8 ناۋرىز – حالىقارالىق ايەلدەر كۇنى قارساڭىندا قازاقستان رەسپۋبليكاسى ۇقك شەكارا قىزمەتى اسكەري قىزمەتشىلەرىنىڭ جۇبايلارى اراسىندا «شەكارا ارۋى» اتتى بەينەبايقاۋ ۇيىمداستىردى, دەپ حابارلايدى Egemen.kz.
اتالعان بايقاۋدىڭ باستى ماقساتى – شەكارا قىزمەتىنىڭ جاۋىنگەرلىك قىزمەتىن كەڭىنەن ناسيحاتتاۋ, اسكەري قىزمەتشىلەردىڭ وتباسىلارىنا قولداۋ كورسەتۋ, شالعايداعى شەكارا بولىمشەلەرىندەگى قىزمەتتىڭ بەدەلىن ارتتىرۋ, سونداي-اق اسكەري قىزمەتشىلەر جۇبايلارىنىڭ شىعارماشىلىق الەۋەتىن ناسيحاتتاۋ.
بايقاۋعا شەكارا قىزمەتىنىڭ اۋماقتىق بولىمشەلەرىنەن 14 ۇمىتكەر قاتىستى. بايقاۋ شارتىنا سايكەس ءاربىر قاتىسۋشى شالعايداعى شەكارا بولىمشەسىندەگى وتباسى تۇرمىسىنىڭ ەرەكشەلىكتەرىن, قىزمەت جاعدايىنداعى وتباسىلىق ءومىردىڭ ماڭىزىن بەينەروليك ارقىلى كورسەتۋى ءتيىس بولدى.ۇسىنىلعان بەينەروليكتەر «shekaraknbkz» Instagram پاراقشاسىندا جاريالانىپ, ونلاين داۋىس بەرۋ Telegram ارناسىندا وتكىزىلدى.
بايقاۋ ۇقك شەكارا قىزمەتى اسكەري-پاتريوتتىق قىزمەت باسقارماسى ۇيىمداستىرعان جانە «زاستاۆا تارلاندارى» رەسپۋبليكالىق قوعامدىق بىرلەستىگىنىڭ قولداۋىمەن وتكىزىلدى.ماراپاتتاۋ ءراسىمى شەكارا قىزمەتىنىڭ ورتالىق اپپاراتىندا سالتاناتتى تۇردە وتكىزىلدى.
«بايقاۋ جوعارى دەڭگەيدە وتكىزىلدى. ارنايى شالعايداعى زاستاۆالاردا قىزمەت اتقاراتىن اسكەري قىزمەتشىلەردىڭ وتباسىلارىن قولداۋ وتە ماڭىزدى. قاتىسۋشىلاردىڭ شىعارماشىلىق الەۋەتىن, پاتريوتتىق رۋحىن جانە وتباسىلىق قۇندىلىقتاردى دارىپتەۋىن كورگەنىمىزگە قۋانىشتىمىز», دەدى «زاستاۆا تارلاندارى» رقب توراعاسىنىڭ ورىنباسارى, پولكوۆنيك ج. مادەدينوۆ.
قورىتىندى ناتيجەگە سايكەس شەكارا قىزمەتى ماڭعىستاۋ وبلىسى بويىنشا دەپارتامەنتىنىڭ اتىنان قاتىسقان ارۋجان كۋلمانبەتوۆا باس جۇلدەنى يەلەندى. شەكارا قىزمەتى باتىس قازاقستان وبلىسى بويىنشا دەپارتامەنتى اتىنان قاتىسقان اينازىم قابىلتاي ەكىنشى ورىندى جەڭىپ الدى.
ال شەكارا قىزمەتى پاۆلودار وبلىسى بويىنشا دەپارتامەنتتىڭ وكىلى مارجان چۋجاەۆا قۇرمەتتى ءۇشىنشى ورىنعا يە بولدى.
«شەكارا ارۋى – 2025» فوتوبايقاۋىنىڭ جەڭىمپازى انىقتالدى
«بارلىق قاتىسۋشىلار شىعارماشىلىق شەبەرلىگىمەن, شىنايى پاتريوتتىق رۋحىمەن جانە وتباسى قۇندىلىعىن دارىپتەي بىلۋىمەن ەرەكشەلەندى. مەرەكە قارساڭىندا بارشا ايەلدەردى حالىقارالىق ايەلدەر كۇنىمەن قۇتتىقتاي وتىرىپ, مەملەكەتتىك شەكارانى كۇزەتىپ جۇرگەن جاۋىنگەرلەرگە سەنىمدى تىرەك بولعان اياۋلى جاندارعا ايرىقشا ريزاشىلىعىمىزدى بىلدىرەمىز», دەلىنگەن ۇقك شەكارا قىزمەتىنىڭ حابارلاماسىندا.