۇزىرەتتەردى مەڭگەرۋىنە, كاسىبي تۇرعىدان وسۋىنە جول اشادى.

عالىم ايەلدەر اكادەميك ءنايلا بازانوۆا اتىنداعى قۇرمەت بەلگىسىمەن ماراپاتتالدى

بۇگىندە تەمىر تۇلپار تىزگىندەگەن, ءتىپتى تاكسي قىزمەتىندە جۇرگەن ارۋلاردى كورسەك تاڭعالمايتىن بولدىق. ال الپاۋىت كەن ورنىندا الىپ تەحنيكانى باعىندىرعان كەلەسى كەيىپكەرىمىزگە تاڭداي قاعۋعا تۋرا كەلەدى. تاريحى تاكسيمەن باستالعان قوستانايلىق ليۋبوۆ باباشەۆانىڭ ەڭبەك جولى قازىر «Hitachi-EH 4000» جۇك كولىگىمەن جالعاستى. ول – «قاشار كەنىندە» مۇنداي اۋىر كولىكتى تىزگىندەگەن العاشقى ايەل. بۇعان دەيىن ول «رۋدنىي ۆودوكانال» جشس-دە سورعى قوندىرعىلارىنىڭ ءماشينيسى بولىپ جۇمىس ىستەگەن.

«بىردە تاكسي قىزمەتىندە جۇرگەنىمدە ءبىر جولاۋشىدان كۇتپەگەن ۇسىنىس الدىم. ول كاسىپورىنداعى اۆتوكولىك تسەحىنىڭ باسشىسى ەكەن. كولىكتى ۇقىپتى جۇرگىزەتىنىمدى اڭعارىپ, جۇك كولىگىن جۇرگىزۋگە دەگەن نيەتىمدى سۇرادى. وسىلايشا, مەنىڭ ەرەكشە كاسىبي جولىم باستالدى. العاشىندا ماعان ءوندىرىس قىزمەتكەرلەرىن تاسۋعا «Chevrolet Niva» اۆتوكولىگى بەرىلگەن. كەيىن «كاماز-33081» كولىگىنە اۋىستىم. رۋدنىي كورپوراتيۆتىك ۋنيۆەرسيتەتىندە «Hitachi-EH 3500» جانە «Hitachi-EH 4000» اۋىر جۇك كوتەرگىشتەرىن ۇيرەندىم», دەيدى ل.باباشەۆا.

كەنىش تابانىنداعى رۋدانى 42 «Hitachi-EH 4000» ارنايى جۇكتاسىعىش تەحنيكاسى سىرتقا شىعارادى. ءبىر تيەگەندە 220 توننا جۇكتى جوعارىعا ەركىن الىپ شىعاتىن قۋاتتى تەحنيكانىڭ ءبىرىن ليۋبوۆ باباشەۆا جۇرگىزەدى.

«مەنىڭ جۇمىسىمدا ەڭ باستىسى ولشەمدى سەزىنۋ جانە مۇقياتتىلىق. سونداي-اق وزىڭە, ءوز كۇشىڭە دەگەن سەنىمنىڭ بولۋى ماڭىزدى. اۋىر جۇك كولىگىنىڭ سالماعى 220 توننا, بيىكتىگى 7 مەتر, ەنى 9 مەتر. باسقارۋ باسىندا قيىن بولعانىمەن, قازىر ەركىن جۇرگىزەمىن. كولىكتە ەلەكتروديناميكالىق تەجەۋ جۇيەسى, كرۋيزدىك باقىلاۋ قوندىرعىسى بار. باستىسى, قاۋىپسىزدىك ەرەجەلەرىن قاتاڭ ساقتاپ جۇرسەڭ بولعانى», دەيدى ول.

قايسار ارۋعا قاراپ, قوستاناي ولكەسىنەن شىققان سوتسياليستىك ەڭبەك ەرى كامشات دونەنباەۆانىڭ ەسىمى ەرىكسىز ەسكە تۇسەدى. ليۋبوۆ باباشەۆا دا سول قازاقتىڭ داڭقتى ءارى تۇڭعىش ايەل-مەحانيزاتورىنىڭ جولىن جالعاپ, ءىزىن باسىپ كەلە جاتقانداي كورىندى.

كەيىپكەرلەردىڭ ەڭبەك جولى اۋىر ونەركاسىپتىڭ ايەلدەرگە دە جات ەمەس ەكەنىن ايقىن كورسەتەدى. ولار باسقارۋ, تەحنولوگيالىق ۇدەرىس, وندىرىستىك باقىلاۋ باعىتتارىندا كاسىبي بىلىكتىلىگىن تانىتىپ كەلەدى. بۇل ەڭبەك نارىعىندا مامانعا قويىلاتىن تالاپتىڭ باسقا سيپاتقا ەمەس, تاجىريبە مەن جاۋاپكەرشىلىككە نەگىزدەلەتىنىن انىق اڭعارتادى.